សៀមរាប ៖ នៅរាត្រីម៉ោង២ និង ៤៥នាទីឈានចូលថ្ងៃទី១៨ ខែវិច្ឆិកា ឆ្នាំ២០១៤ មានអគ្គីភ័យមួយកើតឡើង នៅក្លឹប កម្សាន្ត ហ៊ិបហប ស្ថិតនៅទល់មុខនឹងរង្វង់មូលវត្តដំណាក់ សង្កាត់សាលាកំរើក ក្រុង ខេត្តសៀមរាប ត្រូវបានឆ្លងនូវចរន្ត អគ្គិសនី ធ្វើឲ្យឆេះខូចខាតឧបករណ៍ សម្ភារៈនៅក្នុងក្លីបអស់ទាំងស្រុង ព្រមទាំងធ្វើឲ្យមានមនុស្សស្លាប់ និង រងរបួស ទៀតផង ។
តាមការបញ្ជាក់របស់មេការបម្រើការងារនៅក្នុងក្លឹបកម្សាន្តហ៊ីបហបនេះ បានឲ្យដឹងថា នៅវេលាម៉ោង២ ក្លីប នឹងត្រូវបានបញ្ចប់ ហើយក្នុងគ្រានោះក៏មាន ធំខ្លឹនឆ្ងៀមដ៏ចំឡែក ហើយក៏បានធ្វើការបិទម៉ាស៊ីនត្រជាក់ទាំងអស់ហើយ នោះ ក៏នៅតែខ្លឹនឆ្ងៀមនៅដដែល ។
តែមួយសន្ទុះក្រោយមកក៏បានចេញមកខាងក្រៅ ក៏ឃើញមានផ្សែងហុយចេញឡើងនៅលើដំបូល ខ្លួនក៏បានធ្វើការរំដោះភ្ញៀវឲ្យចេញក្រៅ ហើយភ្លើងក៏ចាប់ផ្តើមឆេះពីលើបដានធ្លាក់មក ធ្វើឲ្យ តុ កៅអីសាឡុងពួកឆាបឆេះឡើង ហើយក៏បានទំនាក់ទំនងទៅក្រុមរថយន្តពន្លត់អគ្គីភ័យរបស់កងរាជអាវុធហត្ថខេត្ត នគរបាលខេត្ត មកជួយធ្វើអន្តរាគមន៍ពន្លត់ភ្លាមៗតែម្តង ។
ក្នុងការពន្លត់អគ្គីភ័យនេះទាំងកម្លាំងកងរាជអាវុធហត្ថខេត្ត នគរបាលខេត្ត ក៏បានធ្វើការសហការជាមួយក្រុមពន្លត់ អគ្គីភ័យអាកាសយានដ្ឋានអន្តរជាតិសៀមរាប មកជួយអន្តរាគមន៍ផងដែរ ។ ក្នុងកិច្ចប្រតិបត្តិការពន្លត់អគ្គីភ័យនេះ បានប្រើរថយន្តចំនួន ៦គ្រឿង រថយន្តកងរាជអាវុធហត្ថខេត្ត ៣គ្រឿង នគរបាលខេត្ត ២គ្រឿ និង អាកាសយានដ្ឋានអន្តរ ជាតិសៀមរាប ១គ្រឿង ដោយប្រើប្រាស់ទឹកអស់១៤រថយន្ត ហើយបានគ្រប់គ្រងនិងរលត់អស់ទៅវិញបានទាំងស្រុងនៅវេលា ម៉ោង៥ទៀបភ្លឺផងដែរ ។
តាមការបញ្ជាក់របស់កម្លាំងសមត្ថកិច្ចបានឲ្យដឹងថា ក្នុងហេតុការគ្រោះអគ្គីភ័យនេះបាន សម្លាប់មនុស្ស ចំនួន៥នាក់ ក្នុងនោះមាននារី៣នាក់ជាជនជាតិខ្មែរ បុរសម្នាក់ជាជនជាតិខ្មែរនិងម្នាក់ទៀតបានស្លាប់ជាជនបរទេសភេទប្រុស និង រងរបួសធ្ងន់០២នាក់ ភេទស្រីផងដែរ ។ ទាំងអ្នកស្លាប់ និង រងរបួសនេះ សុទ្ធសឹងជាអ្នកផឹកស្រវឹងជោគជាំ ហើយចូលទៅក្នុងបន្ទប់ទឹក ៕
សូមបញ្ជាក់ផងដែរថា ក្លឹបនេះកន្លងមកធ្លាប់បានធ្វើឲ្យមានមនុស្សស្លាប់ បាត់បងជីវិតរួចម្តងមកហើយ លុះក្រោយមកក៏បានប្តូរមកធ្វើជាក្លឹមកំសាន្តវិញម្តង ទើបានបង្ករឲ្យមានមនុស្សស្លាប់ជាច្រើននាក់បែបនេះ ក៏ដោយសារតែម្ចាស់ក្លឹបកំសាន្ត ពុំមានវិធានការក្នុង ការត្រៀមទទួលនូវគ្រោះអគ្គីភ័យកើតឡើង ថែមទាំងពុំមានផ្លូវសម្រាប់ចេញចូល ក្នុងគ្រាមានអាសន្ន ។ដោយ លោក ខេង ខេមរា
