ខេត្តសៀមរាប៖ បុគ្គលិក ប្រុស ស្រី ប្រមាណជាជិត៥០នាក់ បានមកប្រមូលផ្តុំគា្នធ្វើកូដកម្មនៅមុខសណ្ឋាគារអប្សរា ហូលីដេ ខណៈពេលដែលថៅកែសណ្ឋាគារជាជនជាតិចិននោះ មិនគោរពកិច្ចសន្យា នៃច្បាប់របស់ព្រះរាជាណាចក្រកម្ពុជា ហើយ កូដកម្ម នោះ ពួកគាត់ថា មិនត្រូវបាន
រំសាយទៅវិញនោះទេ ដោយអាជ្ញាធរបានប្រឹងប្រែងជួយរកដំណោះស្រាយជាច្រើនដងមិនមានលទ្ធផល ដោយសារថៅកែជាជនជាតិចិនរូបនោះមានចេតនាមិនគោរពច្បាប់។ 
បុគ្គលិកសណ្ឋាគារអប្សរា ហូលីដេ បានប្រមូលផ្តុំគ្នាធ្វើកូដកម្ម .សារជាថ្មីបានធ្វើឡើងចាប់តាំងពីព្រឹក ថ្ងៃទី២៧ខែវិច្ឆិកា នៅមុខបរិវេណសណ្ឋាគារ អប្សរាហូលីដេ ដែលមានទីតាំងនៅតាមបណ្តោយផ្លូវជាតិលេខ៦ ស្ថិតក្នុងភូមិសាលា កន្សែង សង្កាត់ស្វាយដង្គំ ក្រុងសៀមរាប។ តំណាងក្រុមអ្នកតវ៉ាបានឲ្យដឹងថា ពួកគាត់ពុំមានគំនិតប្រមូលផ្តុំគ្នាធ្វើបែបនេះទេ មូលហេតុដោយសារថៅកែចិននោះ បានបញ្ឈប់បុគ្គលិកចំនួន១៥នាក់ដែលត្រូវប្តឹង ការរំលាយកិច្ចសន្យា កាលពីថ្ងៃទី២៩ ខែមេសា ឆ្នាំ២០១៤ ថែមទាំងមិនចង់ឃើញ កូដកម្ម ឬ បាតុកម្មអ្វីនោះទេ គឺចង់ត្រឹមតែមានការងារធ្វើនិងបានប្រាក់ខែសមរម្យ សម្រាប់ចិញ្ចឹមជីវិតនិងគ្រួសារតែប៉ុណ្ណោះ។
តំណាងក្រុមអ្នកតវ៉ាបានបន្តថា មិនដឹងពីមូលហេតុច្បាស់លាស់ សុខៗថៅកែនោះបានហៅមកប្រកាស រំលាយកិច្ចសន្យា ទាំងអ្នកខ្លះធ្លាប់ធ្វើការងរចាប់តាំងពីសណ្ឋាគារ ដំណើរការបុកគ្រឹះលើកដំបូងមកម្ល៉េះ ឯខ្លះទៀតចូលធ្វើ បន្ត បន្ទាប់ រហូតអ្នកខ្លះទើបបាន៥ទៅ៦ខែក៏មាន។ ថៅកែសណ្ឋាគារនោះ មុននឹងឲ្យបុគ្គលិកចូលធ្វើការ ត្រូវឲ្យចុះកិច្ចសន្យាការងារជាមួយសិន រយៈ ពេល២ឆ្នាំម្តង ដូច្នេះមុនពេលបញ្ឃប់ពួកគាត់មិនចាំបាច់ត្រូវបើកប្រាក់ខែ តាមកិច្ចសន្យារយៈពេលពីរឆ្នាំ នោះទេ។ ជាក់ ស្តែងពេលនេះថៅកែបានបញ្ឍប់បុគ្គលិកផ្នែកអគ្គិសនីពីរនាក់រួចមកហើយ ដោយពុំបានបើកប្រាក់ខែឲ្យនោះទេ។
