ខណ្ឌសែនសុខ៖ក្រុមចោរប្លន់ប្រដាប់ដោយអាវុធមួយក្រុម បានធ្វើសកម្មភាពភ្ជង់ប្លន់ យកម៉ូតូស្កូបពី២គ្រឿង នៅកន្លែងផ្សេងគ្នាបានសម្រេច ហើយបានយកម៉ូតូទៅផ្ញើរនៅកន្លែងផ្ញើរម៉ូតូមួយ ដែលមានយ៉ីហោ រុង រឿង ដែលមានទីតាំងស្ថិតនៅចំណុចផ្ទះលេខ៣៩៩ តាមបណ្តោយផ្លូវ២៧១ ក្នុង
សង្កាត់ទឹកថ្លា ខណ្ឌសែនសុខ ហើយត្រូវបានកម្លាំងកងរាជអាវុធហត្ថ ស្ទើរពេញមួយរាជធានី ដេញតាមទាន់ យកម៉ូតូបានពីរគ្រឿងមកវិញ កាលពីវេលាម៉ោង២២និង៣០នាទីយប់ ថ្ងៃទី២៤ ខែវិច្ចិកា ឆ្នាំ២០១៤ ។
ប្រភពព័ត៌មានជុំវិញហេតុការណ៍ បានបានឲ្យដឹងថា មុនពេលកើតហេតុ ក្រុមចោរប្លន់ប្រដាប់អាវុធមាន គ្នា៦នាក់ ប្រដាប់ដោយកាំភ្លើងខ្លី២ដើម បានធ្វើសកម្មភាពភ្ជង់ប្លន់ យកម៉ូតូម៉ាកស្គុបពីរគ្រឿង ស៊េរីឆ្នាំ២០១៤ តាំងខុសគ្នា ដែលទីតាំងទី១ គឺជនសង្ស័យ៤នាក់ ជិះម៉ូតូពីរគ្រឿង មិនចាំម៉ាក បានធ្វើសកម្មភាពភ្ជង់ ប្លន់យកម៉ូតូស្គុបពី ពណ៌ស ពាក់ស្លាកលេខភ្នំពេញ 1BY-2394 ពីរនារីម្នាក់ នៅចំណុចខាងជើងផ្សារដើមគរ តាមបណ្តោយផ្លូវលេខ២៣០ ស្ថិតក្នុងសង្កាត់ផ្សារដើមគរ ខណ្ឌទូលគោក និងករណីទី២ គឺជនសង្ស័យពីរនាក់ ប្រដាប់ដោយ
កាំភ្លើងខ្លីមួយដើម បានធ្វើសកម្មភាព ភ្ជង់ប្លន់ម៉ូតូស្គុបពី ស៊េរីឆ្នាំ២០១៤ ពណ៌ក្រហម ពាក់ស្លាក លេខ ភ្នំពេញ 1CM- 2124 ពីបុរសម្នាក់ ដែលមានឈ្មោះ ទុន កុសល ភេទប្រុស អាយុ៣១ឆ្នាំ មានមុខរបរជាជាងថតរូបភាព មានទីលំនៅសង្កាត់ទឹកថ្លា ខណ្ឌសែនសុខ បានសម្រេចដោយសុវត្ថិភាព នៅចំណុចតាមបណ្តោយ ផ្លូវព្រះមុន្នីរ៉េត ស្ថិតក្នុងវាលវង់ ខណ្ឌ៧មករា ។
ក្រោយពីធ្វើសកម្មភាពភ្ជង់ប្លន់បានសម្រេចហើយនោះ ជនសង្ស័យប្រមាណជាង៦នាក់ខាងលើ ដែល បានប្លន់២ទីតាំងផ្សេងគ្នាននោះ បានយកម៉ូតូស្គុបពីរទាំងពីរគ្រឿង ទៅផ្ញើរនៅកន្លែងផ្ញើម៉ូតូមួយ ដែលមានយីហោ “ រុងរឿងទទួលផ្ញើរ២៤ម៉ោង ” ហើយក្រោយពីផ្ញើរហើយ ជនសង្ស័យទាំង៦នាក់ បានជិះម៉ូតូពីរ គ្រឿងឌុបគ្នាចេញទៅវិញ ដោយម៉ូតូមួយគ្រឿង ម៉ាកសង់សេ១១០ និងមួយគ្រឿងទៀត ម៉ាកនិច ជិះចេញទៅបាត់ដោយសុវត្ថិភាព ។
