ដើម្បីអនុវត្តគោលនយោបាយ ភូមិឃុំមានសវត្ថិភាព ធានារក្សាបានសន្តិសុខ សណ្តាប់ធ្នាប់សាធារណៈ ជូនប្រជាពលរដ្ឋ កម្លាំងនៃអធិការដ្ឋាន នគរបាលស្រុកកំពង់ត្រឡាច ដឹកនាំដោយលោក ហ៊ុល វាសនា អធិការនគរបាលស្រុក បានដឹកនាំកម្លាំង ចុះធ្វើការត្រួតពិនត្យ ក្នុងស្រុកកំពង់ត្រឡាច ជាបន្តបន្ទាប់អស់រយៈពេលមួយសប្តាហ៍មកហើយ គិតមកដល់ថ្ងៃអង្គារទី ២៥ខែវិច្ឆិកា ឆ្នាំ២០១៤ ដោយទទួលបានពីការចង្អុលបង្ហាញ់ ពីឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និងលោកឧត្តមសេនីយ៍ត្រី ប្រាក់ វុឌ្ឍី ស្នងការនគរបាល ខេត្តកំពង់ឆ្នាំង ។
លោក ហ៊ុល វាសនា អធិការនគរបាល ស្រុកកំពង់ត្រឡាច បានអោយដឹងថា ការចុះត្រួតពិនិត្យរដ្ឋបាលពេលយប់ធ្វើឡើង ក្នុងគោលបំណងអនុវត្តអាយបានខ្ជាប់ខ្ជួន នូវគោលនយោបាយ ភូមិឃុំ មានសុវត្ថិភាព ត្រួតពិនិត្យអាវុធជាតិផ្ទុះ កាត់បន្ថយគ្រោះថ្នាក់ចរាចរណ៍ និងអំពើចោរកម្ម ដើម្បីធានារក្សាបានសន្តិសុខ សណ្តាប់ធ្នាប់សាធារណៈ ជូនប្រជាពលរដ្ឋ ។
លោកអធិការ បានអោយដឹងទៀតថា ការចុះត្រួតពិនិត្យអស់រយៈពេល មួយសប្តាហ៍កន្លងមកនេះ ជាលទ្ធផល កម្លាំងយើងដកហូតបាន ពូថៅ១ កំបិត៥ កន្ត្រៃ១ ចំពាមកៅស៊ូ១ ដែលសុទ្ធជាឧបករណ៍ ដែលអាចបង្កអោយមានគ្រោះថ្នាក់ ឬក៏អាចយកទៅធ្វើជាអំពើប្លន់ក៏ថាបាន និងឃាត់ម៉ូតូ បំពាក់ស៊ីរ៉ែន ចំនួន២គ្រឿង ដោយធ្វើការអប់រំម្ចាស់ម៉ូតូ ដែលបានប្រព្រឹត្តខុសច្បាប់ផងដែរ ។
លោកអធិការ ក៏បានបញ្ជាក់ឲ្យដឹងផងដែរថា នៅពេលត្រួតពិនិត្យ កម្លាំងរបស់យើង ក៏បានធ្វើការត្រួតពិនិត្យលើមធ្យោបាយធ្វើដំណើរ និងដឹកជញ្ជូន ដូចជារថយន្តគ្រប់ប្រភេទ ចំនួន២០៦គ្រឿង ម៉ូតូ ចំនួន១២២៤គ្រឿង គោយន្ត១១គ្រឿង នឹងមនុស្ស២២១៤នាក់ ក្នុងនោះមានស្រី៦៣៨នាក់ ៕
