កំពង់ឆ្នាំង៖បុរសជាអ្នកបើម៉ូតូឌុបម្នាក់បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍មួយ បង្កដោយរថយន្តបែនដឹកដីចេញពីផ្លូវបត់កែងមកបុកម៉ូតូវេវពេញទំហឹងបណ្តាលអោយម៉ូតូនិងរថយន្តជាប់គ្នាតែម្តង។ហេតុការណ៍នេះបានកើតឡើងនៅវេលាម៉ោង១០និង១៥នាទីព្រឹកថ្ងៃទី២១ ខែវិច្ឆិកា
ឆ្នាំ២០១៤ នៅលើផ្លូវកៅស៊ូខាងកើតរោងចក្រអឺមវេ ក្នុងភូមិត្រពាំងចិកសារ សង្កាត់កំពង់ឆ្នាំង ក្រុងកំពង់ឆ្នាំង។ 
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំងបានអោយដឹងថា៖ជនរងគ្រោះក្នុងករណីនេះឈ្មោះ ម៉ៅ វិចិត្រ អាយុ៤៥ឆ្នាំ មុខរបររត់ម៉ូតូឌុប រស់នៅក្នុងភូមិសង្កា ត់កើតហេតុ។ក្នុងពេលកើតហេតុជនរងគ្រោះបានបើកម៉ូតូពីលិចទៅកើតក្នុងល្បឿនយ៉ាងលឿន លុះដល់ចំណុចកើតហេតុក៏មានរថយន្តបែនដឹកដី១គ្រឿង ពាក់ស្លាកលេខកំពង់ឆ្នាំង ។
ក្នុងពេលកើតហេតុជនរងគ្រោះ បានបើកម៉ូតូពីលិចទៅកើតក្នុងល្បឿនយ៉ាងលឿនលុះដល់ចំណុចកើតហេតុក៏មានរថយន្តបែនដឹកដី១គ្រឿង ពាក់ស្លាកលេខកំពង់ឆ្នាំង 3A-1040 បើកយ៉ាងលឿនចេញពីផ្លូវបត់កែងពីទិសខាងជើងបត់ទៅខាងលិច ក៏បានបុកម៉ូតូវេវពណ៌ក្រហមអត់ស្លាកលេខពេញទំហឹងតែម្តង បណ្តាលអោយអ្នកបើកម៉ូតូរងរបួសធ្ងន់និងធ្វើអោយម៉ូតូនិងរថយន្តជាប់គ្នាបេះមិនរួច។
ក្រោយពេលកើតហេតុអ្នកបើករថយន្តបែន បានទុករថយន្តចោលចុះរត់គេចខ្លួនបាត់ស្រមោល។ចំណែកជនរងគ្រោះត្រូវបានក្រុមគ្រួសារដឹកបញ្ជូនតាមម៉ូតូឌុបទៅកាន់មន្ទីរពេទ្យខេត្ត ដើម្បីអោយក្រុមគ្រូពេទ្យជួយសង្គ្រោះព្យាបាល។ ម៉ូតូនិងរថយន្តត្រូវបានសមត្ថកិច្ចនាំគ្នាគាស់យកចេញពីរថយន្ត ហើយដឹកយកទៅរក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំង កសាងសំណុំរឿងតាមផ្លូវច្បាប់៕
