(ខេត្តព្រៃវែង) បឹងចាក់ខ្លាញ់ស្ថិតនៅក្នុងភូមិបាទី ឃុំពាមរក៍ ស្រុកពាមរក៍ ខេត្តព្រៃវែង ។ បឹងនេះមាន ទំហំធំល្វឹងល្វើយ បច្ចុប្បន្ននៅសល់តូច ព្រោះអាជ្ញាធរឃុបឃិតលក់ដីបឹងតាំងពីដូនតា និងអនុញ្ញាតអោយសាង សង់ផ្ទះនៅលើដីបឹងបានយ៉ាងរលូនទៀតផង ។ នេះសរ
បញ្ជាក់អោយឃើញថា អាជ្ញាធរស្រុកពាមរក៍ បើកភ្លើង ខៀវយ៉ាងពិតប្រាកដទើបម្ចាស់ផ្ទះសាងសង់បានយ៉ាងស្រួលបែបនេះ ។
ប្រជាពលរដ្ឋនៅក្នុងឃុំពាមរក៍ អ្នកដែលអត់មានដីចង់ទៅសាងសង់ផ្ទះនៅលើដីបឹងចាក់ខ្លាញ់នេះដែរ តែអាជ្ញាធរមិនអនុញ្ញាតជាដាច់ខាត បើសិនគ្មានកាដូសមរម្យជូនអាជ្ញាធរស្រុកពាមរក៍នោះទេ ។ ប្រភពខាងលើបាន បន្តអោយដឹងទៀតថា អ្នកដែលសាងសង់ផ្ទះបានហើយកំពុងរស់នៅរាល់ថ្ងៃនេះ គឺពួកគាត់ បានជូនកាដូយ៉ាង គាប់ចិត្តទៅលោកធំដែលជាអាជ្ញាធរស្រុកពាមរក៍ ទើបរស់នៅបានយ៉ាងសុខសាន្តបែបនេះ ។
បើមិនដូច្នេះទេ លើកតែជើងសសរមួយដើមមិនបានផង អាជ្ញាធរប្រាកដជាចុះមកហាមឃាត់ភ្លាមៗ ជាមិនខាន សុភាសិតមួយឃ្លាបានពោលថា “អាសាច់ជូនខ្លា ទើបនៅស្រុកបាន” ។
ដូច្នេះបើចង់មកសង់ផ្ទះនៅលើដីបឹងចាក់ខ្លាញ់ សូមអានសុភាសិតនេះជាមុនសិន ។
លោក អឿ លុច មេឃុំពាមរក៍ បានប្រាប់កម្ពុជាថ្មីតាមទូរស័ព្ទអោយដឹងថា លោកទើបឡើងមកកាន់ជា មេឃុំថ្មី សំណង់ដែលសង់នៅលើដីបឹងចាក់ខ្លាញ់ គឺគេសង់យូរណាស់មកហើយ។ បច្ចុប្បន្ននេះ លោកបានទប់ ស្កាត់មិនអោយមានការសាងសង់ថ្មីបន្ថែមទៀត កុំអីសំណង់អនាធិបតេយ្យកើតមានពេញតាមដីមាត់បឹងចាក់ខ្លាញ់ជាមិនខាន ។
លោក ជុំ សាមឿន អភិបាលស្រុកពាមរក៍ ក៏បានប្រាប់កម្ពុជាថ្មីអោយដឹងផងដែរថា លោក បានចាត់មន្ត្រី ជំនាញសហការជាមួយលោក មេឃុំ អោយចុះធ្វើស្ថិតិស្រង់ចំនួនផ្ទះដែលនៅលើដីបឹងចាក់ខ្លាញ់អោយ បានច្បាស់លាស់មកដល់ពេលនេះ លោកមិនទាន់បានទទួលរបាយការណ៍នៅឡើយទេ ។ លោកបន្តទៀតថា ពេល បានរបាយការណ៍ច្បាស់លាស់ហើយ លោកនឹងចាត់វិធានការទៅតាមផ្លូវច្បាប់ មិនអនុញ្ញាតអោយមានសំណង់ អនាធិបតេយ្យនៅលើដីបឹងចាក់ខ្លាញ់ទៀតទេ ។
