កំពង់ចាម៖ នគរបាលស្រុកស្ទឹងត្រង់ និងនគរបាលការិយាល័យប្រឆាំងគ្រឿងញៀនខេត្ត បានឃាត់ខ្លួនជនសង្ស័យចំនួន៣នាក់ ករណីជួញដូរគ្រឿងញៀន ហើយបញ្ជូនទៅសាលាដំបូងខេត្តនៅរសៀលថ្ងៃទី២៧ ខែវិច្ឆិកា ឆ្នាំ២០១៤នេះ ។ លោក វរៈសេនីយ៍ទោ សោម រស់
នាយការិយាល័យប្រឆាំងគ្រឿងញៀនបានបញ្ជាក់ឲ្យដឹងថា នៅព្រឹកថ្ងៃទី២៥ ខែវិច្ឆិកា ឆ្នាំ២០១៤ កម្លាំងនគរបាលស្រុកស្ទឹងត្រង់ បានចុះប្រតិបត្តិការបង្ក្រាបការជួញដូរគ្រឿង ១ករណី ចំណុចសាលាអនុវិទ្យាល័យសូភាស ស្ថិតក្នុងភូមិសូភាស ឃុំសូភាស ស្រុកស្ទឹងត្រង់ ខេត្តកំពង់ចាម ។
ឃាត់ខ្លួនជនសង្ស័យបាន១នាក់ ឈ្មោះ ស្រេង គឹមហេង ហៅ ជ្រូក ភេទប្រុស អាយុ២១ឆ្នាំ រស់នៅភូមិសូភាស ឃុំសូភាស ស្រុកស្ទឹងត្រង់ ខេត្តកំពង់ចាម និងដកហូតវត្ថុតាងថ្នាំញៀនបានចំនួន១កញ្ចប់ផងដែរ ។
លោកនាយការិយាល័យបានបន្តទៀតថា នៅរសៀលថ្ងៃទី២៦ ខែវិច្ឆិកា ឆ្នាំ២០១៤ កម្លាំការិយាល័យប្រឆាំងគ្រឿងញៀន បានបង្ក្រាបករណីជួញដូរគ្រឿងញៀន១ករណី នៅក្នុងក្រុងកំពង់ចាម ចំណុចផ្ទះសំណាក់ពន្លឺពេជ្យ ស្ថិតក្នុងភូមិនាងគង្ហីង សង្កាត់សំបួរមាសក្រុង-ខេត្តកំពង់ចាម ឃាត់ខ្លួនជនសង្ស័យបានចំនួន២នាក់ ។
១-ឈ្មោះ ចូវ សុជាតិ ភេទប្រុស អាយុ២៨ឆ្នាំ រស់នៅភូមិទី៣ សង្កាត់វាលវង់ ក្រុង-ខេត្តកំពង់ចាម ។ ២-ឈ្មោះ ហៃ ម៉ាឡៃ ហៅ ប្រុស ភេទប្រុស អាយុ២៧ឆ្នាំ រស់នៅភូមិអំពិលក្រោម ឃុំអំពិល ស្រុកកំពង់សៀម ខេត្តកំពង់ចាម ដកហូតវត្ថុតាងបានចំនួន២កញ្ចប់ និងឧបករណ៍សេពមួយចំនួន ។ទាំង២ករណីនេះជំនាញកំពុងធ្វើការស្រាវជ្រាវ និងចងក្រងសំណុំរឿងបញ្ជូន ទៅសាលាដំបូងចាត់ការទៅតាមនីតិវិធី ៕
