កំពង់ឆ្នាំង៖ព្រះសង្ឃ១អង្គបានរងរបួសធ្ងន់ធ្ងរដាច់សាច់ដាច់ស្បែកបែកឆ្អឹងងោងត្រគាកពិបាក
ជួយសង្គ្រោះ និង២អង្គទៀតរបួសស្រាល នៅក្នុងករណីអារកាត់ធុងសាំងចំណុះ២២០លីត្រផ្ទុះដូចគ្រាប់បែក។ហេតុការណ៍នេះបានកើតឡើងនៅវេលាម៉ោង៦និង៣០នាទីយប់ថ្ងៃទី១៧ ខែវិច្ឆិកា ឆ្នាំ២០១៤នៅក្នុងវត្តអម្ពវន្ត័ហៅវត្តថ្មី ស្ថិតក្នុងភូមិកំពង់បឹង ឃុំកំពង់ហៅ ស្រុកកំពង់លែង។
ព្រះសង្ឃគង់ក្នុងវត្តថ្មីស្ថិតនៅក្នុងហេតុការណ៍ខាងលើនេះដែលបានបញ្ជូនព្រះសង្ឃរងរបួសធ្ងន់មកសង្គ្រោះនៅក្នុងមន្ទីរពេទ្យខេត្ត បានមានសង្ឃដីកាអោយដឹងថា៖ មុនពេលកើតហេតុលោកគ្រូចៅអធិការវត្តព្រះនាម អ៊ឹម សុជាតិ ព្រះជន្ម៤៥វស្សា បានយកធុងសាំងចំណុះ២២០លីត្រដែលលោកអោយគណៈកម្មការវត្តទិញមកពីក្រុងកំពង់ឆ្នាំងមកអារកាត់ជា២បំណងធ្វើជាធុងទុកដាក់សំរាមនៅក្នុងវត្ត។
ក្នុងពេលនោះលោកគ្រូចៅអធិការវត្តផ្ទាល់បានយកម៉ូទ័រកាត់ដែកមកអារកាត់ធុងសាំងផ្ទា
ល់ព្រះហស្ថព្រះអង្គដោយមិនបានបើកគំរបធុងសាំងខាងលើឡើយ នៅពេលអារធុងសាំងបានតែបន្តិចក៏ស្រាប់តែធុងសាំងនោះផ្ទុះឡើងយ៉ាងខ្លាំងដូចគ្រាប់បែក បណ្តាលអោយសន្ទះធុងសាំងទាំងមូលខាងលើរបើកឡើងហោះទៅបុកចំព្រះសង្ឃព្រះនាម ហឹម ឆារ៉ាន់ ព្រះជន្ម១២វស្សាដែលឈរនៅចម្ងាយ៤ម៉ែត្រ របួសធ្ងន់ដាច់ស្បែកដាច់សាច់និងបែកឆ្អឹងងោងត្រគាតខាងឆ្វេងជាប់និងសន្ទះធុងសាំង ចំណែកលោកគ្រូចៅអធិការវត្ត និងព្រះសង្ឃព្រះនាម លោកធឿន ព្រះជន្ម១៧វស្សា រងរបួសស្រាល។
ក្រោយពេលកើតហេតុព្រះសង្ឃនៅក្នុងវត្ត និងប្រជាពលរដ្ឋនៅក្បែរវត្តបាននាំគ្នាដឹកបញ្ជូនព្រះសង្ឃរងរបួសធ្ងន់មកដល់មន្ទីរពេទ្យខេត្តនៅវេលាម៉ោង៧និង៣០នាទីយប់។ចំណែកព្រះសង្ឃរងរបួសស្រាលត្រូវបានដឹកបញ្ជូន ទៅព្យាបាលរបួសនៅផ្ទះគ្រូពេទ្យឯកជននៅក្នុងស្រុកកំពង់លែង។
ស្ត្រីឈ្មោះ ព្រីង សាន អាយុ៤១ឆ្នាំ រស់នៅក្នុងភូមិឃុំកើតហេតុខាងលើជាម្តាយបង្កើត របស់ព្រះសង្ឃរងរបួសធ្ងន់បាននិយាយអោយដឹងថា៖គាត់ជាស្ត្រីមេម៉ាយ ប្តីបានស្លាប់ចោលដោយសារមានជម្ងឺគ្មានលុយព្យាបាល គាត់មានកូន៣នាក់ លោកកូនដែលរបួសធ្ងន់ខាងលើនេះជាកូនទី២ លោកបួសបាន២វស្សាហើយ ដោយសារតែគាត់ជាជនក្រីក្រទើបលោកបួសដើម្បីបានរៀនសូត្រក្នុងវត្ត ចំណែកគាត់សព្វថ្ងៃប្រកបមុខរបរលក់ដូរនំនែកបន្តិចបន្តួចបានមួយថ្ងៃសំរាប់ហូប១ថ្ងៃតែប៉ុណ្ណោះ ក្នុងពេលកូនរបួសធ្ងន់នេះគាត់គ្មានលុយសំរាប់ព្យាបាលទេ។
ក្រុមគ្រូពេទ្យបន្ទប់វះនៃមន្ទីរពេទ្យខេត្តបានអោយដឹងថា៖របួសរបស់លោកសង្ឃតូចនេះ
ធ្ងន់ធ្ងរមុខរបួសគ្មានស្បែកដេរផ្ចិតឡើងវិញទេ ឆ្អឹងងោងត្រគាកបែកខ្ទេច គ្រូពេទ្យខេត្តនឹងបញ្ជូនលោកទៅកាន់មន្ទីរពេទ្យក្រុងភ្នំពេញជួយសង្គ្រោះជាបន្តទៀតព្រោះសភាពរបួសធ្ងន់ធ្ងរ៕
