នាយករដ្ឋមន្ត្រីជប៉ុន លោក ស៊ិនហ្សូ អាបេ បានប្រកាសរំលាយរដ្ឋសភាកាលពីថ្ងៃសុក្រ កន្លងទៅនេះ ដើម្បីឲ្យមានការបោះឆ្នោតជាតិនៅមុនកាលកំណត់ ។ ស្របពេលដែលសេដ្ឋកិច្ចរបស់ជប៉ុនកំពុងដើរថយក្រោយនោះ នាយករដ្ឋមន្ត្រីជប៉ុនរូប នេះ បានជ្រើសរើសយកការរំលាយ
រដ្ឋសភា និង ការបោះឆ្នោតសាថ្មី ដើម្បីជ្រើស រើសអ្នកតំណាងរាស្ត្រចំនួន ៤៧៥ នាក់ ដែលនឹងត្រូវធ្វើឡើងនៅថ្ងៃទី ១៤ ខែ ធ្នូ ខាងមុខ ក្នុងគោលបំណងស្តារមុខមាត់ និង នយោបាយសេដ្ឋកិច្ចរបស់លោក ដែលនាពេលនេះ មិនសូវមានប្រជាប្រិយភាពប៉ុន្មានក្នុងចំណោមប្រជាជនជប៉ុន។
ការរំលាយរដ្ឋសភាសម្រេចដោយនាយករដ្ឋមន្ត្រីជប៉ុនរូបនេះ បានបង្កឲ្យមានការ មិនពេញចិត្តពីសំណាក់សមាជិកសភារបស់គណបក្សប្រឆាំង ដែលបានចោទលោកអាបេថា បានធ្វើការសម្រេចចិត្តដោយគ្មានហេតុផល ។ ម្យ៉ាងទៀត ការ បោះឆ្នោតមុនកាលកំណត់នេះ នឹងធ្វើឲ្យប្រទេសជប៉ុនដែលកំពុងជួបវិបត្តិសេដ្ឋ កិច្ចរួចហើយនោះ ត្រូវចំណាយថវិកាបន្ថែមប្រមាណ ៤០០ លានអឺរ៉ូទៀត ។
លោកអាបេផ្ទាល់បានប្រកាសដែរថា លោកនឹងចុះចេញពីតំណែងប្រសិនបើរដ្ឋាភិបាលចម្រុះរបស់លោកបាត់សំឡេងភាគច្រើននៅរដ្ឋសភា ។ ប៉ុន្តែបើតាម អ្នកវិភាគគណបក្សរបស់លោកអាបេរំពឹងថា ពួកខ្លួននឹងនៅតែទទួលបានគាំទ្រ ខណៈដែលគណបក្សប្រឆាំងនៅតែទន់ខ្សោយនៅឡើយនោះ ។
ប៉ុន្តែអ្វីដែលអាចជាឧបសគ្គរបស់លោកអាបេ គឺការធ្វើពហិការ ឬ បោះឆ្នោតអនុប្បវាទរបស់ប្រជាជនជប៉ុនដែលខកចិត្តនឹងនយោបាយរូបលោក ៕
