ក្រុមមន្ត្រីសុខាភិបាលប្រចាំនៅមន្ទីរពេទ្យរដ្ឋនីហ្ស៊េរីយ៉ាបានអោយដឹងថា មានមនុស្សមិនតិចជាង ៤៥ នាក់ទេ ដែលបានបាត់បង់ជីវិតនៅក្នុងការវាយប្រហារដោយគ្រាប់បែកអត្តឃាតចំនួនពីរករណីកាលពីថ្ងៃអង្គារកន្លងទៅនេះ។ករណីបន្ទុះគ្រាប់បែកអត្តឃាតនេះ បានកើតឡើងនៅកណ្តាល
ផ្សារមួយកន្លែងក្នុងក្រុង Maiduguri ភាគឥសាន្តរដ្ឋ បូណូ ដែលត្រូវបានគេចាត់ទុកថាជាទីតាំងវាយប្រហារដ៏ក្តៅមួយរបស់ក្រុមឧទ្ទាមបូកូហារ៉ាម។
យោងតាមក្រុមសាក្សីនៅកន្លែងកើតហេតុបាននិយាយថា ការវាយប្រហារខាងលើនេះ ត្រូវបានបង្ករឡើងដោយស្ត្រីពីរនាក់ ដោយស្ត្រីទីមួយបានធ្វើការបំផ្ទុះខ្លួនឯងនៅកណ្តាលហ្វូងប្រជុំជន ហើយក្រោយមកស្ត្រីម្នាក់ទៀតបានធ្វើការបំផ្ទុះខ្លួនឯងនៅក្នុងរយៈពេលប៉ុន្មាននាទីក្រោយ ខណៈដែលមនុស្សជាច្រើនបន្ថែមទៀតបានមរមារញឹករត់ចូលទៅជួយជនរងគ្រោះក្នុងការបំផ្ទុះទីមួយ។
រហូតមកដល់ពេលនេះ មិនទាន់មានក្រុមសកម្មជនណាមួយចេញមុខមកទទួលខុសត្រូវ និង បង្ហាញពីគោលបំណងនៃការវាយប្រហារនៅឡើយទេ ប៉ុន្តែក្រុមអាជ្ញាធរបានធ្វើដាក់បន្ទុកទៅលើក្រុមឧទ្ទាម បូកូហារ៉ាម ដែលជានិច្ចកាលតែងតែបង្ករអស្ថេរភាព និង សម្លាប់ជិវិតមនុស្សស្លួតត្រង់ជាច្រើនពាន់នាក់ ក្នុងរយៈពេលប្រមាណ ៥ ឆ្នាំចុងក្រោយនេះ ៕
