ទីតាំងជួសជុលរថយន្ដ គ្មានស្លាកយីហោមួយកន្លែង បានបើកអាជីវកម្ម រំលោភលើចំណីផ្លូវ ជាតិលេខ ៥ ដោយមិនខ្វល់ពីផលប៉ះពាល់ ដល់សណ្ដាប់ធ្នាប់សាធារណៈឡើយ ដោយគេសង្ស័យ ប្រហែលជាទីតាំងនេះ គ្មានច្បាប់អនុញ្ញាតផងក៏មិនដឹង ។ ទីតាំងជួសជុលរថយន្ដខាងលើនេះ ស្ថិតនៅតាមបណ្ដោយផ្លូវជាតិលេខ៥ ត្រង់ចំណុចផ្លូវកោង ស្ថិតក្នុងភូមិប៉ប៉ិត ឃុំអន្លង់ត្នោត ស្រុកក្រគរ ខេត្ដពោធិ៍សាត់ ។
ប្រភពព័ត៌មាន ពីប្រជាពលរដ្ឋ ពិសេសអ្នកធ្វើដំណើរ ដែលបានឆ្លងកាត់ទីតាំងខាងលើនោះ បានរិះគន់ថា ទីតាំងជួសជុលរថយន្ដខាងលើនេះ មានរថយន្ដធុនធំៗ ចូលជួសជុលជាច្រើន ពេសពេញចិញ្ចើមផ្លូវសាធារណៈ ពេលខ្លះហៀរដល់លើផ្លូវកៅស៊ូទៀតផង ។ ម្យ៉ាងទៀតកន្លែងនោះ ជាផ្លូវកោង វាងាយនិងមានគ្រោះថ្នាក់ចរាចរណ៍ ជាយថាហេតុ ។
ប្រភពបន្ដថា ម្ចាស់យានដ្ឋានខាងលើនេះ ហាក់បីដូចជាមិនខ្វល់ អំពីផលប៉ះពាល់ ដល់អ្នកដទៃទាល់តែសោះ គិតតែប្រយោជន៍ផ្ទាល់ខ្លួនប៉ុណ្ណោះ ហើយទីតាំងខាងលើនេះ គេសង្ស័យថា ប្រហែលជាគ្មានច្បាប់អនុញ្ញាតផងក៏មិនដឹង ។
ប្រជាពលរដ្ឋ ក៏បានសំណូមពរដល់អាជ្ញាធរពាក់ព័ន្ធ មេត្តាជួយពិនិត្យមើលទីតាំងខាងលើនេះផង បើទុកបណ្តែតបណ្តោយ ឲ្យនៅធ្វើអាជីវកម្មលើចំណីផ្លូវតទៅទៀត នឹងមានអ្នករងរបួស ដោយសារតែគ្រោះថ្នាក់ចរាចរណ៍ នៅត្រង់ចំនុចខាងលើនេះជាមិនខាន់ ។
ពាក់ព័ន្ធនិងករណីនេះដែរ លោក សេង គឹមហួ នាយប៉ុស្ដិ៍នគរបាលរដ្ឋបាល អន្លង់ត្នោត បានប្រាប់តាមទូរស័ព្ទកាល នៅពីសៀលថ្ងៃទី២៥ ខែវិច្ឆិកា ឆ្នាំ២០១៤ថា កន្លែងជួសជុលរថយន្ដនោះ លោកនឹងទៅធ្វើការណែនាំ ឱ្យគាត់ថយចូលក្នុង កុំឱ្យមានការប៉ះពាល់លើដីចិញ្ចើមផ្លូវទៀត ៕
