កំពុងធំ: នៅរសៀលថ្ងៃទី១ ខែសីហា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី នាំយកអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ទៅឧបត្ថម្ភជូនគ្រួសារកងទ័ព ចំនួន៣ 
គ្រួសារនៅអង្គភាពកងពលតូចលេខ ៩ កងពលធំលេខ៣ ដែលប្រចាំការ ការពារបូរណភាពទឹកដីនៅតំបន់មុំបី ព្រមទាំងប្រជាពលរដ្ឋចំនួន២ គ្រួសារផ្សេងទៀត ដែលបានភៀសសឹកមកពីស្រុកជាំក្សាន្ត ខេត្តព្រះវិហារ មកស្នាក់នៅភូមិកំណើត ស្ថិតនៅក្នុងភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។
ក្រុមគ្រួសារកងទ័ព ដែលបានរស់នៅជាមួយស្វាមីក្នុងទីតាំងឈរជើងរបស់អង្គភាពនាពេលកន្លងទៅ បានភៀសខ្លួន មកកាន់ស្រុកកំណើតបណ្ដោះអាសន្ន បានបញ្ជាក់ថា នៅថ្ងៃទី២៤ ខែកក្កដា ឆ្នាំ២០២៥ កងទ័ពឈ្លានពានរបស់ប្រទេសថៃ បានបាញ់សន្ធាប់ ដោយអាវុធធុនធ្ងន់មកលើចំណុចឈរជើង របស់កងទ័ពនិងទឹកដីរបស់កម្ពុជា ។ ដោយទ្រាំមិនបាននិងការបាញ់ផ្លោង និងងការប្រើប្រាស់កម្លាំងថ្មើរជើង វាយលុកឈ្លានពានជាបន្តបន្ទាប់រៀងរាល់ថ្ងៃ ស្វាមីគាត់ បានសម្រេចបញ្ជូនភរិយា និងកូនចៅទាំងអស់មកកាន់ស្រុកកំណើតវិញជាបណ្ដោះអាសន្ន ដើម្បីធានាសុវត្ថិភាព ។ ហើយស្វាមីរបស់គាត់នៅបន្តកាន់អាវុធវាយទប់ទល់ជាមួយការឈ្លានពានពីពួកចោរសៀម ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ និងការដឹងគុណ ចំពោះវីរភាពយុទ្ធជនដ៏អង់អាចក្លាហានរបស់យើង ដែលបានតស៊ូស្វិតស្វាញក្រាញននាល ដើម្បីការពារជាតិ ការពារបូរណភាពទឹកដី និងការពារប្រជាជនយើង អំពីការរំលោភឈ្លានពានដ៏ឃោឃៅព្រៃផ្សៃរបស់ពួកទាហានសៀម មកលើទឹកដីកម្ពុជា ។
ជាមួយនោះដែរឧត្តមសេនីយ៍ទោ សោម ស៊ុន ក៏បានគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ដែលបានខិតខំស្វែងរកសន្តិភាព បញ្ឈប់ការបាញ់គ្នាជាបន្ទាន់ តាមរយៈការជួយអន្តរាគមន៍ពីប្រធានាធិបតីអាមេរិក និងប្រធានាធិបតីនៃប្រទេសម៉ាឡេស៊ី ដែលជាសហប្រធានប្ដូរវេនរបស់អាស៊ាន ព្រមទាំងថ្លៃងអំណរគុណចំពោះសេនានុព័ន្ធយោធាបណ្ដាប្រទេសនានា ដែលបានអញ្ជើញទាន់ពេលវេលាមកត្រួតពិនិត្យការឈប់បាញ់នៅតាមព្រំដែនកម្ពុជាថៃ។
នៅក្នុងឱកាសនេះឧត្តមសេនីយ៍ទោ សោម ស៊ុន ក៏បានប្រគល់ជូនស្បៀងអាហារគ្រឿងឧបភោគបរិភោគភេសជ្ជៈ ថ្នាំពេទ្យ និងភួយដណ្ដប់ ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់ក្រុមគ្រួសារវីរៈយុទ្ធជន និងប្រជាពលរដ្ឋភៀសសឹក ទាំង៥គ្រួសារផងដែរ។
លោក សេង វុធ ប្រធានភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ តំណាងឲ្យគ្រួសារវីរយុទ្ធជនទាំងបីគ្រួសារ និងប្រជាពលរដ្ឋភៀសសឹកចំនួន២គ្រួសារ បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែន សម្ដេចមហាបវរធិបតី ហ៊ុន ម៉ាណែត ដែលបានដឹកនាំបញ្ជាកម្លាំងការពារទប់ទល់ការឈ្លានពានពីទាហានសៀម នឹងបានសម្របសម្រួលជាមួយប្រធានាធិបតីសហរដ្ឋអាមេរិក និងម៉ាឡេស៊ី ដើម្បីបញ្ចប់ការឈ្លានពានមកលើទឹកដីកម្ពុជា៕
