សៀមរាប : បុរសជាជនសង្ស័យម្នាក់នេះមានឈ្មោះ សួយ ពៅ អាយុ៣៥ ឆ្នាំ មានស្រុកកំណើតនៅខេត្តបន្ទាយមានជ័យត្រូវបានកម្លាំងនគរបាលស្រុកវ៉ារិនខេត្តសៀមរាបធ្វើការចាប់ឃាត់ខ្លួនបានកាលពីព្រឹកថ្ងៃទី១៩ខែវិច្ឆិកានេះ ។លោក វរសេនីយ៍ត្រី ណុប សារ៉ាក់ អធិការនគរបាលស្រុកវ៉ារិន
ខេត្តសៀមរាប បានអោយដឹងថា ដោយអនុវត្តក្រោមការយកចិត្តទុកដាក់ខ្ពស់ជាប្រចាំពីសំណាក់ លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ក៏ដូចជាដើម្បីធ្វើអោយការអនុវត្តនូវគោលនយោបាយភូមិ ឃុំ មានសុវត្ថិភាពអោយកាន់តែមានប្រសិទ្ធភាពនោះ ។
ជាក់ស្តែងជនសង្ស័យម្នាក់នេះបន្ទាប់ពីគេតែងតែបានធ្វើសកម្មភាពកាច់សោ ក ម៉ូតូ យ៉ាងសកម្មនៅក្នុងខេត្តបន្ទាយមានជ័យដែលជាស្រុកកំណើតរបស់ខ្លួនរួចរត់គេចមកសម្ងំលាក់ខ្លួននៅក្នុងទឹកដីស្រុកវ៉ារិនក៏ត្រូវបានសមត្ថកិច្ចជំនាញបន្តនីតិវិធីតាមដានស្រាវជ្រាវនិងឃានដល់ការចាប់ឃាត់ខ្លួនបានតែម្តង ។
លោក វរសេនីយ៍ត្រី ណុប សារ៉ាក់ បានបន្តអោយដឹងទៀតថាក្នុងកិច្ចចុះប្រតិបត្តិការណ៍ខាងលើនេះកម្លាំងសមត្ថកិច្ចយើងបានធ្វើការដកហូតបាននូវវត្ថុតាងពីជនសង្ស័យនូវម៉ូតូសង់ពណ៍ខ្មៅសេរីឆ្នាំ ២០០៨ មួយគ្រឿង និង ឩបករណ៍សម្រាប់កាច់សោ ក ម៉ូតូ មួយចំនួនទៀតផងដែរ ។ បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកំពុងតែចំណាត់ការទៅតាមនីតិវិធីជាបន្ត ៕ដោយ លោក ខេង ខេមរា
