កំពង់ឆ្នាំង៖ស្ត្រីម្នាក់ត្រូវសត្វពស់ពព្លាក់ចឹកចំជើងខាងឆ្វេង ខណះដែលរូបគាត់កំពុងតែច្រូតស្រូវក្នុងស្រែក្បែរភូមិ ហើយត្រូវបានកូនដឹកតាមម៉ូតូយកមកសង្គ្រោះនៅមន្ទីរពេទ្យខេត្ត។រឿងនេះបានកើតឡើងនៅវេលាម៉ោង១០ព្រឹក ថ្ងៃទី២៧ ខែវិច្ឆិកា ឆ្នាំ២០១៤នៅក្នុងភូមិអាឡែង ឃុំជ្រៃបាក់ ស្រុករលារប្អៀរ។
ស្ត្រីរងគ្រោះ ឈ្មោះ គឿន អាយុ៤៣ឆ្នាំ មានទីលំក្នុងភូមិឃុំខាងលើ បាននិយាយអោយដឹងថា៖នៅមុនពេលកើតហេតុ ពេលគាត់កំពុងតែអោនច្រូតស្រូវក៏បានជាន់ចំពស់ពព្លាក់ តែដកជើងមិនទាន់ស្រាប់តែពស់នោះបានចឹកចំប្រអប់ជើងគាត់។
ភ្លាមៗនោះពឹសក៏បានជ្រាបចូលពេញខ្លួនប្រាណរបស់គាត់ធ្វើអោយគាត់ឈឺចុកចាប់យ៉ាងខ្លាំង ដោយភ័យផងឈឺផងគាត់ក៏បានស្រែកហៅអោយគេជួយ ពេលនោះអ្នកជិតខាងបានរត់ទៅជួយគាត់ និងអ្នកខ្លះ បានទៅតាមប្តីនិងកូនរបស់ គត់អោយមកយកគាត់ទៅមន្ទីរពេទ្យខេត្ត។ 
បច្ចុប្បន្នស្ត្រីរងគ្រោះបានធូរស្បើយខ្លះហើយ ដោយលោកគ្រូពេទ្យខេត្ត បានចាក់ថ្នាំបន្សាបជាតិពឹសអោយ នេះក៏ដោយសារក្រុមគ្រួសារយកជនរងគ្រោះដែលត្រួវពស់ចឹកមក កាន់មន្ទីរពេទ្យខេត្តបានទាន់ពេល៕
