ភ្នំពេញៈ បុរសបរទេសម្នាក់ បានរងបួសធ្ងន់ ដោយសារស្រវឹងស្រាបើកម៉ូតូបុកអ្នករត់ម៉ូតូឌុបពីក្រោយ កាលពីវេលាម៉ោង១២:១០នាទី រំលងអធ្រាត្រឈានចូលថ្ងៃទី២៨ ខែវិច្ឆិកា ឆ្នាំ២០១៤ នៅចំណុចមុខរោងភាពយន្តលុច ស្ថិតតាមបណ្តោយផ្លូវព្រះស៊ីសុវត្តិ កែងនឹងផ្លូវ១៤៨ ស្ថិតក្នុងសង្កាត់
ផ្សារកណ្តាលទី២ ខណ្ឌដូនពេញ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ ដែលជាអ្នករត់ម៉ូតូឌុបបានជិះម៉ូតូម៉ាក ហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1C-9866 ធ្វើដំណើរតាមបណ្តោយផ្លូវលេខ១៤៨ ក្នុងទិសដៅពីកើតទៅលិច ខណៈមកដល់ចំណុចមុខរោងភាពយន្តលុច ស្រាប់តែមានបុរសជនជាតិបរទេសម្នាក់ ទំនងជាស្រវឹងស្រាជោកជាំ
បានបើកម៉ូតូម៉ាក ហាយ៉ាតេ ពណ៌ខ្មៅ ពាក់ស្លាកលេខ ភ្នំពេញ 1W- 2384 ធ្វើដំណើរស្របទិសគ្នាក្នុងល្បឿនយ៉ាងលឿន ជ្រុលបុកអ្នករត់ម៉ូតូឌុបពីក្រោយពេញទំហឹង បណ្តាលឲ្យម៉ូតូខ្ទាតពេញផ្លូវរងការខូចខាត ហើយជនបរទេសនោះ រងរបួសធ្ងន់បែកមុខបែកមាត់ ចំណែកភាគីម្ខាងទៀតរងរបួសស្រាល។
ក្រោយពេលកើតហេតុ សមត្ថកិច្ចមូលដ្ឋានបានចុះមកធ្វើការអន្តរាគមន៍ភ្លាមៗ ប៉ុន្តែភាគីទាំងសងខាងបានសម្របសម្រួលគ្នា ដោយភាគីខាងជនបរទេសដឹងពីកំហុសរបស់ខ្លួន ក៏សុខចិត្តសងថ្លៃខូចខាតទៅខាងភាគីអ្នករត់ម៉ូតូឌុប ដើម្បីបញ្ចប់រឿង៕
