ស្ទឹងត្រែង៖ បុរសម្នាក់បានរងរបួសបែកចិញ្ចើមនិងប៉ោងភ្នែកដេរប្រាំបីថ្នេរដោយសារសន្តិសុខម្នាក់ បានវាយនឹងដំបងឆក់ បន្ទាប់ពីពួកគេចូលរាំកម្សាន្តក្នុងក្លឹប (អាម៉ាហ្សូន) ស្ថិតនៅក្រុងស្ទឹងត្រែង ខេត្តស្ទឹងត្រែង កាលពីវេលាម៉ោង២រំលងអាធ្រាត្រ ឈានចូលថ្ងៃទី២៣ខែវិច្ឆិកាឆ្នាំ២០១៤
ស្ថិតក្នុងភូមិព្រែក សង្កាត់ ក្រុងស្ទឹងត្រែង។បុរសរងគ្រោះត្រូវបានគេស្គាល់ថាឈ្មោះទិន ជួប អាយុ៣០ឆ្នាំ រស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ។សាក្សីនៅកន្លែងកើតហេតុបាននិយាយថាមុនពេលកើតហេតុជនរងគ្រោះរួមនិងមិត្តភក្តិគេជាច្រើននាក់ទៀតបាននាំគ្នាចូលទៅរាំកម្សាន្តក្នុងក្លឹបអាម៉ាហ្សូន។ក្រោយពីផឹកស៊ីអស់ជាច្រើនម៉ោង ជនរងគ្រោះក៏បានដើរចូលក្នុងបន្ទប់ទឹកតែម្នាក់ឯង។ពេលនោះដើរប៉ះបានទាស់ពាក្សសម្តីជាមួយសន្តិសុខម្នាក់ តែរឿងនេះត្រូវបានបញ្ចាប់ហើយ។
ជនរងគ្រោះបានបន្តថា៖ប៉ុន្តែពេលដែលជនរងគ្រោះនិងមិត្តភក្តិចេញពីក្លឹបគោលបំណងមកផ្ទះក៏ត្រូវសន្តិសុខតាមដល់មាត់ច្រកចេញវាយនឹងដំបងឆក់ បណ្តាលឲ្យរងរបួស បែកលើចិញ្ចើម ប៉ោងភ្នែក ហូរឈាមកក្លាក់ ភ្លាមនោះមិត្តភក្តិរួមដំណើរជាមួយបានដឹកយកទៅព្យាបាលនៅមន្ទីរពេទ្យបង្អែកខេត្តស្ទឹងត្រែង។
ក្រោមការចោទប្រកាន់របស់ជនរងគ្រោះ ថាសន្តិសុខម្នាក់វាយឲ្យរងរបួសពេលចូលរាំកម្សាន្តក្លឹបអាម៉ាហ្សូននោះ ។ លោកប៊ូ ណេង ម្ចាស់ក្លឹបកម្សាន្តអាម៉ាហ្សូនបាននិយាយថាកាលពីដំបូងឈ្មោះទិន ជួបនិងសន្តិសុខមានការទាស់សម្តីគ្នា។បន្ទាប់មកឈ្មោះទិន ជួបបានវាយទៅលើសន្តិសុខក្លឹបមុនទើបធ្វើឲ្យសន្តិសុខខឹងក៏វាយតបតវិញ។ចំពោះរឿងនេះលោកប៊ូណេងបាននិយាយថាលោកក៏មិនបានដឹងថាគឺជាសន្តិសុខមួយណាទេ។ក្លឹបនេះចាប់ផ្តើមបើកទទួលភ្ញៀវចាប់ពីម៉ោង៨យប់ដល់ម៉ោងជាង២រំលងអាធ្រាត្រ។
ជនរងគ្រោះឈ្មោះទិន ជួបបានឲ្យដឹងថាក្រោយពីខ្លួនត្រូវសន្តិសុខការពារក្លឹបអាម៉ាហ្សូនវាយនឹងដំបងឆក់ឲ្យរងរបួសចំក្បាលមួយដំបង ចំចិញ្ចើមមួយដំបង ប៉ោងភ្នែលដេរអស់ប្រាំបីថ្នេរ ក៏បានប្តឹងនៅនគរបាលខេត្តស្ទឹងត្រែងដើម្បីទាមទាររកយុត្តិធម៌។ចាប់តាំងពីថ្ងៃកើតហេតុរហូតមកទល់នឹងថ្ងៃទី២៤ខែវិច្ឆិកាឆ្នាំ២០១៤នេះ ខាងសមត្ថកិច្ចនគរបាលមិនទាន់មានចំណាត់ការយ៉ាងណានៅឡើយនោះទេ។
លោកហម ប៊ុនធែល ស្នងការរងនិងជាប្រធានការិយាល័យកណ្តាលនគរបាលព្រហ្មទណ្ឌ ខេត្តស្ទឹងត្រែងបានប្រាប់កម្ពុជាថ្មីថា ទាក់ទិនទៅនឹងរឿងផ្ទុះអំពើហឹង្សាក្នុងក្លឹបនោះ សមត្ថកិច្ចបានសុំគោលការណ៍ពីលោកស្នងការនិងព្រះរាជអាជ្ញាអមសាលាដំបូងខេត្ត ដើម្បីចាត់វិធានការអនុវត្តន៍តាមផ្លូវច្បាប់។
លោកស្នងការរងបានបញ្ជាក់ថាក្រោយពីសមត្ថកិច្ចទទួលបានពាក្សបណ្តឹងនិងចុះអនុវត្តន៍ឃាត់ខ្លួនជនបង្ករ មកសាកសួរតាមពាក្សបណ្តឹង ជនរងគ្រោះប៉ុន្តែជនបង្ករបានរត់គេចខ្លួនបាត់ទៅហើយ ។
សូមបញ្ជាក់ថា៖កន្លងមកក្លឹបកម្សាន្តអាម៉ាហ្សូនត្រូវបានក្រុមក្មេងស្ទាវបង្កររឿងវាយតប់គ្នាស្ទើរាល់យប់។ប្រជាពលរដ្ឋធុញទ្រាន់ទៅនឹងសម្លេងចេញពីក្នុងក្លឹបដែលចាប់ផ្តើមបើកតាំងពីព្រលប់រហូតដល់ម៉ោង៣ទៅ៤ទៀបភ្លឺ។ទាក់ទិនរឿងនេះលោកហម ប៊ុនធែល ស្នងការរងនគរបាលខេត្តបានឲ្យដឹងទៀតថា៖ក្លឹបកម្សាន្តអាម៉ាហ្សូនគឺជាកន្លែងប្រភពចែកចាយនិងប្រើប្រាស់គ្រឿងញៀនក៏ដូចជាការវាយតប់គ្នាជាញឹកញាប់នៅក្នុងក្លឹបកម្សាន្តមួយនេះ។
លោកស្នងការរងបានលើកឡើងថា៖ដោយសារកន្លងមកក្លឹបខាងលើនេះចេះតែកើតមានរឿងមិនចេះចប់ ហេតុនេះហើយ ! លោកនឹងសុំគោលការណ៍ពីលោកស្នងការ និងអភិបាលខេត្តស្ទឹងត្រែង ដើម្បីចាត់វិធានការណ៍ទៅលើក្លឹបកម្សាន្តមួយនេះ៕
