សៀមរាប នៅរសៀលថ្ងៃទី២៥ ខែ វិច្ឆិកា ឆ្នាំ២០១៤ លោក ម៉ៅ វុឌ្ឍី អភិបាលរងនៃគណៈអភិបាលខេត្តសៀមរាប បានអនុញ្ញាតឲ្យគណៈប្រតិភូសកលវិទ្យាធិការនៃសកលវិទ្យាល័យRoiEtRajabhatនៃព្រះរាជាណាចក្រថៃ ដឹកនាំដោយលោកស្រីបណ្ឌិត ឃាវេញ ណំ ព្រឹទ្ធបុរសស្រាវជ្រាវ និង
ទំនាក់ទំនងអន្តរជាតិ ចូលជួបពិភាក្សា នៃកិច្ចសហប្រតិបត្តិការជាអន្តរជាតិក្នុងទស្សនកិច្ចសិក្សាផ្លាស់ប្តូរបទពិសោធន៍ជាមួយខេត្តសៀមរាប នៅរដ្ឋបាលសាលាខេត្តសៀមរាប ។
ក្នុងកិច្ចស្វាគមន៍របស់លោកម៉ៅវុឌ្ឍីក៏បានលើកឡើងពីស្ថានភាពភូមិសាស្ត្រសន្តិសុខសេដ្ឋកិច្ច និងជីវភាពរស់នៅរបស់ប្រជាជន។ម្យ៉ាងទៀតខេត្តសៀមរាបជាអតីតអាណាចក្រអង្គរដ៏ខ្លាំងក្លាមួយ និងជាទីក្រុងដ៏ល្អឯក ផ្នែកវប្បធម៌ប្រវត្តិសាស្ត្រ ដ៏យូរលង់មួយនៅទ្វីបអាស៊ី ដែលមានវប្បធម៌ដ៏សម្បូរបែបជាច្រើន បានបន្សល់ទុកលើទឹកដីមួយនេះដែលញ៉ាំងឲ្យបច្ចុប្បន្នភាពរបស់ខេត្តក្លាយជាតំបន់គោលដៅទេសចរណ៍ វប្បធម៌សំខាន់មួយសម្រាប់ ប្រជាជនគ្រប់ ទិសទីលើ
ពិភពលោក បានកំពុងទាក់ទាញអារម្មណ៍ភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត។លោកម៉ៅវុឌ្ឍីក៏បានលើកឡើងពីវិស័យអប់រំរបស់ខេត្ត ដោយមានកិច្ចសហការជាមួយវិស័យឯកជនបានបង្កើតឲ្យមានសកលវិទ្យាល័យជាច្រើន ក្នុងការបណ្តុះបណ្តាលនូវធនធានមនុស្សក្នុងកិច្ចបម្រើតម្រូវការរបស់ខេត្តសំខាន់លើវិស័យទេសចរណ៍និង ការងាររដ្ឋ
ផងដែរ ។
\លោកក៏បានបញ្ជាក់អំពីកង្វះនៃធនធានមនុស្ស ក្នុងការបណ្តុះបណ្តាលបន្តដល់អ្នកជំនាន់ក្រោយ សំខាន់ក្នុងការត្រៀមលក្ខណៈចូលជាសហគមន៍អាស៊ាននាឆ្នាំ២០១៥ក្នុងការបម្រើទីផ្សារអាស៊ានទៀតផង។ ម្យ៉ាងទៀតសកលវិទ្យាល័យមួយចំនួនក្នុងខេត្តសៀមរាប បានចងសម្ព័ន្ធមេត្រីភាពជាមួយបណ្តាសកលវិទ្យាល័យនានា នៅប្រទេសថៃផងដែរ ។
លោកស្រីបណ្ឌិតឃាវេញណំក៏បានឲ្យដឹងថាសកលវិទ្យាល័យRoiEtRajabhat បានផ្តល់នូវអាហារូបករណ៍ដល់និស្សិតកម្ពុជាក៏ដូចជាមន្ត្រីរាជការឲ្យទៅបន្តការសិក្សានៅប្រទេសថៃចំនួន១០ ក្នុងមួយឆ្នាំដោយ០៥នាក់ផ្នែកគរុកោសល្យ០៥នាក់ទៀតផ្នែកស្រាវជ្រាវតាមដានអប់រំ តែការហូបចុកទទួលខុសត្រូវខ្លួនឯងតែវសនដ្ឋាននោះវិញត្រូវបង់នូវតម្លៃទាប់បំផុត។