លោកម៉ម រិទ្ធី ប្រធានសហពន្ធ័សហជីព វិស័យទេសចរណ៏កម្ពុជា បានឲ្យដឹងតាមទូរសព្ទ័នៅព្រឹកថ្ងៃទី២៧ខែវិច្ឆិកា នេះថា កូដកម្ម នោះគឺនៅតែបន្ត ធ្វើរហូតដល់មានដំណោះស្រាយណាមួយសមរម្យ។លោកបន្តថា នៅក្នុងសណ្ឋាគារអប្សរាហូលីដេ ថៅកែចិននិងបុគ្គលិកបានព្រមព្រៀងគ្នា ធ្វើកិច្ចសន្យាអំពីការងាររយៈពេល២ឆ្នាំម្តង ថ្មីៗនេះស្រាប់តែថៅកែនោះបានចេញសេចក្តីប្រកាសរំលាយកិច្ចសន្យានោះចោលទាំងស្រុង ការប្រកាសរំលាយកិច្ចសន្យា មានន័យថា អាចបញ្ឍប់បុគ្គលិករូបណាម្នាក់ នៅម៉ោងណាក៏បានដោយមិនចាំបាច់បើកប្រាក់ខែឲ្យទេ ទាំងពួកគាត់មិនទាន់ ចប់កុងត្រានៅឡើយផង។
លោកបន្តទៀតថា ចំណុចមួយទៀតក្រោយរំលាយកិច្ចសន្យា ថៅកែចិននោះបានផ្លាស់ប្តូរបុគ្គលិកតាមតែអំពើចិត្ត ដោយអ្នកខ្លះមាន ជំនាញគ្រប់គ្រងផ្នែកនិមួយៗបានប្រាក់ខែចាប់ពី៨០០ទៅ១០០០ដុល្លារ ប្តូរអ្នកទាំងនោះមកឲ្យកាន់កន្លែងផ្សេង ដែលទទួលប្រាក់ខែបានត្រឹម តែ៤០០ ដុល្លារទៅវិញ ចំណែកបុគ្គលិកធម្មតាអ្នកខ្លះធ្វើការច្រើនឆ្នាំមកហើយ នៅតែទទួលប្រាក់ខែត្រឹម៧០ទៅ៨០ ដុល្លារដដែល មិនតែប៉ុណ្ណោះថៅកែនោះអាចបញ្ឃប់ពួកគាត់ពេលណាក៏បាន ដោយមិន ចាំបាច់យកកិច្ចសន្យាមកនិយាយជាមួយបុគ្គលិកនោះទៀតផង ។
លោកបន្ថែមទៀតថា ពួកគាត់សុំទាមទារចំណុចទាំង៥គឺ ទី១ ទទួលបុគ្គលិកប្រុស ស្រី ទាំង១៥នាក់នោះចូលធ្វើការងារវិញដោយគ្មានលក្ខ័ណអ្វីទាំងអស់ ទី២ ត្រូវតែគោរពច្បាប់ការងារ ទី៣ លក្ខ័ណការងារចាស់ត្រូវយកមកអនុវត្តមិនអាចយកលក្ខ័ណថ្មីមកនោះទេ ទី៤ រឿងប្រាក់ខែបុគ្គលិកត្រូវតែតំឡើង ទី៥ វាជារឿងបន្ទាប់បន្សំទេ វានេះជារឿងសម្ខាន់សម្រាប់ខាងអាជ្ញាធរទេ ហើយរឿងនេះលែងមានការដោះស្រាយតទោទៀតហើយ មានតែរឿងបន្តធ្វើកូដកម្មតែប៉ុណ្ណោះ ព្រោះអភិបាលខេត្តមិនអាចនិយាយជាមួយថៅកែចិននោះបានផង ចុះទំរាំកម្មករគ្មានសិទ្ធអីទៅនិយាយបាននោះ ដូច្នេះពួកគាត់ត្រូវតែបង្ខំនាំគ្នាធ្វើកូដកម្ម ទាមទារឲ្យថៅកែចិននោះគោរពកិច្ចសន្យានិង ច្បាប់ នៃព្រះរាជានាចក្រកម្ពុជា។
លោក សូ ប្លាតុង អភិបាលស្តីទី ក្រុងសៀមរាបបានឲ្យដឹងថា ករណីវិវាទរវាងថៅកែសណ្ឋាគារអប្សរា ហូលីដេ និងបុគ្គលិកនោះ ជារឿងមួយដែលអាជ្ញាធរបានប្រឹងប្រែងជួយសម្របសម្រួលជាច្រើនដង ប៉ុន្តែភាគីខាងបុគ្គលិកបានទាមទារឲ្យបើកប្រាក់ខែចំនួន៣ម៉ឺនដុល្លា រីឯ ម្ចាស់សណ្ឋាគារខាងលើមានលទ្ធភាពតែ៣ពាន់ដុល្លា ដើម្បីបញ្ចប់រឿងប៉ុណ្ណោះ ដូច្នេះអាជ្ញាធរមានការពិបាកក្នុងការសម្របសម្រួលខ្លាំងណាស់ ដោយពួកគេទាំងសងខាង មិនមានភាពយោគយល់គ្នាមួយនោះទេ៕
