កំពង់ឆ្នាំង៖ អោយអ្នកបើកបររថយន្តម្នាក់បានរងរបួសជាទម្ងន់និងអ្នកជិះចំនួន២នាក់ទៀតបានរងរបួសធ្ងន់និងស្រាល ក្នុងករណីរថយន្តក្រុងដឹកអ្នកដំណើរមួយគ្រឿងបានកៀរម៉ូតូមួយគ្រឿងក្រឡាប់ខ្លួនឯងធ្លាក់ចេញពីថ្នល់ជាតិលេខ៥ដែលនេះជាការអះអាងរបស់សមត្ថកិច្ចនគរបាលស្រុក ។
ហេតុការណ៏នេះបានកើតឡើងនៅវេលាម៉ោង ១១និង៣០នាទីព្រឹកថ្ងៃទី២៥ ខែវិច្ឆិកា ឆ្នាំ២០១៤ ត្រង់ចន្លោះគីឡូម៉ែត្រលេខ១២៨និង១២៩ ស្ថិតក្នុងភូមិសន្លង់ ឃុំត្រពាំងចាន់ ស្រុកបរិបូណ៌ ។
លោក រស់ ប៊ុនណារិទ្ឋ នាយនគរបាលចរាចរណ៏ស្រុកបរិបូណ៌ដែលបានទៅ ពិនិត្យកន្លែងកើត ហេតុបាននិយាយអោយដឹងថាៈ រថយន្តក្រុងដឹកអ្នកដំណើរនោះពាក់ស្លាកលេខ ភ្នំពេញ 3A. 9822 បើកបរដោយជនពុំស្គាល់ឈ្មោះ។ ចំណែកអ្នកបើកបរម៉ូតូដែលត្រូវរថយន្តកៀរបណ្តាលអោយរងរបួសធ្ងន់មានឈ្មោះ ទៀង សុន អាយុ ភេទប្រុស អាយុ៦៣ឆ្នាំ មានទីលំនៅភូមិឃុំកន្លែងកើតហេតុខាងលើ និងអ្នកជិៈក្នុងរថយន្តក្រុង រងរបួសធ្ងន់មានឈ្មោះ យៀ វ៉ា ភេទប្រុស អាយុ៧២ឆ្នាំ មានទីលំនៅក្រុងភ្នំពេញនិងអ្នករងរបួសស្រាលម្នាក់ទៀតឈ្មោះ ជា បញ្ញា ភេទស្រីអាយុ ២៤ឆ្នាំ មានទីលំនៅក្រុងភ្នំពេញ ។
សមត្ថកិច្ចបានអោយដឹងទៀតថាៈ មុនពេលកើតហេតុ មានរថយន្តក្រុងខាងលើ បានធ្វើដំណើរពីភ្នំពេញទៅបាត់ដំបង ស្រាប់តែមកដល់ចំណុចកើតហេតុ បានជាប់ហ្វ្រាំង បណ្តាលអោយរថយន្តទាញចង្កូតមកស្តាំដៃរួចទៅបុកនិងបុរសឈ្មោះ ទៀង សុន កំពុងជិៈម៉ូតូម៉ាក ឌ្រីម១២៥ សេរី២០១២ ពណ៏ខ្មៅ ពាក់ស្លាកលេខ កំពង់ឆ្នាំង 1C. 7894 ក្នុងទិសដៅស្របគ្នា បណ្តាលអោយធ្លាក់ចូលទៅក្នុងទឹកលូ រួចទើបរថយន្តក្រឡាប់ទៅក្នុងទឹកតែម្តង។
ក្រោយពេលកើតហេតុ ជនរងគ្រោះរងរបួសធ្ងន់ចំនួន២នាក់ខាងលើ (ម្នាក់ជាអ្នកជិៈម៉ូតូម្នាក់ទៀតជាអ្នកជិៈរថយន្តក្រុង) ត្រូវបានរថយន្តដឹកមកសង្គ្រោះនៅមន្ទីរពេទ្យខេត្ត ចំណែកនារីរងរបួសស្រាល ក្រោយពីលាងនិងរុំរបួសនៅមណ្ឌលសុខភាពឃុំរួចហើយបានបន្តដំណើរទៅមុខទៀតជាមួយអ្នកដំណើរជាច្រើនអ្នកទៀតដែលមានរបួសបន្តិចបន្តួច ដោយឡែកអ្នកបើកបររថយន្តក្រុងបានគេចខ្លួនបាត់។រហូតមកដល់រសៀលថ្ងៃដដែលរថយន្តនៅពុំទាន់មានរថយន្តស្ទូចចេញពីកន្លែងនៅឡើយទេព្រោះតែរថយន្តស្ទូចមកមិនទាន់ដល់ ។
មន្ត្រីការិយាល័យចរាចរណ៏ផ្លូវគោករបស់ស្នងការដ្ឋាននគរបាលខេត្តបាននិយាយថាៈ គ្រោះថ្នាក់ខាងលើបង្កឡើងដោយសាររថយន្តដែលអ្នកបើកបរមិនបានប្រុងប្រយ័ត្ន ត្រួតពិនិត្យយានយន្តអោយបានហ្មត់ចត់មុនចេញដំណើរ ៕
