បុរសពិការជើងទាំងសងខាង បើកម៉ូតូម៉ាកហុងដា សេ125 ពណ៌កណ្ដុរប្រមេះ ពាក់ផ្លាកលេខ ប.6731.ភ.ព1 លើកំណាត់ផ្លូវជាតិលេខ៥ លឿនដូចហោះ ក៏បានជ្រុលចង្កូតទៅបុក លោកតាដើរឆ្លងផ្លូវ បណ្ដាលឱ្យស្លាប់ម្នាក់ នឹងរងរបួសធ្ងន់២នាក់ ។
ហេតុការណ៍គ្រោះថ្នាក់ ចរាចរណ៍នេះ បានកើតឡើង កាលពីវេលាម៉ោង៥និង១០នាទីល្ងាច លើកំណាត់ផ្លូវជាតិលេខ៥ ត្រង់ចំណុចលក់សំបុត្ររថយន្ដក្រុង ក្រុមហ៊ុនកាពីតូល ទល់មុខភោជនីយដ្ឋាន ថ្មកែវ ស្ថិតក្នុងភូមិពោធិ៍តាគួយ សង្កាត់លលកស ក្រុង-ខេត្ដពោធិ៍សាត់ ។
ប្រភពនៅកន្លែងកើតហេតុ បានឲ្យដឹងថា បុរសពិការជើងទាំងពីរនោះឈ្មោះ មាន សឿ ហៅ ជឹង ភេទប្រុស អាយុ៣១ឆ្នាំ និងអ្នករួមដំណើរឈ្មោះ សៅ រ៉ាត់ ភេទប្រុស អាយុ៣១ឆ្នាំដូចគ្នា អ្នកទាំង២នាក់មានទីលំនៅភូមិ-សង្កាត់រលាប ក្រុង-ខេត្ដពោធិ៍សាត់ អ្នកទាំងពីររបួសធ្ងន់ដូចគ្នា ។ 
ប្រភពបន្ដទៀតថា គេឃើញអ្នកទាំងពីរ ជិះម៉ូតូជាមួយគ្នាយ៉ាងលឿន ទំនងដូចជាស្រវឹងខ្លាំង លុះមកដល់ចំណុចកើតហេតុខាងលើ ក៏ជ្រុលចង្កូតទៅបុកលោកតា កំពុងដើរឆ្លងផ្លូវពេញទំហឹង ត្រូវគេឌុបតាមម៉ូតូ យកទៅមន្ទីរពេទ្យបង្អែកខេត្ដភ្លាមៗ តែត្រូវបានដាច់ខ្យល់ស្លាប់ភ្លាមៗផងដែរ ។
លោកតាដែលបានស្លាប់ មានឈ្មោះ តាំង ឆែ អាយុ៥៨ឆ្នាំ មានទីលំនៅភូមិ-ឃុំកើតហេតុ ។ ក្រោយពេលកើតហេតុ ត្រូវនគរបាលក្រុងពោធិ៍សាត់ ចុះមកធ្វើការវាស់វែង និងបានយកម៉ូតូ ទៅរក្សាទុក រងចាំការដោះស្រាយគ្នាតាមផ្លូវច្បាប់ ៕
