កំពង់ធំៈ ក្រោយពីទូរទស្សន៍ និងសារពត៌មានក្នុងស្រុកបានធ្វើការចុះផ្សាយ ពីសិប្បកម្មដុះស្លែរដែលហ៊ានដាក់ទីតាំងស្ថិតនៅក្នុងព្រៃឡង់ត៍ ត្រង់ចំនុចខាងលិចអូឡង់ត៍ ឃុំដងកាំបិត ស្រុកសណ្តាន់ ខេត្តកំពង់ធំ ត្រូវបានលោក អ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បញ្ជារឲ្យលោក សាយ ណូរ៉ា ព្រះរាជអាជ្ញារង ដឹកនាំកម្លាំង ចុះបង្ក្រាបនៅថ្ងៃទី ១៩ ខែ វិឆ្ឆិកា ឆ្នាំ ២០១៤ ។
កម្លាំងសហប្រតិបត្តិការចុះបង្ក្រាបសិប្បកម្មស្ថិតនៅក្នុងព្រៃឡង់ត៍នេះ ដោយមានការចូលរួមពីសំណាក់លោក វរៈសេនីយ៍ទោ អ៊ួង ម៉ូលី អធិការស្រុកសណ្តាន់និងកម្លាំងនគរបាលខេត្ត ព្រមទាំងមន្ត្រីក្រោមឳវាទសរុប ១២នាក់ លោក អនុសេនីយ៍ទោ អៀន ចិន ព្រមទាំងកម្លាំងចំណុះឲ្យតំបន់ប្រតិបត្តិការសឹករងកំពង់ធំ អង្គភាពវរៈសេនាតូចលេខ១ចំនួន១១ នាក់ និង កម្លាំងកងរាជអាវុធហត្ថស្រុកសណ្តាន់ ដឹកនាំដោយលោក អនុសេនីយ៍ឯក អៀង អាង និងមន្ត្រីចំនួន ៥នាក់និងលោក សៅ វណ្ណី នាយផ្នែករដ្ឋបាលព្រៃឈើសណ្តាន់ និងនាយសង្កាត់រដ្ឋបាលព្រៃឈើសណ្តាន់ កម្លាំងសរុបមាន ៣៥នាក់ ។
សកម្មភាពនៃកាបង្ក្រាបរោងសិប្បកម្ម ដែលបានលួចលាក់ធ្វើសកម្មភាពខុសច្បាប់ ស្ថិតនៅក្នុងព្រៃឡង់ត៍ លោក ព្រះរាជអាជ្ញាខេត្តកំពង់ធំ បានធ្វើការឃាត់ខ្លួនម្ចាស់សិប្បកម្មចំនួន ២នាក់ ទី១ ឈ្មោះ អ្នកស្រី យិន ណាត ភេទ ស្រី រស់នៅខេត្តកំពង់ចាម បច្ចុប្បន្នបានបើកសិប្បកម្មខុសច្បាប់នៅទីតាំងខាងលើ ទី២ ឈ្មោះ.. យិម ភារុន ភេទ ស្រី ត្រូវជាប្រពន្ឋលោក ឆេង រស់នៅខេត្តព្រៃវែង។
ចំណែកសកម្មភាពនៃការចុះបង្ក្រាបទីតាំងសិប្បកម្មខាងលើ ដោយសារតែចម្ងាយផ្លូវ ឆ្ងាយពីទីរួមខេត្តកំពង់ធំ ប្រមាណ១៦០ គ.ម និងផ្លូវមានការពិបាកក្នុងការធ្វើដំណើរ ជាហេតុបណ្តាលឲ្យសកម្មភាពបង្ក្រាប មិនអាចរឹបអូសម៉ាស៊ីន និងវត្ថុតាងមួយចំនួន ដោយសារតែម្ចាស់សិប្បកម្មដឹងខ្លួនទាន់ ក៏បាននាំកម្មករដឹក ម៉ាស៊ីន និងសម្ភារៈសិប្បកម្មចេញពីទីតាំងសិប្បកម្ម មុនពេលសមត្ថកិច្ចចូលទៅដល់ ។
លោក សាយ ណូរ៉ា ព្រះរាជអាជ្ញារង ព្រមទាំងកម្លាំងសហការទាំងអស់ បានខិតខំយ៉ាងយកចិត្តទុកដាក់ ក្នុង ការចុះរុករកក្នុងព្រៃដើម្បីស្រាវជ្រាវរកវត្ថុតាងដែលម្ចាស់សិប្បកម្មនាំយកទៅលាក់ទុកក្នុងព្រៃបានចំនួន ២កន្លែងផងដែរ សម្រាប់វត្ថុតាងមានឈើប្រមាណជាង ៤ម៉ែត្រគូប ត្រូវបានលោក សៅ វណ្ណី នាយផ្នែករដ្ឋបាលព្រៃ ឈើសណ្តាន់ នាំយក
រថយន្តបុកសឺរ ដឹកយកមករក្សាទុកនៅផ្នែករដ្ឋបាលព្រៃឈើសណ្តាន់ រីឯរោងសិប្បកម្ម ត្រូវបានលោក សាយ ណូរ៉ា ព្រះរាជអាជ្ញារង បញ្ជារឲ្យធ្វើការរុះរើចេញ ក្នុងនោះដែរលោកបានបញ្ជាក់ថា ទីតាំងនេះមិនអាចបណ្តោយឲ្យមានការធ្វើសិប្បកម្មនោះទេ ដោយសារតែជាគំរូអាក្រក់ដល់ប្រជាពលរដ្ឋឯទៀត ក្នុងការចូលមករុករាន្ទព្រៃឈើដោយខុសច្បាប។
ដោយ ប៊ុន រដ្ឋា
