កណ្ដាលៈ បុរសម្នាក់ បានរងរបួសធ្ងន់ធ្ងរ បន្ទាប់ពីត្រូវមិត្តភ័ក្តក្នុងវង់ផឹកស៊ីយកកែវវាយលើផ្ទៃមុខ បណ្ដាលឲ្យបែករយះហូរឈាម ដេរអស់ជាច្រើនថ្នេរ។ ហេតុការណ៍ហិង្សាក្នុងវង់ផឹកស៊ីនេះ បានកើតឡើងនៅវេលាម៉ោង៩:១០នាទី យប់ថ្ងៃទី២៧ ខែវិច្ឆិកា ឆ្នាំ២០១៤ នៅចំណុចលើគ្រែឫស្សីជាប់
ផ្លូវលំ ស្ថិតក្នុងភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្ដាល។
សមត្ថកិច្ចនគរបាលប៉ុស្តិ៍កំពង់ស្វាយ បានប្រាប់ឲ្យដឹងថា ជនសង្ស័យបង្ករបួសស្នាមខាងលើ ឈ្មោះ សុង ប៊ុនសួរ ភេទប្រុស អាយុ៣៤ឆ្នាំ មុខរបរកសិករ បច្ចុប្បន្នរស់នៅភូមិឃុំកើតហេតុ រីឯជនរងគ្រោះមានឈ្មោះ ធឿន ធី ភេទប្រុស អាយុ២៧ឆ្នាំ មុខរបរកសិករ រស់នៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្ដាល។
នគរបាលប៉ុស្តិ៍កំពង់ស្វាយ បានបន្តថា នៅមុនពេលកើតហេតុ ជនសង្ស័យបានអង្គុយផឹកស្រាជាមួយមិត្តភក្រ័៣នាក់ទៀត ស្របពេលនោះក៏កើតមានជម្លោះទំនាស់ទាស់ពាក្យសម្ដីគ្នា ធ្វើឲ្យជនសង្ស័យខឹងសម្បារយ៉ាងខ្លាំង ក៏ទាញយកកែវស្រាមានដៃកាន់វាយទៅលើផ្ទៃមុខជនរងគ្រោះ បណ្ដាលឲ្យបែករយះហូរឈាមស្រោចខ្លួន ត្រូវបានដឹកបញ្ជូនទៅសង្គ្រោះភ្លាមៗផងដែរ។
បច្ចុប្បន្នជនសង្ស័យបង្កហេតុខាងលើ ត្រូវបានសមត្ថកិច្ចនគរបាលមូលដ្ឋានចាប់ឃាត់ខ្លួន ដើម្បីធ្វើការសាកសួរ និងកសាងសំណុំរឿងតាមនីតិវិធី រួចបញ្ជូនទៅអធិការដ្នាននគរបាលស្រុក មានចំណាត់ការបន្តតាមផ្លូវច្បាប់៕
x
