ភ្នំពេញ៖រថយន្តធុនធំដឹករថយន្តចាក់កៅស៊ូជុសជុលផ្លូវបានបើកទាក់ខ្សែរភ្លើងបណ្តាលឲ្យធ្លាក់រាយប៉ាយពេញផ្លូវហើយខ្សែរភ្លើងដែលធ្លាក់នោះបានទាក់ម៉ូតូមួយគ្រឿងទៀតជិះដោយបុរសម្នាក់ឌុបកូនតូចមួយបានដួលបោកក្បាលរងរបួសធ្ងន់។ហេតុការណ៍នេះបានកើតឡើងកាលពីវេលាម៉ោង២០
និង៥០នាទីយប់ថ្ងៃទី២៤ខែវិច្ជិកាឆ្នាំ២០១៤នៅចំណុចមុខវិទ្យាល័យបាក់ទូកតាមបណ្តោយផ្លូវលេខ១៦៩ស្ថិតក្នុងសង្កាត់វាលវង់ខណ្ឌ៧កមរា។
តាមសាក្សីនៅកន្លែងកើតហេតុបានឲ្យដឹងថាមុនពេលកើតហេតុគេបានឃើញរថយន្តធុនធំមួយគ្រឿង និងដឹករថយន្តចាក់កៅស៊ូធ្វើផ្លូវរបស់ក្រុមហ៊ុនជប៉ុនធ្វើដំណើរតាមបណ្តោយផ្លូវលេខ១៦៩ក្នុងទិសដៅពីត្បូងទៅជើងខណៈមកដល់ចំណុចមុខវិទ្យាល័យបាក់ទូកក៏បានទាក់ខ្សែរភ្លើងបាច់ធ្លាក់រាយប៉ាយពេញផ្លូវរងការខូចខាត។
បន្ទាប់ពីកើតហេតុបានប្រហែលជា២០នាទីស្រាប់តែមានបុរសម្នាក់ជិះម៉ូតូមួយគ្រឿងឌុបកូនតូចធ្វើដំណើរតាមបណ្តោយផ្លូវលេខ១៦៩ក្នុងទិសដៅពីជើងទៅត្បូងដោយមិនបានឃើញខ្សែរភ្លើងដែលធ្លាក់កាត់ទទឹងផ្លូវនោះក៏បានទាក់ធ្វើឲ្យដួលម៉ូតូទៅនិងថ្នល់បោកក្បាលកូនក្មេងរងរបួសធ្ងន់ចំណែកបុរសដែលត្រូវជាឪពុករងរបួសស្រាល។
ក្រោយពេលកើតហេតុកូនក្មេងតូចដែលរបួសត្រូវបានដឹកទៅសង្គ្រោះនៅមន្ទីរពេទ្យភ្លាមៗរីឯរថយន្តត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌ៧មករាដើម្បីរងចាំដោះស្រាយនៅពេលក្រោយ៕