ក្នុងនោះដែរលោកស្រីសកលវិទ្យាធិការក៏បានបញ្ជាក់ពីគោលបំណងរបស់គណៈប្រតិភូសកលវិទ្យាល័យRoiEt Rajabhatក្នុងការផ្តួចផ្តើមធ្វើកិច្ចសហប្រតិបត្តិការជាមួយខេត្តសៀមរាបទៅលើវិស័យអប់រំសិក្សា សំខាន់លើកាបណ្តុះបណ្តាលនូវធនធានមនុស្សនៅកម្ពុជា។ម្យ៉ាងទៀតក្នុងពេលកន្លងមកព្រះមហាក្សត្រថៃ បានប្រទាននូវវិទ្យាល័យដល់ស្រុកសម្បូរព្រៃគុបខេត្តកំពង់ធំព្រមទាំងផ្តល់អាហារូបករណ៍ដល់សិស្សពូកែនៃ វិទ្យាល័យនេះ បានទៅសិក្សានៅសកលវិទ្យាល័យ Roi Et Rajabhat ឯកប្រទេសថៃផងដែរ ។
នៅរសៀលថ្ងៃដដែលនោះដែរលោក ម៉ៅ វុឌ្ឍី ក៏បានជួបធ្វើកិច្ចពិភាក្សាជាមួយលោក ង្វៀន ដុកហាញ អគ្គរង អធិការកិច្ចរដ្ឋាភិបាលនៃសាធារណរដ្ឋសង្គមនិយមវៀតណាម និងសហការី អមដំណើរដោយលោក ប៉ែន ច័ន្ធសុរិន អគ្គនាយករដ្ឋបាលកិច្ចការទូទៅ នៃក្រសួងទំនាក់ទំនងជាមួយរដ្ឋសភា ព្រឹទ្ធសភា និង អធិការកិច្ច នៅសណ្ឋាគារអង្គរ សេនជូរី ខេត្តសៀមរាប ។
ក្នុងកិច្ចស្វាគមន៍នោះលោក ម៉ៅ វុឌ្ឍី ក៏បានថ្លែងអំណរគុណចំពោះរដ្ឋាភិបាលវៀតណាម ដែលតែងតែបាន រួមចំណែកស្តារនិងអភិវឌ្ឍន៍មាតុភូមិកម្ពុជាឲ្យមានការរីកចម្រើនលើគ្រប់វិស័យ ពិសេសក្នុងការជួយរំដោះជាតិមាតុភូមិអាយុជីវិតរបស់ប្រជាជនកម្ពុជាពីរបបបប្រល័យពូជសាសន៍ប៉ុលពត។
ការបំពេញទស្សនកិច្ចរបស់គណៈប្រតិភូអគ្គអធិការកិច្ចរដ្ឋាភិបាលនៃសាធារណរដ្ឋសង្គមនិយមវៀតណាម គឺជាការបញ្ជាក់ថែមទៀតនូវទំនាក់ទំនងនិងកិច្ចសហប្រតិបតិ្តការល្អ រវាងថ្នាក់ដឹកនាំក៏ដូចជាប្រជាជននៃប្រទេសវៀតណាមនិងខេត្តសៀមរាប។ក្នុងស្ថានភាពបច្ចុប្បន្ននៃសង្គមកម្ពុជា រួមទាំងខេត្តសៀមរាបផងក្នុងអាណត្តិរាជរដ្ឋាភិបាលនីតិកាលទី៥នៃរដ្ឋសភាក្រោមការដឹកនាំដ៏ឈ្លាសវៃរបស់ សម្តេចតេជោហ៊ុនសែននាយករដ្ឋមន្ត្រីនៃព្រះរាជាណាចក្រ-កម្ពុជាបានដាក់ចេញនូវគោលនយោបាយ យុទ្ធសាស្ត្រចតុកោណដំណាក់កាលទី៣ដោយផ្តោតជាសំខាន់លើការបន្តការកែទម្រង់នានា ដើម្បីធ្វើឲ្យប្រព័ន្ធរដ្ឋបាល ទាំងថ្នាក់ជាតិនិងក្រោមជាតិកាន់តែមានប្រសិទ្ធភាពជាងមុន។
