បន្ទាយមានជ័យៈ ដោយសារតែមិនពាក់មួកសុវត្ថិភាព និងបើកជែងក្នុងល្បឿនលឿនយុវជន២នាក់បានរងរបួសធ្ងន់បន្ទាប់ពីបើកម៉ូតូទៅប៉ះនិងដៃម៉ូតូមួយទៀតលើកំណាត់ផ្លូវជាតិលេខ៥ ត្រង់ចំនុចផ្លូវចុះភូមិគាប សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ កាលពីយប់ម៉ោង៧ និង១៥នាទីថ្ងៃទី១៧ វិច្ឆិកា ២០១៤ ។
តាមសាក្សីពីកន្លែងកើតហេតុក៏បានអោយដឹងថា មុនពេលកើតហេតុគេឃើញមានម៉ូតូមួយគ្រឿងម៉ាក ហុងដា C125 ជិះគ្នា២នាក់បានបើកបរពីកើតទៅលិចលុះដល់ចំនុចកើតហេតុខាងលើ ក៏បានទៅប៉ះនិងដៃម៉ូតូមួយគ្រឿងទៀតម៉ាក ហុងដា C125 ដូចគ្នា ដែលបើកពីខាងមុខក្នុងទិសដៅស្របគ្នាបណ្តាលអោយដួលទាំងសងខាង ។ តែក្នុងហេតុការណ៍នេះអ្នកបើកម៉ូតូឡើងជែងរងរបួសធ្ងន់ទាំង២នាក់ ដោយម្នាក់ដែលជាអ្នកបើកបានរងរបួសត្រង់ក្បាលនិងហូរឈាមយ៉ាងច្រើនបណ្តាលអោយសន្លប់ ឯអ្នកជិះពីក្រោយបានរងរបួសត្រង់ជើងស្តាំង និងផុងចិញ្ចើមខាងឆ្វេង ។
ដោយឡែកម៉ូតូមួយគ្រឿងទៀតដែលជិះតែម្នាក់ឯង ក្រោយកើតហេតុដួលរងរបួសស្រាលក៏លើកម៉ូតូបើកចេញទៅបាត់ ។ក្រោយកើតហេតុភ្លាមៗ សមត្ថកិច្ចនគរបាលនៃស្នងការនគរបាលខេត្តបន្ទាយមានជ័យបានទៅដល់ហើយនាំយកជនរងគ្រោះទាំងពីដែលមានឈ្មោះរួន សារ៉ាត់ ភេទប្រុស អាយុ២០ឆ្នាំ នៅសាលាក្រហម ជាអ្នកបើកបរម៉ូតូc125ពាក់ស្លាកលេខបន្ទាយមានជ័យ2F7647និងឈ្មោះសៀង យ៉ស ភេទប្រុស អាយុ១៦ឆ្នាំ នៅសាលាក្រហមដូចគ្នា ដឹងតាមរថយន្តសង្គ្រោះទៅកាន់មន្ទីរពេទ្យ ។
លោក សន គឹមសូគ៌ នាយការិយាល័យនគរបាលចរាចរខេត្តបន្ទាយមានជ័យបានបញ្ចាក់អោយដឹងថា មូលហេតុដែលនាំអោយជនរងគ្រោះរងរបួសធ្ងន់ក្នុងហេតុការណ៍នេះ គឺដោយសារតែជនរងគ្រោះបើកម៉ូតូក្នុងល្បឿនលឿង និងមិនពាក់មួកសុវត្ថិភាព ហើយក៍ទៅប៉ះនិងដៃម៉ូតូមួយគ្រឿងទៀត៕
