នាយករដ្ឋមន្ត្រីជប៉ុន លោក ស៊ីនហ្សូ អាបេ បានរៀបចំ ដើម្បីធ្វើការរំលាយសភា ជាន់ទាបនាព្រឹកថ្ងៃ សុក្រ នេះ សម្រាប់ឆ្ពោះទៅរកការបោះឆ្នោតជាតិមួយ ដែល គ្រោងនឹងត្រូវធ្វើឡើងនៅថ្ងៃទី ១៤ ខែ ធ្នូ ខាងមុខនេះ ដើម្បីឆ្លើយតបទៅនឹង សេចក្ដីសម្រេចរបស់រូបលោក ក្នុងការ
បង្កើនអត្រាពន្ធលើការប្រើប្រាស់ដល់ទៅ ១០ភាគរយនៅក្នុងខែ មេសា ឆ្នាំ ២០១៧ ផ្ទុយពីក្នុងខែ តុលា ឆ្នាំ ២០១៥ ដែល គ្រាន់តែជាគម្រោងការបឋមប៉ុណ្ណោះ ។
គោលបំណងនៃការបោះឆ្នោតខាងលើនេះ គឺដើម្បីមើលឃើញថាតើសាធារណៈ ជននឹងមានប្រតិកម្មយ៉ាងណាទៅលើសេចក្ដីសម្រេច ស្ដីពីអត្រាពន្ធដែលត្រូវបាន ធ្វើឡើង ស្របពេលមានការកើនឡើងនូវភាពទន់ខ្សោយរបស់សេដ្ឋកិច្ចជប៉ុន និង ការស្ដារឡើងវិញនូវគោលនយោបាយ ក្នុងគោលបំណងបញ្ចប់វិបត្តិអតិផរណា ។
ប៉ុន្ដែបណ្ដាសាធារណជនជាច្រើននៅតែបន្ដមានចម្ងល់ ថាតើហេតុអ្វីលោក អាបេ ចាំបាច់ធ្វើការរំលាយសភាសម្រាប់ការបោះឆ្នោតជាតិធ្វើអ្វី ទាំងដឹងថា ប្រទេស ជប៉ុនសព្វថ្ងៃកំពុងជួបប្រទះបញ្ហាយ៉ាងធ្ងន់ធ្ងរទាំងនៅក្នុង និង ក្រៅប្រទេស ៕
