ខេត្តបន្ទាយមានជ័យ៖ស្ត្រីម្នាក់ត្រូវពស់វែកស្រកាចាស់ចឹកបណ្តាលឲ្យស្លាប់ចោលប្តីនិងកូនប្រុសស្រីចំនួន៤នាក់ពេលដែស្ត្រីរងគ្រោះចុះពីលើផ្ទះដើរទៅដាំបាយនៅក្រោមផ្ទះ។ហេតុការណ៍ពស់ចឹកស្ត្រីនេះកើតឡើងកាលពីវេលាម៉ោង៦និង៣០ល្ងាចថ្ងៃទី២៧ ខែវិច្ឆិកា ឆ្នាំ២០១៤ នៅចំណុចភូមិ
ចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
លោកអនុសេនីយ៍ឯក សុង សុខុន អធិការរងនគរបាលស្រុកស្វាយចេក ទទួលការងារ ព្រហ្មទណ្ឌ បានប្រាប់ឱ្យដឹងថា ស្ត្រីរងគ្រោះមានឈ្មោះ សុខ ណាង អាយុ៣៣ឆ្នាំ មានប្តីនិង កូនប្រុសស្រីចំនួន៤នាក់ក្នុងបន្ទុក បច្ចុប្បន្នរស់នៅភូមិឃុំកើតហេតុខាងលើ។ លោកអធិការរងបានបន្តឱ្យដឹងទៀតថា ក្នុងហេតុការណ៍នេះបើតាមសាច់ញាតិក្រុម គ្រួសារស្ត្រីរងគ្រោះប្រាប់សមត្ថកិច្ចថា មុនពេលកើតហេតុ ស្ត្រីរងគ្រោះបានដើរចុះពីលើផ្ទះទៅផ្ទះបាយដើម្បីដាំបាយអោយប្តីនិងកូនហូបនៅពេល្ងាច ។
ពេលគាត់មិនទាន់ដើរដល់ផ្ទះបាយផង គួបផ្សំនិងមេឃងងឹតមើលពុំសូវឃើញ ស្រាប់តែដើរទៅជាន់ពស់ស្រកាចាស់ ក៏ត្រូវពស់ចឹកចំខ្នងជើងខាងស្តាំ ។ រំពេចនោះគាត់ក៏ស្រែកឱ្យគេជួយថា មានពស់ចឹកគាត់ហើយ ដោយឮដូច្នេះ ប្តីស្ត្រីរងគ្រោះក៏ចុះពីលើផ្ទះវាយពស់នោះងាប់នៅកន្លែងកើតហេតុ ។
លោកអធិការរងនគរបាលស្រុកស្វាយចេក បានបន្តឱ្យដឹងទៀតថា ក្រោយពីពស់ចឹកស្ត្រីនោះភ្លាម ក្រុមគ្រួសារស្ត្រីរងគ្រោះក៏ដឹកបញ្ជូនមកកាន់មន្ទីរពេទ្យដើម្បីជួយសង្គ្រោះ ដែរប៉ុន្តែដោយសារតែ ផ្លូវលំបាកដោយផ្ទះស្ត្រីរងគ្រោះនៅតំបន់ដាច់ស្រយាលពីទីប្រជុំឆ្ងាយពីមន្ទីរពេទ្យ ស្ត្រីរងគ្រោះក៏ត្រូវដាច់ខ្យល់ស្លាប់នៅពាក់កណ្តាលផ្លូវតែម្តង ត្រូវបានក្រុមគ្រួសារដឹក ត្រឡប់មកផ្ទះវិញដើម្បីចាត់ចែងធ្វើបុណ្យសពតាមប្រពៃណី នៅថ្ងៃនោះផងដែរ៕
