កម្លាំងប៉ូលិសចរាចរខេត្តបាត់ដំបង បានកសាងសំណុំរឿងបញ្ជួនខ្លួនបុរសម្នាក់ដែលបើករថយន្តដឹកម៉ាស៊ីនច្រូតស្រូវ និងសម្ភារៈផ្សេងៗ ដោយគ្មានប័ណ្ណបើកបរ ខណៈដែលប៉ូលិសចរាចរផ្លូវគោលដៅចេញ មកហៅត្រួតពិនិត្យ ហើយអ្នកបើកបរបានបំបុកបារ៉ាស់ រួចដេញបុកមន្ត្រីប៉ូលិសនៅរង្វង់មូលនាងគង្ហ៊ីង ជាគោលដៅទី១ ហើយបើករត់គេចរហូតដល់គោលដៅទី២ទើបកម្លាំងឃាត់ចាប់បាន ។
ហេតុការណ៏នេះ បានកើតឡើងកាលពីព្រឹកថ្ងៃទី១៦ ខែវិច្ឆិកា ឆ្នាំ២០១៤ នៅចំណុច រង្វង់មួលនាង គង្ហីង ស្ថិតក្នុងភូមិសាលាបាឡាត់ សង្កាត់វត្តគរ ក្រុងបាត់ដំបង ខេត្តបាត់ដំបង។
លោក ហុកហឿត នាយផ្នែកប៉ូលិសចរាចរផ្លូវគោលដៅនៅរង្វង់មូលនាងគង្ហីង បានអោយដឹង ថា មុនពេលកើតហេតុមានរថយន្ត ដឹកម៉ាស៊ីនច្រូតស្រូវនិងសម្ភារៈផ្សេងទៀតបើកបរតាមផ្លូវជាតិ៥ ពីកើត ទៅលិច។
ពេលបើកមកដល់ចំណុចរង្វង់មូលនាងគង្ហីង មន្ត្រីប៉ូលិសចរាចរបានចេញមកហៅ កាក់អោយ ឈប់ ដើម្បីត្រួតពិនិត្យ ប៉ុន្តែអ្នកបើកឡានដឹកម៉ាស៊ីនច្រូតស្រូវនោះមិនឈប់ទេ ថែមទាំងបន្ថែមល្បឿន ដេញបុកមន្ត្រីប៉ូលិស និងបើកបុកប៉ារ៉ាស់បត់ទៅខាងស្តាំដៃទៀត។ ភ្លាមៗនោះ កម្លាំងប៉ូលិសចរាចរបាន ដេញតាម និងទាក់ទង់ទៅគោលដៅទី២នៅខាងមុខចេញស្ទាក់ព្រមទាំងដាក់ឡានពាំផ្លូវទើបចាប់ឃាត់ ខ្លួន អ្នកបើកបរ និងឡានបានតែម្ដង។
បុរសសង្ស័យដែលប៉ូលិសឃាត់ខ្លួនឈ្មោះតូច ឡុងអាយុ៤៦ឆ្នាំមានទីលំនៅភូមិបាក់រនាស់ សង្កាត់ស្វាយរៀង ក្រុង-ខេត្តស្វាយរៀង ជាអ្នកបើកបររថយន្តបង្ក ចំណុះ២,៥តោនពាក់ស្លាកលេខបាត់ដំបង3A1902។បច្ចុប្បន្នបុរសសង្ស័យ និងរថយន្តបង្ករ ត្រូវបានកម្លាំងកសាងសំណុំរឿងបញ្ជូនទៅតុលាកា ដើម្បីចាត់ ការទៅតាមផ្លូវច្បាប់ហើយ៕
