ភ្នំពេញ ក្រុមចោរប្លន់ប្រដាប់អាវុធមួយក្រុមមានគ្នា៣នាក់ជិះម៉ូតូ២គ្រឿងធ្វើសកម្មភាពភ្ជង់ប្លន់ម៉ូតូមួយគ្រឿងម៉ាកឡេតពីយុវជនម្នាក់បានសម្រេចដោយសុវត្ថិភាពនៅចំណុចទល់មុខនឹងអាងតម្គល់ទឹកពោធិ៍ចិនតុងស្ថិតតាមបណ្តោយផ្លូវលេខ១០៥ក្នុងភូមិតាំងក្រសាំងសង្កាត់កាកាបខណ្ឌពោធិ៍សែន
ជ័យកាលពីវេលាម៉ោង១២និង០០នាទីយប់ឈានចូលថ្ងៃទី២៦ខែវិច្ឆិកាឆ្នាំ២០១៤។ ជនរងគ្រោះក្នុងអំពើភ្ជង់ប្លន់ខាងលើមានឈ្មោះវាំងប្រុសអាយុ២០ឆ្នាំស្នាក់នៅភូមិក្បាលដំរីសង្កាត់កាកាបខណ្ឌពោធិ៍សែនជ័យ។
យោងតាមសម្តីរៀបរាប់របស់ជនរងគ្រោះបានអោយដឹងថានៅមុនពេលមានហេតុការណ៍កើតឡើងគឺរូបខ្លូនបានជិះម៉ូតូមួយគ្រឿងម៉ាកឡេតមិនចាំស្លាកលេខជិះធ្វើដំណើរចេញពីផ្ទះបំណងឆ្ពោះទៅយកគូដណ្តឹងរបស់ខ្លួនមានឈ្មោះផលធារីអាយុ១៨ឆ្នាំស្នាក់នៅជិតកន្លែងកើតហេតុបន្ទាប់ពីគូដណ្តឹងរបស់ខ្លួនត្រូវបានសាច់ញាតិផ្ញើរអីវ៉ាន់នៅព្រលានយន្តហោះពោធិ៍ចិនតុងហើយដើរទៅយកជាមួយមិត្តភក្តិស្រី២នាក់ទៀតប៉ុន្តែដោយសារយប់ពេកហាក់ដូចជាមានការភ័យខ្លាចទើបមិនហ៊ានដើរត្រឡប់មកវិញក៏ទូរស័ព្ទហៅឈ្មោះវាំងប្រុសអោយមកទទួលយកទៅវិញដោយណាត់ជួបអោយមកយកនៅកន្លែងកើតហេតុខាងលើ។
ខណៈនោះយុវជនជាគូដណ្តឹងបានជិះមកដល់កន្លែងដែលខាងស្រីណាត់ជួបនោះស្រាប់តែមានជនសង្ស័យ៣នាក់ជិះម៉ូតូ២គ្រឿងមួយគ្រឿងម៉ាកនិចនិងមួយគ្រឿងទៀតម៉ាកអឹមអេសអិចបានជិះមកពីក្រោយហើយជនសង្ស័យម្នាក់បានដកកាំភ្លើងធ្វើសកម្មភាពភ្ជង់ទៅលើយុវជនរងគ្រោះហើយគំរាមថាកុំអោយស្រែកឆោរឡោរបើពុំដូច្នោះទេគេនឹងបាញ់សម្លាប់ចោល។ឃើញដូចនេះយុវជនរងគ្រោះក៏បានចុះពីលើម៉ូតូតាមសម្រួលហើយជនសង្ស័យបានឡើងជិះម៉ូតូជនរងគ្រោះចេញទៅបាត់ស្រមោលសូន្យឈឹងតែម្តងទៅ។
ក្រោយកើតហេតុភា្លមៗគេឃើញមានសមត្ថកិច្ចក៏ដូចជាកងកម្លាំងអាវុធហត្ថបានចុះអន្តរាគមន៍ដល់កន្លែងកើតហេតុភ្លាមៗហើយនាំជនរងគ្រោះទៅធ្វើការដាក់ពាក្យបណ្តឹងនៅប៉ុស្តិ៍រដ្ឋបាលនគរបាលកាកាបដើម្បីសមត្ថកិច្ចកំណត់មុខសញ្ញាបន្តរួចត្រឡប់ទៅគេហដ្ឋានវិញ៕
