កំពង់ឆ្នាំង៖បុរសម្នាក់បានរងរបួសលើក្បាលពីក្រោយជាទម្ងន់ត្រូវបានមិត្តភ័ក្រដឹកតាមម៉ូតូយកមកសង្គ្រោះនៅមន្ទីរពេទ្យខេត្តកំពង់ឆ្នាំង ខណះដែលបុរសរងគ្រោះជិះម៉ូតូអោបកង់គោយន្តពីក្រោយមិត្តភ័ក្រដែលជាអ្នកឌុប ពេលដល់ផ្លូវទឹករលកអត់មានអីតោងក៏ធ្លាក់ពីលើម៉ូតូផ្ងាកមកក្រោយទាំង
មនុស្សទាំងកង់គោយន្ត។ហេតុការណ៏នេះបានកើតឡើងនៅវេលាម៉ោង៩និង១៥នាទីថ្ងៃទី២៧ ខែវិច្ឆិកា ឆ្នាំ២០១៤ នៅមុខវត្តភ្នំតូច ស្ថិតក្នុងភូមិខ្លុងពពក ឃុំខ្លុងពពក ស្រុកទឹកផុស។
មិត្តភ័ក្រជនរងគ្រោះដែលជាអ្នកឌុបម៉ូតូជនរងគ្រោះបាននិយាយអោយដឹងថា៖បុរសរងគ្រោះឈ្មោះ គុយ អាយុ៣៤ឆ្នាំ រស់នៅក្នុងភូមិត្រពាំងក្របៅ ឃុំខ្លុងពពក ស្រុកទឹកផុស មុខជារបរជាកសិករ។នៅមុនពេលកើតហេតុរូបគេបានឌុបជនរងគ្រោះមកទិញកង់គោយន្តនៅក្នុងក្រុងកំពង់ឆ្នាំង ពេលទិញបានហើយរូបគេក៏ឌុបជនរងគ្រោះត្រឡប់មកផ្ទះវិញ ដោយអោយជនរងគ្រោះអង្គុយអោបកង់គោយន្តពីក្រោយ លុះជិះមកដល់ចំណុចខាងលើ ដោយសារតែ
ស្ថានភាពផ្លូវនៅទីនោះដូចទឹករលក និងម្យ៉ាងដោយជនរងគ្រោះគ្មានអ្វីតោងផងនោះក៏ធ្លាក់ទាំងមនុស្សនិងកង់គោយន្តផ្ងាកក្រោយបោកក្បាលទៅនិងថ្នល់កៅស៊ូតែម្តង ភ្លាមៗនោះដែររូបគេក៏បានហៅម៉ូឌុបមួយគ្រឿងផ្សេងទៀតដឹកជនរងគ្រោះមកកាន់មន្តីរពេទ្យខេត្តដោយរូបគេជាអ្នកអោបជនរងគ្រោះពីក្រោយ។
នៅក្នុងមន្ទីរពេទ្យជនរងគ្រោះមានអាការៈប្រកាច់រើបម្រាស់ជាញឹកញាប់ ស្រវ៉ាអោបគេឯងទាំងមិនដឹងខ្លួន ថែមទាំងស្រែកថារូបគេវិលមុខខ្លាំងណាស់ៗ ករណីនេះគ្រូពេទ្យខេត្តបានព្យាយាមជួយសង្គ្រោះយ៉ាងយកចិត្តទុកដាក់ផងដែរ។គ្រូពេទ្យម្នាក់បានបង្ហើបប្រាប់ថា៖របួសលើក្បាលពីក្រោយមានសភាពធ្ងន់ធ្ងរគ្រូពេទ្យខេត្តនិងត្រូវបញ្ជូនជនរងគ្រោះទៅសង្គ្រោះនៅមន្ទីរពេទ្យក្រុងភ្នំពេញជាបន្តទៀត៕
