អំពើហិង្សានៅក្នុងវង់ផឹកស៊ីមួយ បង្កឱ្យបុរសម្នាក់រងរបួសធ្ងន់ ហើយជនដៃដល់មិនទាន់ត្រូវបាន សមត្ថកិច្ច ឃាត់ខ្លួននៅឡើយទេ ។ ករណីហិង្សា រវាងអ្នកផឹកស៊ីខាងលើនេះ បានកើតឡើងកាលពីវេលាម៉ោង៥ល្ងាច ស្ថិតនៅភូមិអង្គតាមោក ឃុំប្រសូត ស្រុកស្វាយទាប ខេត្ដ
ស្វាយរៀង ។ នគរបាលប៉ុស្ដិ៍រដ្ឋបាលឃុំប្រសូត បានឱ្យដឹងថា ជនរងគ្រោះឈ្មោះ ជូ សុខខឿន អាយុ២៧ឆ្នាំ ជាកម្មករសំណង់ រស់នៅភូមិ-ឃុំកើតហេតុខាងលើ បានរងរបួសបែកក្បាល ។ 
ជនរងគ្រោះបានរៀបរាប់ប្រាប់នគរបាលថា មុនពេលកើតហេតុ មានបុរសឈ្មោះ ខា អាយុ៣៧ឆ្នាំ មានទីលំនៅក្បែរភូមិជាមួយគ្នា បានហៅរូបគេទៅផឹកស៊ី នៅផ្ទះបងប្អូនជីដូនមួយ ដោយមានគ្នាទាំងអស់៤នាក់មានឈ្មោះ យួន ភេទប្រុស អាយុ២០ឆ្នាំ និងឈ្មោះ កេត ភេទប្រុស អាយុ២៥ឆ្នាំ ។
នៅពេលកំពុងផឹកស៊ី បានប្រមាណជាង១ម៉ោង ពេលនោះ ឈ្មោះ យួន ជាជនបង្ក បានក្លែមសាច់រហូត ដោយមិនសូវផឹកស្រានោះទេ ។ ពេលនោះរូបគេបាននិយាយ ទៅកាន់ឈ្មោះ យួន បែបលេងសើចប៉ុណ្ណោះថា “មកផឹក ឬមកស៊ីសាច់ក្លែម?” ។ បន្ទាប់មកជនបង្ក ក៏ឆ្លើយតបវិញថា “ផឹកគឺស៊ីហើយ ចឹងទិញសាច់ក្លែមមកធ្វើអី!” ។ ជនរងគ្រោះបានបន្ដថា ការសួរចុះ សួរឡើងនេះ គឺខ្លួនមានបំណងជជែកគ្នាលេងសើចប៉ុណ្ណោះ តែមិនដូចអ្វីដែលជនបង្កគិតនោះទេ ។
បន្ទាប់មកឈ្មោះ ខា ក៏បានឆ្លើយតបវិញថា ផឹកស៊ីចាំបាច់និយាយច្រើនម្ល៉េះនាំតែឈ្លោះគ្នាទេ ។ ឈ្មោះ ខា និយាយមិនទាន់ចប់ផង ឈ្មោះ យួន ក៏បានស្ទុះទៅយកចាន ដាក់សាច់ក្លែមគប់មកលើក្បាលខ្លួន មិនតែប៉ុណ្ណោះ បានយកដំបង វាយថែមទៀត ។ ភ្លាមៗនោះ ឈ្មោះ កេត ក៏បានទាញយកដែកស្រួច ចាក់ចំកំភួនដៃខាងស្ដាំ របស់ខ្លួនបណ្ដាលឱ្យរងរបួសធ្ងន់ផងដែរ ហើយត្រូវបានគេបញ្ជូនទៅ សង្គ្រោះ នៅមន្ទីពេទ្យបង្អែកខេត្ដ ។ 
ប្រភពព័ត៌មាន នៅកន្លែងកើតហេតុ បានឱ្យដឹងថា សមត្ថកិច្ចនៅពុំទាន់បានឃាត់ខ្លួនជនដៃដល់នៅឡើយទេ ទំនងជាសមត្ថកិច្ច រង់ចាំពាក្យបណ្ដឹងរបស់ជនរងគ្រោះសិន ។ ទោះជាយ៉ាងណាក៏ដោយ ប្រជាពលរដ្ឋ បានលើកឡើងថា សមត្ថកិច្ចមិនគួររង់ចាំពាក្យបណ្ដឹង ជនរងគ្រោះនោះទេ ឱ្យតែបទល្មើសជាក់ស្ដែង សមត្ថកិច្ចត្រូវតែមានវិធានការ ចាប់ខ្លួនជនបង្ករបួសស្នាមនោះភ្លាមៗ ៕
