សៀមរាបៈ លោក ព្រិន សាវិន នាយខ័ណ្ឌរដ្ឋបាលជលផល ខេត្តសៀមរាប និង លោក ញឹម ស៊ីវ័ន្ត ប្រធានសង្កាត់រដ្ឋបាលជលផលឃុំអន្លង់សំណរ ជាមួយបក្សពួកបានរួមគំនិតគ្នាជាឯកច្ឆ័ន្ទបើកភ្លើងខៀវអោយចិញ្ចឹមត្រីរ៉ស់និងត្រីឆ្តោរយ៉ាងអាណាធិបតេយ្យ ខុសពីច្បាប់ជលផលដែលបាន
ផ្សព្វផ្សាយដោយ «ក្រសួងកសិកម្ម រុក្ខាប្រមាញ់ និងនេសាទ» ដែលចាត់ទុកត្រីរ៉ស់ និងត្រីឆ្តោរជាត្រីត្រីយក្សព្រោះត្រីឆ្ដោរឬត្រីរ៉ស់ចាប់ពីថ្ងៃចិញ្ចឹមរហូតដល់ថ្ងៃអាចលក់បានក្នុង១ក្បាលអាចស៊ីកូនត្រីចំរុះរហូតដល់រាប់ម៉ឺនក្បាល នៅឆ្នាំ២០១៤នេះការចិញ្ចឹនត្រីឆ្តោរនិងត្រីរ៉ស់កើនឡើងគួអោយព្រួយបារម្ភពីអនាគតមច្ឆាជាតិបឹងទន្លេសាប។
ជាក់ស្តែងតាមប្រភពពត័មានច្បាស់ការបានប្រាប់អ្នកសារពត័មានយើងថាគ្រាន់តែចំណុច១ចំនួននៅក្នុងឃុំអន្លង់សំណរដូចជា៖ ចងសេះ, ស្ទឹងជ្រៅ, ភូមិថ្មី, ខ្វែងចក និងមាត់ខ្លាមានបែចិញ្ចឹមត្រីមិនតិចជាង៤០០បែនោះទេដោយមិនទាន់សរុបស្រះនៅតាមភូមិ ហើយមានត្រីទាំងពីរប្រភេទនេះមិនតិចជាង៣២០០០០០ (បីលានពីរសែនក្បាល) នោះទេ។
ហើយតាមសម្តីប្រជានេសាទដែលរស់នៅក្នុងភូមិស្ទឹងជ្រៅ និយាយថា៖ រដ្ឋបាលជលផលយកលុយ(ហៅថាពិន័យ)ចាប់ពី ៧០០ ០០០រៀល ទៅ១ ៥០០ ០០០ រៀល ទៅតាមបែតូច ឬបែធំ ចំនួនត្រីតិច ឬត្រីច្រើន។ជុំវិញបញ្ហានេះអ្នកសារពត៌មានបានទូរស័ព្ទទៅលោក ញឹម ស៊ីវ័ន្ត ដើម្បីបំភ្លឺរឿងនេះ ប៉ុន្តែគ្មានការឆ្លើយតប នេះគឺជាទន្លាប់ចាស់គំរិលរបស់គាត់។
ចំណែកឯលោក ព្រិន សាវិន បានបំភ្លឺតាមទូរស័ព្ទថា៖ កាលពីខែកក្តដា និងខែសីហា កម្លាំងគណៈបញ្ជាការឯកភាពស្រុកបានចុះទៅចាក់កូនត្រីចោលអស់ជាង ៨០០ ០០០ក្បាល រីឯអ្នកខ្លះទៀតបានអូសបែត្រីគេចចូលក្នុងព្រៃ នៅពេលនេះរដ្ឋបាលជលផលកំពុងតែធ្វើការផាកពិន័យអ្នកចិញ្ចឹមត្រីខុសច្បាប់នេះអោយរាងចាល។
មានប្រភពពត៌មានពីភូមិស្ទឹងជ្រៅដដែលថា៖ កាលពីខែកក្តដា និងខែសីហា កម្លាំងគណៈបញ្ជាការឯកភាពស្រុកពិតជាបានទៅចាក់កូនត្រីចោលមែនប៉ុន្តែកន្លែងខ្លះចាក់មែនទែន កន្លែងខ្លះចាក់លេងៗ មិនខុសពីអ្នកលេងសៀក ឬអ្នកលេងប៉ាហ៊ី សម្តែងដើម្បីលក់ថ្នាំនោះទេ។ ដោយ អ៊ុក ផ្លុង)
