ភ្នំពេញៈ យុវជន៣នាក់ បានរងរបួសធ្ងន់ធ្ងរ បន្ទាប់ពីពួកគេជិះម៉ូតូមួយគ្រឿង តាមបណ្តោយផ្លូវលេខ៣០ម៉ែត្រ ស្ថិតក្នុងភូមិមានជ័យ សង្កាត់ស្ទឹងមានជ័យ ខណ្ឌមានជ័យ ហើយត្រូវរថយន្តនីសាន់បុកចំពីមុខពេញទំហឹង បណ្តាលឲ្យខ្ទាតទាំងម៉ូតូ និងមនុស្សជាង២០ម៉ែត្រ។ ហេតុការណ៍
គ្រោះថ្នាក់នេះ កើតឡើងកាលពីវេលាម៉ោង៣ទៀបភ្លឺ ថ្ងៃទី២៨ ខែវិច្ឆិកា ឆ្នាំ២០១៤។
ប្រភពព័ត៌មានពីសាក្សីនៅកន្លែងកើតហេតុ បានរៀបរាប់ឲ្យដឹងថា មុនពេលកើតហេតុ ដំបូងឡើយមានយុវជន៣នាក់ ជិះម៉ូតូ១គ្រឿងម៉ាក ហុងដាឌ្រីម ធុនសេ១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខ កំពង់ចាម 1E-1314 ជិះឌុបគ្នាធ្វើដំណើរតាមបណ្តោយផ្លូវលេខ៣០ម៉ែត្រ ទិសដៅពីជើងទៅត្បូងក្នុងល្បឿនល្មម។ លុះមកដល់កន្លែងកើតហេតុ ស្រាប់ត្រូវរថយន្តមួយគ្រឿងម៉ាក នីសាន់ធុនតូច ពណ៌ខ្មៅ ពាក់ស្លាកលេខ ភ្នំពេញ 2F-3006 បើកបរដោយបុរសម្នាក់ ក្នុងស្ថានភាពស្រវឹង តាមបណ្តោយផ្លូវលេខ៣០ម៉ែត្រ ទិសដៅបញ្ច្រាសជាមួយម៉ូតូជនរងគ្រោះ បានបុកចំពីមុខពេញទំហឹង បណ្តាលឲ្យទាំងម៉ូតូ និងយុវជនទាំង៣នាក់ ត្រូវខ្ទាតជាង២០ម៉ែត្រ ដួលបោកផ្ទប់ទៅនឹងថ្នល់រងរបួសធ្ងន់ធ្ងរ។
ជនរងគ្រោះទាំង៣នាក់ ត្រូវបានរថយន្តសាមុយរបស់មន្ទីរពេទ្យឯកជនមកដឹកយកទៅសង្គ្រោះនៅមន្ទីរពេទ្យភ្លាមៗ ចំណែករថយន្តបង្កបានព្យាយាមបើករត់គេចខ្លួន តែបើករត់បានជាង១គីឡូម៉ែត្រ ក៏ត្រូវសមត្ថកិច្ចស្ទាក់ចាប់បាន។ ម៉ូតូ និងរថយន្តបង្ក ត្រូវរងការខូចខាតយ៉ាងដំណំដូចគ្នា។
ក្រោយកើតហេតុ សមត្ថកិច្ចមូលដ្ឋាន សហការជាមួយសមត្ថកិច្ចនគរបាលជំនាញចុះអន្តរាគមន៍វាស់វែង ស្ទូចទាំងរថយន្តបង្ក និងម៉ូតូជនរងគ្រោះ ទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយតាមផ្លូវច្បាប់៕
