ខេត្តស្ទឹងត្រែង៖ប្រជាពលរដ្ឋនៅក្នុងក្រុងខេត្តស្ទឹងត្រែងជាង១០០០នាក់ទទួលបានអត្តសញ្ញាណប័ណ្ណថ្មី ដើម្បីប្រើប្រាស់ស្របច្បាប់ ទៅតាមសេចក្តីត្រូវការ ក្នុងពេលដែលអត្តសញ្ញាណប័ណ្ណចាស់ របស់គាត់ហួសសុពលភាព និងខ្លះទៀតត្រូវបាត់ទើប មន្ត្រីជំនាញអត្តសញ្ញាណប័ណ្ណ ធ្វើជូននៅក្នុងឆ្នាំនេះ។
នៅក្នុងពិធីចែកអត្តសញ្ញាណប័ណ្ណថ្មីជូនប្រជាពលរដ្ឋដែលនរៀបចំធ្វើឡើងនៅវត្តខត្តិយារាម (ហៅ វត្តកណ្ដាល)ក្នុងក្រុងស្ទឹងត្រែងកន្លងមកថ្មីៗនេះលោកប៊ុនណារីអភិបាលក្រុងបានលើកឡើងថា៖ក្រុងស្ទឹងត្រែងមានប្រជាពលរដ្ឋរស់នៅចំនួន ៥.៥២២ គ្រួសារ ស្មើនឹង ២៨.៤២៨នាក់ ក្នុងនោះមានស្រី ១៤.២០២ នាក់ នឹងមានអាយុ ១៥ ឆ្នាំឡើង ២០.៧៨៧នាក់ ។
លោកអភិបាលក្រុងបានបន្ថែមថា ៖ ការផ្លាស់ប្ដួរធ្វើអត្តសញ្ញាណប័ណ្ណថ្មីជូនប្រជាពលរដ្ឋ ដែលបានចែកជូននៅពេលនេះមានចំនួន១.៧២២ នាក់ សម្រាប់ប្រជាពលរដ្ឋនៅក្នុងសង្កាត់ស្ទឹងត្រែង ក្រុងស្ទឹងត្រែង ហើយជំហានទី ២ ខាងមុខនេះ មន្ត្រីនគរបាលអត្តសញ្ញាណប័ណ្ណ នឹងបន្ដធ្វើជូនប្រជាពលរដ្ឋចាប់ពីថ្ងៃទី ១៧ ខែ វិច្ឆិកា ឆ្នាំ ២០១៤នេះបន្តទៀត ដោយត្រូវបង់ប្រាក់ម្នាក់ចំនួនតែ១ម៉ឺនរៀលតែប៉ុណ្ណោះ ។
ក្នុងពិធីចែកអត្តសញ្ញាណប័ណ្ណនេះដែរលោក កុល សំអុល អភិបាលខេត្តស្ទឹងត្រែង មានប្រសាសន៍គ្រឿនរំលឹងដល់ប្រជាពលរដ្ឋទាំងអស់ ដែលប្រើប្រាស់អត្តសញ្ញាណប័ណ្ណហួសសុពលភាព បាត់នឹងបងប្អូនប្រជាពលរដ្ឋមានអាយុ១៥ឆ្នាំឡើង ត្រូវមកធ្វើអត្តសញ្ញាណប័ណ្ណឲ្យបានគ្រប់គ្នា ដើម្បីបំពេញកាតព្វកិច្ចជាពលរដ្ឋនៅក្នុងប្រទេសកម្ពុជា រស់នៅមានបណ្ណ័សំគាល់ខ្លួនត្រឹមត្រូវ ។
លោកអភិបាលខេត្តក៏បានណែនាំឲ្យប្រជាពលរដ្ឋយើងទាំងអស់ដែលទទួលបានអត្តសញ្ញាណប័ណ្ណថ្មីត្រូវរក្សា ឲ្យបានគង់វង្សសម្រាប់បម្រើ ឲ្យសេចក្ដីត្រូវការគ្រប់បែបយ៉ាង ក្នុងការរស់នៅហ្នឹងងាយស្រួលក្នុងការប្រើប្រាស់នៅ ពេលបោះឆ្នោត ។
លោក ផឹក វិជ្ជាវី ប្រជាពលរដ្ឋរស់នៅសង្កាត់ស្ទឹងត្រែង បានសំដែងការសារទរទទួលបានអត្តសញ្ញាណប័ណ្ណគំរូថ្មី ពីព្រោះមានប្រយោជន៍សម្រាប់យើងទាំងអស់គ្នា បានប្រើប្រាស់ស្របច្បាប់នៅក្នុងសង្គម ហើយមានប្រសិទ្ធភាពបង្កលក្ខណៈងាយស្រួល ដល់ការប្រើប្រាស់បំពេញបែបបទផ្សេងៗជាផ្លូវការ ដូចជាការធ្វើបណ្ណ័កម្មសិទ្ធិដីធ្លី ការធ្វើលិខិតស្នាមសំបុត្រអាពាហ៍ពិពាហ៍ ឬការលិខិតឆ្លងដែនជាដើមថ្ងៃនេះយើងបានទទួលសញ្ជាតពិតប្រាកដរបស់យើង យើងត្រូវប្រយ័ត្នទាំងអស់គ្នា ហើយយើងសប្បាយចិត្តណាស់បានអត្តសញ្ញាណបណ្ណ័ថ្មីប្រើប្រាស់៕