ក្នុងនោះដែរលោកម៉ៅវុឌ្ឍី ក៏បានជម្រាបអំពីការអនុវត្តការងារអធិការកិច្ចរបស់ខេត្តតាមរយៈយន្តការនានាដែលថ្នាក់ជាតិបានដាក់ចេញ ត្រូវបានអនុវត្តកន្លងមកដោយថ្នាក់ក្រោមជាតិការផ្សព្វផ្សាយច្បាប់ស្តីពីការប្រយុទ្ធប្រឆាំងអំពើរលួយ ត្រូវបានផ្សព្វផ្សាយ ជូនដល់ថ្នាក់ដឹកនាំខេត្ត មន្ទីរ-អង្គភាព ក្រុង-ស្រុក ឃុំ-សង្កាត់ និង ការប្រកាសទ្រព្យសម្បត្តិ មន្ត្រី បុគ្គលឹកដែលកើតឡើងពីការបោះឆ្នោតទាំងសកលនិងអសកល។
ការពង្រឹងសេវាសាធារណៈរបស់រដ្ឋ តាមរយៈការចេញលិខិតបទដ្ឋាន គតិយុត្តនានា និងការអនុវត្តជាក់ស្តែងនូវយន្តការច្រកចេញ-ចូលតែមួយ ថ្នាក់ក្រុង និងការបង្កើតក្រុមការងារគណនេយ្យភាពដើម្បីពិនិត្យនូវរាល់ពាក្យបណ្តឹងតាមប្រអប់សំបុត្រ នៅទូទាំងខេត្តរួចធ្វើការដោះស្រាយតាមបែបបទ និងនីតិវិធី។
មានប្រសាសន៍នោះដែរលោកង្វៀនដុកហាញក៏បានគូសបញ្ជាក់ថា ដំណើរទស្សនកិច្ចលើទឹកដីប្រវត្តិសាស្ត្រសៀមរាប គឺធ្វើឲ្យការទំនាក់ទំនងចំណងមិត្តភាពនៃប្រទេសទាំងពីរកាន់តែមានភាពរឹងមាំសំខាន់រវាងក្រសួងទំនាក់ទំនង ជាមួយរដ្ឋសភា ព្រឹទ្ធសភា និង អធិការកិច្ចនៃប្រទេសទាំងពីរ ដោយឡែកមន្ទីរទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ចខេត្តសៀមរាបធ្វើការផ្លាស់ប្តូរគ្នានូវបទពិសោធន៍បច្ចេកទេសពីគ្នាទៅវិញទៅមកផងដែរ។
ម្យ៉ាងទៀតដំណើរទស្សនៈកិច្ចនេះក៏ជាការស្វែងយល់អំពីការងារអធិការកិច្ចការប្រឆាំងអំពើពុករលួយ។ ឯកឧត្តមប្រធានគណៈប្រតិភូក៏បានផ្តល់នូវបទពិសោធន៍វិធានការល្អៗមួយចំនួន ដើម្បីជាមូលដ្ឋានគ្រឹះសម្រាប់មន្ត្រីអនុវត្តច្បាប់ធ្វើជាទុនក្នុងការអនុវត្ត ការងារអធិការកិច្ចឲ្យទទួលបានលទ្ធផលជាផ្លែផ្កាលើការដោះស្រាយនូវរាល់ពាក្យបណ្តឹងរបស់ប្រជាពលរដ្ឋ ដោយត្រូវ ធ្វើការពិនិត្យ តាមដានឲ្យបានសព្វជ្រុងជ្រោយទៅលើករណីនិមួយៗដែលពាក់ព័ន្ធទៅនឹងរដ្ឋបាលនិង ការងារយុត្តិធម៌ ផងដែរ ។
ក្នុងរាត្រីនោះដែរក៏មានធ្វើការលៀងសាយភោជន៍នៅសណ្ឋាគារឡូសទស្សន៍ ក្រោមវត្តមានអញ្ជើញចូលរួមរបស់លោកឃឹមប៊ុនសុងអភិបាលនៃគណៈអភិបាលខេត្ត និងអស់លោកជាគណៈអភិបាលខេត្តសមាជិកក្រុមប្រឹក្សាខេត្តថ្នាក់ដឹកនាំមន្ទីរ ដែលរៀបចំឡើងដោយសាលាខេត្តសៀមរាប ក្នុងលក្ខណៈជាមិត្តភាពស្និតស្នាលផងដែរ ៕
