កាលវេលាម៉ោង១១ និង៣០នាទីព្រឹក ថ្ងៃទី២៦ វិច្ឆិកា ២០១៤ នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ១២៨ និង១២៩ ស្ថិតក្នុងភូមិសន្លង់ ឃុំត្រពាំងចាន់ ស្រុកបរិបូរណ៍ រថយន្តក្រុងដឹកអ្នកដំណើរមួយគ្រឿងបានក្រឡាប់ធ្លាក់ចេញពីថ្នល់ជាតិលេខ៥ប្រះដេកក្នុងទឹកលូ បណ្តាលឱ្យអ្នកដំណើរក្នុងរថយន្តព្រលឹងចុងសក់ ។
មុនពេលក្រឡាប់ធ្លាក់ចេញពីផ្លូវ រថយន្តក្រុងខាងលើនេះបានកៀរម៉ូតូមួយគ្រឿងទៀតក្នុងទិសស្របគ្នាបណ្តាលឱ្យអ្នកបើកបររងរបួសធ្ងន់ ដែលចំនួនអ្នករងរបួសធ្ងន់ និងស្រាលចំនួន៣នាក់ ។នគរបាលចរាចរណ៍ស្រុកបរិបូរណ៍ដែលបានទៅពិនិត្យកន្លែងកើតហេតុបានឱ្យដឹងថា រថយន្តក្រុងដឹកអ្នកដំណើរនោះពាក់ស្លាកលេខ ភ្នំពេញ 3A. 9822 បើកបរដោយជនពុំស្គាល់ឈ្មោះចំណែកអ្នកបើកបរម៉ូតូដែលត្រូវរថយន្តកៀរបណ្តាលឱ្យរងរបួស
ធ្ងន់ឈ្មោះ ទៀង សុន ភេទប្រុស អាយុ៦៣ឆ្នាំ មានទីលំនៅភូមិ-ឃុំកន្លែងកើតហេតុខាងលើ និងអ្នកជិះក្នុងរថយន្តក្រុង រងរបួសធ្ងន់មានឈ្មោះ យៀ វ៉ា ភេទប្រុស អាយុ៧២ឆ្នាំ និងអ្នករងរបួសស្រាលម្នាក់ទៀតឈ្មោះ ជា បញ្ញា ភេទស្រី អាយុ២៤ឆ្នាំ អ្នកទាំងពីរមានទីលំនៅក្រុងភ្នំពេញ តាមការសន្និដ្ឋានគ្រោះថ្នាក់នៃការក្រឡាប់រថយន្តក្រុងខាងលើនេះ បណ្តាល មកពីជាប់ហ្វ្រាំងរថយន្ត ។
