កម្លាំងកងរាជអាវុធហត្ថក្រុមដូនកែវ ខេត្តតាកែវចំនួន១៥នាក់ក្រោមការដឹកនាំរបស់លោកវរសេនីយ៍ឯក ឈឹម សវ៉ាត់ឌី មេបញ្ជាការកងរាជអាវុធហត្ថខេត្តតាកែវ និងក្រោមការបញ្ជាផ្ទាល់របស់លោក ជ័យ រិទ្ធី ព្រះរាជអាជ្ញារងអមសាលាដំបូងខេត្តតាកែវ លោកវរសេនីយ៍ឯក ឈឹម សវ៉ាត់ឌី មេបញ្ជាការរងកងរាជអាវុធហត្ថខេត្តតាកែវបានឲដឹងផងដែរថា ទាក់ទិនក្នុងការបង្ក្រាបល្បែងស៊ីសងពេលនេះគឺនៅចំណុចផ្ទះម្ចាស់ឈ្មោះ ជន សុភា ភេទប្រុស អាយុ៤៨ឆ្នាំ រស់នៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ហើយករណី
បង្ក្រាបនេះបានធ្វើឡើងកាលពីវេលាម៉ោង ១៥ និង ៤៥នាទីល្ងាច ថ្ងៃទី២៥ ខែវិច្ឆិកា ឆ្នាំ២០១៤ និងធ្វើការឃាត់ខ្លួនក្រុមអ្នកញៀនល្បែងបាន១៤នាក់ និងមធ្យោបាយមានម៉ូតូចំនួន១៣គ្រឿង រួមជាមួយ ឯកសារកន្ទុយលេខមួយចំនួនទៀតដើម្បីប្រគល់ឲសាលាដំបូងចាត់ការតាមផ្លូវច្បាប់ ។
លោកមេបញ្ជាការរងបន្តថា ដើម្បីការពារសន្តិសុខសុវត្ថិភាពជូនប្រជាពលរដ្ឋ ភូមិឃុំមានសុវត្ថិភាពត្រូវតែបង្ក្រាបល្បែងស៊ីសងនៅតាមបណ្តាភូមិសង្កាត់ឲអស់។ យោងតាមសំដីបងប្អូនប្រជាពលរដ្ឋនៅក្នុងក្រុងដូនកែវឲដឹងថា នៅមានមេកន្ទុយលេខធំៗ២ទៅ៣កន្លែងទៀត រួមនិងកន្លែងចាក់បាល់ផងដែរ បងម្នាក់គាត់ឲដឹងថា ល្បែងស៊ីសងសព្វថ្ងៃនេះនៅខេត្តតាកែវកំពុងពេញនិយមរីកដូចផ្សិត។
