ព្យុះទឹកកកដ៏ខ្លាំងមួយកំពុងបក់បោកនៅក្នុងរដ្ឋ New York និង បណ្តារដ្ឋជិតខាងស្ថិតនៅភាគឦសានសហរដ្ឋអាមេរិក ។ គិតមកដល់ពេលនេះ ទឹកកកសំឡីដ៏ច្រើនសន្ធឹកសន្ធាប់កំពស់ ១៥០ សង់ទីម៉ែត្របានគ្របដណ្តប់លើដី និង ធ្វើឲ្យ មនុស្សយ៉ាងហោចណាស់ ៧ នាក់បានស្លាប់ក្នុង
គ្រោះមហន្តរាយនេះ ។ បច្ចុប្បន្ន តំបន់មួយចំនួននៅក្នុងរដ្ឋ New York កំពុងស្ថិតនៅក្នុងស្ថានភាពប្រកាសអាសន្ន ។
ព្យុះទឹកកកសំឡីនេះ បានធ្លាក់ខ្លាំងជាងគេនៅតំបន់ជុំវិញទីក្រុង Buffalo រដ្ឋ New York ដោយក្នុងរយៈពេលតែ ២៤ ម៉ោងប៉ុណ្ណោះ កំពស់ទឹកកកបានកើនឡើងដល់ ១៥០ សង់ទីម៉ែត្រ ។ មានរថយន្តប្រមាណ១៥០គ្រឿងបានជាប់គាំងជាច្រើនម៉ោងពុំអាចទៅមុខរួចនៅលើកំណាត់ផ្លូវជាតិលេខ ៩០ ស្ថិតនៅតាមបណ្តោយបឹង Érié និង បឹង Ontario ក្បែរព្រំដែនប្រទេសកាណាដា ។
អភិបាលរដ្ឋ New York លោក Andrew Cuomo បានសំរេចប្រកាសដាក់តំបន់មួយចំនួនស្ថិតក្នុងភាពប្រកាសអាសន្ន ដោយយោងហេតុផលថា មានមនុស្សប្រមាណ ១ ម៉ឺននាក់ពុំមានភ្លើងអគ្គិសនីប្រើប្រាស់នៅតាមលំនៅដ្ឋាន ខណៈ ដែលសាលារៀន និង ហាងទំនិញមួយចំនួនធំនៅតំបន់នោះត្រូវបានបិទទ្វារ ។
ចំណែកឯនៅព្រលានយន្តហោះក្នុងទីក្រុង Buffalo ជើងហោះហើរជាច្រើនខ្សែត្រូវបានលុបចោលជាបណ្តោះអាសន្ន ដើម្បីបញ្ចៀសហេតុការគ្រោះថ្នាក់ជាយថា ហេតុ ៕
