នៅវេលាម៉ោង៨និង៣០នាទីយប់ ថ្ងៃទី២៥ ខែវិច្ឆិកា ឆ្នាំ២០១៤ នៅមុខវត្តទេពធីតារាម (ហៅវត្តយាយទេព) ស្ថិតក្នុងសង្កាត់ផ្សារឆ្នាំង ក្រុង កំពង់ឆ្នាំង ខេត្តកំពង់ឆ្នាំង ជនសង្ស័យ២នាក់ត្រូវបានសមត្ថកិច្ចចម្រុះចុះឆែកឆេរអាវុធជាតិផ្ទុះធ្វើការឃាត់ភ្លាមៗដោយជាប់ព័ន្ធគ្រឿងញៀន បន្ទាប់ពីរកឃើញមានថ្នាំញៀនប្រភេទម៉ាទឹកកកបានលាក់ទុកនៅក្នុងម៉ូតូ ។
សមត្ថកិច្ចបានអោយដឹងថា ជនសង្ស័យដែលធ្វើការឃាត់ខ្លួននេះម្នាក់ឈ្មោះ ភួង ហុង ភេទប្រុស អាយុ២០ឆ្នាំ និង ម្នាក់ទៀតឈ្មោះឌួង វាសនា ភេទប្រុស អាយុ៣០ឆ្នាំ ជនសង្ស័យទាំងពីរនាក់នេះរស់នៅសង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។សមត្ថកិច្ចបានបន្តអោយដឹងទៀតថា នៅយប់ថ្ងៃទី២៥ ខែវិច្ឆិកា មានសមត្ថកិច្ចចម្រុះមួយក្រុម មានកម្លាំងនគរបាលខេត្ត កម្លាំងនគរបាលក្រុង ដោយសហការជាមួយកម្លាំងកងរាជអាវុធហត្ថ ចុះឆែកឆេអាវុធជាតិផ្ទុះនៅមុខវត្តទេពធីតារាម(ហៅវត្តយាយទេព)
ប្រទះឃើញជនសង្ស័យពីរនាក់ជិះម៉ូតូ ហុងដា សេ១២៥មួយគ្រឿងក៍ធ្វើការត្រួតពិនិត្យ នៅពេលដែលសមត្ថកិច្ចធ្វើការឆែកឆេរម៉ូតូ ក៏បានរកឃើញថ្នាំញៀនប្រភេទម៉ាទឹកកកចំនួន២កញ្ចប់ នៅក្នុងម៉ូតូ និង បានធ្វើការសាកសួរ រួចឃាត់ជនសង្ស័យទាំង២នាក់នេះ យកមកការិយាល័យប្រឆាំងគ្រឿងញៀននៃស្នងការដា្ឋននគរបាលខេត្តតែម្តង ។
វត្ថុតាងដែលសមត្ថកិច្ចរកឃើញមានថ្នាំញៀនម៉ាទឹកកកចំនួន២កញ្ចប់ ទូរស័ព្ទដៃ៣គ្រឿង និងម៉ូតូ១គ្រឿង។ជនសង្ស័យទាំងពីរ ត្រូវសមត្ថកិច្ចកំពុងធ្វើការសាកសួរយកចម្លើយ ដើម្បីកសាងសំណុំរឿងបញ្ជូន ទៅសាលាដំបូងខេត្តចាត់ការបន្តតាមនីតិវិធី ៕
