បុរសម្នាក់ត្រូវរងរបួសបែកមុខបែកមាត់បន្ទាប់ពីរូបខ្លួនជិះម៉ូតូមួយគ្រឿងម៉ាកវីវ៉ាហើយត្រូវរថយន្តក្រឡុកស៊ីម៉ត៍របស់ក្រុមហ៊ុនឯកជនមួយបានបើកបុកចំពីមុខបញ្ច្រាសពេញទំហឹងនៅចំណុចជិតនឹងរង្វង់មូលសំពៅមាសស្ថិតតាមបណ្តោយផ្លូវលេខ១៦៣ក្នុងសង្កាត់វាលវង់ខណ្ឌ៧មករាកាលពីវេលាម៉ោង
២៣និង០០នាទីយប់ថ្ងៃទី២៥ ខែវិច្ឆិកាឆ្នាំ២០១៤។យោងតាមសម្តីរៀបរាប់របស់បុរសរងគ្រោះបានប្រាប់អោយដឹងថានៅមុនពេលកើតហេតុគឺរូបខ្លួនបានជិះម៉ូតូមួយគ្រឿងវីវ៉ាពណ៌ខ្មៅពាក់ស្លាកលេខភ្នំពេញ1P-4753 ជិះធ្វើដំណើរតាមបណ្តោយផ្លូវលេខ១៦៣ទិសដៅពីជើងទៅត្បូង
ក្នុងល្បឿនល្មមលុះមកដល់ចំណុចទល់មុខក្រុមហ៊ុនក្រឡុកស៊ីម៉ត៍ខាងលើស្រាប់តែត្រូវរថយន្តក្រឡុងស៊ីម៉ត៍មួយគ្រឿងមិនចាំស្លាកលេខនិងភិនភាគបើកបរក្នុងទិសដៅបញ្ច្រាសបំណងបត់ចូលក្រុមហ៊ុនរបស់ខ្លួនក៏ជ្រុលបុកម៉ូតូវីវ៉ាចំពីមុខពេញទំហឹងបណ្តាលបុរសជាម្ចាស់ម៉ូតូដួល
បោកផ្ទប់ទៅនឹងថ្នល់រងរបួសបែកមុខបែកមាត់ហើយរថយន្តបង្កបានព្យាយាមបើកចូលសំងំខ្លួននៅក្នុងក្រុមហ៊ុនរបស់ខ្លួនធ្វើព្រងើយហាក់ដូចជាគ្មានរឿងអ្វីកើតឡើងសោះ។
ក្រោយកើតហេតុភ្លាមៗសមត្ថកិច្ចមូលដ្ឋានក៏ដូចជាកម្លាំងអាវុធហត្ថបានចុះអន្តរាគមន៍ដល់កន្លែងកើតហេតុនិងជួលលាងរបួសជូនជនរងគ្រោះហើយធ្វើការហៅតំណាងក្រុមហ៊ុនម្នាក់អោយមកចេញដោះស្រាយសំណងជាមួយភាគីខាងម្ចាស់ម៉ូតូដោយតម្រូវតំណាងក្រុមហ៊ុនសុខចិត្តចេញថ្លៃសងសំណងគ្រប់យ៉ាងទៅខាងជនរងគ្រោះនិងទំនាក់ទំនងទៅខាងសាច់ញាតិមកទទួលយកទៅផ្ទះវិញ៕
