ខេត្តបន្ទាយមានជ័យជនសង្ស័យចំនួន៤នាក់ត្រូវបានកម្លាំងនគរបាលបង្ក្រាបគ្រឿងញៀនខេត្តបន្ទាយមានជ័យបើកប្រតិបត្តិការតាមចាប់បានជាបន្តបន្ទាប់និងដកហូតវត្ថុតាងជាគ្រឿងញៀនព្រមទាំងម៉ូតូផងដែរ។ហេតុការណ៍ចុះបង្ក្រាបគ្រឿងញៀននោះកើតឡើងកាលពីល្ងាចថ្ងៃទី១៧ ខែវិច្ឆិកា ឆ្នាំ២០១៤ ។ មន្ត្រីនគបាលបង្ក្រាបគ្រឿងញៀន
ខេត្តបន្ទាយមានជ័យបានឲ្យដឹងថា ប្រតិបត្តិការ ខាងលើនេះ បានធ្វើឡើងក្រោមការបញ្ជាផ្ទាល់ពីសំណាក់ ស្នងការនគរបាលខេត្តលោកឧត្តមសេនីយ៍ត្រី អាត់ ខែម ធ្វើយ៉ាងណាតាមចាប់ជនសង្ស័យដែលជាប់ពាក់ព័ន្ធគ្រឿងញៀន យ៉ាងសកម្មទាំងនេះឲ្យអស់ ។
មន្ត្រីនគរបាលដដែលបានបន្តទៀតថា ក្រោយធ្វើការ ស្រាវជ្រាវតាមជំនាញ របស់ខ្លួនកាល ពី រសៀលថ្ងៃទី១៧ ខែវិច្ឆិកា ឆ្នាំ២០១៤ មេក្លោងខាងចែកចាយថ្នាំញៀនម្នាក់មាន ឈ្មោះ រ៉ា ត្រូវបានចាប់ខ្លួន និងដកហូតថ្នាំញៀន មួយចំនួន។ ការសួរនាំជនសង្ស័យរូបនេះ បានឆ្លើយប្រាប់ពីបក្សពួកគេរួចហើយកម្លាំងនគរបាលតាមចាប់ ជនសង្ស័យ ម្នាក់ទៀត ដែលទទួលទិញ ថ្នាំញៀនពីឈ្មោះ រ៉ា និង ដកហូតថ្នាំញៀនមួយចំនួន ព្រមទាំង ម៉ូតូមួយគ្រឿងផងដែរ
ក្រោយការសួរនាំជនសង្ស័យរូបនេះបានឆ្លើយសារភាពទៀតថាខ្លួននៅមានបក្សពួកទៀតទើបកម្លាំងនគរបាលបានបន្តស្រាវជ្រាវហើយឈានទៅដល់ការចាប់ខ្លួនជនសង្ស័យបាន២នាក់ផ្សេងទៀត ដែលបានទិញថ្នាំញៀន ពីជនសង្ស័យខាងលើ។ ដូច្នេះជន សង្ស័យចំនួន៤នាក់ ត្រូវបានកម្លាំង សមត្ថកិច្ចចាប់ខ្លួនជាបន្តបន្ទាប់ដែលជាប់ពាក់ព័ន្ធនិងសកម្មភាពចែកចាយ និងប្រើប្រាស់គ្រឿងញៀន ។
មន្ត្រីនគរបាល បានបញ្ជាក់ថា ជនសង្ស័យទាំងនេះ នៅពេលធ្វើតេស្ត ទឹក នោមរួចមក បង្ហាញថា សុទ្ធតែមានសារ ធាតុញៀនទាំងអស់ ។បច្ចុប្បន្ន ជនសង្ស័យទាំង៤នាក់ ស្ថិតក្រោមការសាកសួរ និងកសាងសំណុំរឿងបញ្ជូន ទៅកាន់តុលាការ ដើម្បីចាត់ការតាមផ្លូវច្បាប់។លោកអាត់ ខែម បានបញ្ជាក់ថា លោកបានបញ្ជា ឲ្យកម្លាំង នគរបាលជំនាញ ការិយាល័យ ប្រឆាំងគ្រឿងញៀន និងកម្លាំងនគរបាល តាមបណ្តាស្រុករួម សហការគ្នា បន្តទៀតដើម្បីបើកការ ស្រាវជ្រាវ តាមចាប់មុខសញ្ញាចែកចាញ និងប្រើប្រាស់ គ្រឿងញៀនឲ្យអស់ពីព្រោះបញ្ហាគ្រឿងញៀននេះ វាបានធ្វើឲ្យប៉ះពាល់ ដល់សង្គមយ៉ាងធ្ងន់ធ្ងរនិងរីកសាយភាយកាន់តែខ្លាំងឡើងៗ៕