លុះមកដល់វេលាម៉ោងប្រមាណ២២ និង ៣០នាទីយប់ថ្ងៃទី២៤ ខែឆ្នាំដដែល នោះ កម្លាំងអាវុធហត្ថជាច្រើនខណ្ឌ ដែលដឹកនាំផ្ទាល់ពីសំណាក់ ឯកឧត្តមឧត្តមសេនីយ៍ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានដឹកនាំកម្លាំងចុះឆ្មក់ឆែរឆេរទីតាំងផ្ញើរម៉ូតូខាងលើ បន្ទាប់ពីទទួលបានដំណឹងថា ជនសង្ស័យ៦នាក់ ប្រដាប់ដោយអាវុធជាច្រើនដើម ដែលបានធ្វើសកម្មភាព ភ្ជង់ប្លន់ម៉ូតូម៉ាកស្គុបពី ចំនួនពីរទីតាំងខុសគ្នា ក្នុងរាជធានីភ្នំពេញ កាលពីវេលាម៉ោងប្រមាណ ២១ និង ០០នាទីយប់ថ្ងៃខែដដែលនោះ បានយកម៉ូតូដែលធ្វើ សកម្មភាពប្លន់បានយកមកផ្ញើរទុកនៅទីតាំងខាងលើ ទើបកម្លាំងអាវុធស្ទើរតែពេញមួយរាជធានី ចុះអន្តរាគមន៍ដល់ទីតាំងផ្ញើរម៉ូតូខាងលើភ្លាមៗ ប៉ុន្តែមុនពេលដែលកម្លាំងអាវុធហត្ថ ចុះអន្តរាគន៍នោះ ជនសង្ស័យទាំង៦នាក់ បានយកម៉ូតូដែលប្លន់បាន បាត់ទៅហើយ ដោយបន្សល់ទុកតែម៉ូតូ ដែលពួកគេធ្វើសកម្មភាព បានសម្រេចនៅទីនោះ ។
ដោយមានបញ្ជារផ្ទាល់ ពីសំណាក់ឯកឧត្តមឧត្តមសេនីយ៍ រ័ត្ន ស្រ៊ាង កម្លាំងអាវុធហត្ថ បានធ្វើកំណត់ទៅ លើម៉ូតូដែលសេសសល់ជាង៤០គ្រឿងទៀត ដែលបងប្អូនប្រជាពលរដ្ឋ យកមកផ្ញើរនៅទីតាំងខាងលើ និងធ្វើការផ្អាកទីតាំងអាជីវកម្មខាងលើទាំងយប់បណ្តោះអាសន្ន រងចាំសាកសួរបន្ថែមនៅថ្ងៃស្អែក ។ ចំណែកទាំង៣៨ គ្រឿង ត្រូវបានកម្លាំងអាវុធ ធ្វើកំណត់ហេតុបន្ថែម រងចាំម្ចាស់ម៉ូតូ យកលិខិតស្នាម មកបញ្ជាក់ថា ទើបព្រមប្រគល់អោយវិញ ចំណែកម៉ូតូដែលគ្មានលិខិតស្នាមត្រឹមត្រូវនោះ កម្លាំងអាវុធ និងបញ្ចូនទៅកាន់ទីបញ្ជាការដ្ឋាន កងរាជអាវុធហត្ថរាជធានីភ្នំពេញ ដើម្បីធ្វើកំណត់ហេតុ ចាត់ការបន្តតាមផ្លូវច្បាប់។
សូមបញ្ជាក់ផងដែរថា បើយោងតាមការរៀបរាប់របស់ប្រជាពលរដ្ឋ ដែលរស់នៅជិតទីតាំងអាជីវកម្មខាង លើបានប្រាប់អោយដឹងថា កន្លងមកទីតាំងខាងលើនេះ តែងមានជនមិនស្គាល់មុខ និងប្លែកមុខ ជិះម៉ូតូយកមក ផ្ញើរជារៀងរាល់ថ្ងៃ ដោយមិនដឹងថា ម៉ូតូដែលពួកគេទាំងនោះ យកមកផ្ញើរ ជាម៉ូតូស្របច្បាប់ ឬក៏ជា ម៉ូតូដែល ធ្វើសកម្មភាពអសន្តិសុខផ្សេងៗ ហើយយកមកផ្ញើ ឬយ៉ាងណានោះទេ ប៉ុន្តែនេះគ្រាន់តែជាទិដ្ឋភាពជាក់ស្តែង ដែលបងប្អូនប្រជាពលរដ្ឋ បានឃើញតែប៉ុណ្ណោះ ៕
