កំពង់ឆ្នាំង៖ ប្រារព្វទិវាស្រែបង្ហាញបង្គំបច្ចេកទេសប្រពលវប្បកម្មស្រូវបានធ្វើឡើងនៅព្រឹកថ្ងៃទី១៦ ខែវិច្ឆិកា ឆ្នាំ២០១៤ នៅ ភូមិសាលាលេខ៥ ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង ក្រោមអធិបតីភាពលោក សូរ ខនឬទ្ឋីគុណ ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានក្រសួង
កសិកម្ម ដែលរៀបចំឡើងដោយមន្ទីរកសិកម្មខេត្ត និងមានការអញ្ជើញចូលរួមពីលោក អភិបាលរងស្រុក មន្ត្រីរាជការ តំណាងកសិករមកពី៣ឃុំ កាយឬទ្ឋិ និងកាកបាទក្រហមចូលរួមសរុប២០០នាក់ ។ 
លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំងមានប្រសាសថាៈ ស្រែស្រូវដែលបានបង្ហាញនិងអោយច្រូតកាត់នៅពេលបន្តិចទៀតនេះ គឺធ្វើឡើងតាមប្រពន្ឋ័ប្រពលវប្បកម្មទាំងអស់ ចាប់តាំង ពីធ្វើដី ភ្ជួររាស់ សាប ដក ស្ទូង ការថែទាំរហូតដល់ពេលច្រូតកាត់ទាំងអស់។ នៅព្រឹកនេះផងដែរ មាន កសិករមក ពីឃុំចំនួន៣គឺ ឃុំច្រេស ឃុំអូរឬស្សី និងឃុំឈូកស ក្នុងមួយឃុំមានកសិករចំនួន៣០ នាក់ បានមកចូលរួមពិនិត្យស្រូវប្រពលវប្បកម្មនេះ ។
លោកប្រធានមន្ទីរកសិកម្មក៏បានរៀបរាប់និងបង្ហាញ ពីវីធីធ្វើស្រូវប្រពលវប្បកម្ម ដូចជា ការធ្វើថ្នាលសំណាប ការដក ស្ទូង ពីរបៀបស្ទូងជាជួរ ពីចំនួនដើមស្រូវដែលត្រូវស្ទូងក្នុងមួយគុម្ពៗផងដែរមុននិងនាំគ្នាទៅពិនិត្យ និងច្រូតស្រូវក្នុងស្រែប្រពលវប្បកម្ម ។
ក្នុងន័យនេះ លោកចង់អោយប្រជាកសិករផ្លាស់ប្តូរពីរបៀបស្ទូងស្រូវច្រើនដើមក្នុងមួយគុម្ព មកស្ទូងស្រូវមួយដើមក្នុងមួយគុម្ពវិញនិងប្តូរពីរបៀបស្ទូង ស្រូវគ្មានរបៀប មកស្ទូងជាជួរវិញ ។ការធ្វើរបៀបនេះ គឺយើងចំណេញទាំងពូជ និងធ្វើអោយដើមស្រូវទូលាយគ្មានខ្យល់អាកាសល្អ និងអោយដើមស្រូវថ្លោសល្អទៀតផង ។ ចំណែកឯដើមស្រូវជាជួរគឺងាយស្រួលក្នុងការធ្វើនិងដកស្មៅ ចេញពីគុម្ពស្រូវផងដែរ ។
ស្រូវប្រពលវប្បកម្មក៏ទាមទារអោយកសិករធ្វើដីស្រែអោយបានរៀបស្មើ មុននឹងស្ទូង ព្រោះងាយនិងបញ្ចូលទឹកអោយដំណាំស្រូវលូតលាស់ស្មើគ្នា។ក្រៅពីនោះពូជស្រូវក៏ត្រូវបានធានាមានគុណភាព ហើយតម្លៃទីផ្សារក៏ខ្ពស់ជាងស្រូវធម្មតា និងងាយរកទីផ្សារទៀតផង។ 
ក្រោយពីបកស្រាយពន្យល់នូវអត្ថប្រយោជន៏ ពីការធ្វើស្រូវប្រពលវប្បកម្មរួចមក លោកប្រធាន មន្ទីរ និងគណៈអធិបតី បានដឹកនាំកសិករ កាយឬទ្ឋិ និងកាកបាទក្រហមចុះទៅតាមស្រែដើម្បីចូលរួមច្រូតស្រូវជាមួយប្រជាកសិករក្នុងមូលដ្ឋានដោយក្តីសប្បាយរីករាយក្នុងសាមគ្គីយ៉ងស្អិតរមួត៕
