ភ្នំពេញ៖ហេតុការណ៍គ្រោះថ្នាក់ចរាចរណ៍មួយ ដែលបង្កឡើងរវាងរថយន្ត២គ្រឿង មួយគ្រឿងម៉ាកហាយឡេនឌឺ និងមួយគ្រឿងទៀត ម៉ាកវីស្តូ បានបើកបុកគ្នាពេញទំហឹង នៅចំណុចផ្លូវលេខ៣៦០ កែងនឹងផ្លូវ លេខ១៦៣ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន កាលពីវេលាម៉ោង១២
និង៣០នាទីយប់ ឈាន ចូលថ្ងៃទី២៤ ខែវិច្ឆិកា ឆ្នាំ២០១៤។យោងតាមសម្តីរៀបរាប់ របស់ម្ចាស់រថយន្តហាយឡេនឌឺ ដែលមានឈ្មោះ ថាវ រិទ្ធ ភេទប្រុស អាយុ២៦ឆ្នាំ បានរៀបរាប់អោយដឹងថា នៅមុនពេលមានហេតុការណ៍កើតឡើង គឺរូបខ្លួន ទើបតែមកពីញុំាអី នៅ
ខាងក្រៅ ហើយបំណងត្រឡប់ទៅយកបងប្រុសរបស់ខ្លួន ដោយបើកបររថយន្តមួយគ្រឿងម៉ាក ហាយឡេនឌឺ ពណ៌ស្ករ ពាក់ស្លាកលេខ ភ្នំពេញ 2X-1355 បើកបរធ្វើដំណើរតាមបណ្តោយផ្លូវលេខ១៦៣ ទិសដៅពីជើងទៅត្បូង ក្នុងល្បឿនល្មម លុះមកដល់កន្លែងកើតហេតុ ស្រាប់តែមានរថយន្តមួយគ្រឿងផ្សេងទៀត ម៉ាកវីស្តូ ពណ៌ក្រហម ពាក់ស្លាកលេខ ភ្នំពេញ 2U-5439 ជិះ
ធ្វើដំណើរតាមបណ្តោយផ្លូវ៣១០ ទិសដៅពីកើតទៅលិច ក្នុងល្បឿនយ៉ាងលឿន បើកឆ្លងកាត់ពីមុខរថយន្តហាយឡេនឌឺ បណ្តាលអោយរថយន្តហាយឡេនឌឺ ជ្រុលបុក បញ្ចិតគូទរថយន្តវីស្តូ វិលជាច្រើនជុំ ខ្ទាតបុរសម្នាក់ ដែលរួមដំណើរក្នុងរថយន្ត ផ្លោងចេញមកខាងក្រៅ រងរបួសធ្ងន់ធ្ងរ ចំណែកពីរនាក់ទៀត បានបើកទ្វាររថយន្តចេញមកក្រៅ ហើយរត់គេចខ្លួនបាត់
ស្រមោលសូន្យឈឹង រីឯរថយន្តហាយឡេនឌឺ ដោយសារគេចពីរថយន្តវីស្តូខ្លាំងពេក ក៏ជ្រុលបួងចង្កូត ជ្រុលបុកចូលផ្ទះ ប្រជាពលរដ្ឋ ដែលនៅជិតកន្លែងកើតហេតុ ពេញទំហឹងបណ្តាលអោយរបងផ្ទះ និងផ្នែកខាងមុខនៃរថយន្ត ត្រូវរងការខូចខាតយ៉ាងដំណំ ។
ក្រោយកើតហេតុ សមត្ថកិច្ចមូលដ្ឋាន បានសហការជាមួយជំនាញ ចុះធ្វើការអន្តរាគមន៍វាស់វែង ស្ទូចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ជើងគោក រាជធានីភ្នំពេញ រងចាំដោះស្រាយតាមផ្លូវច្បាប់នាពេលក្រោយ ៕
