បន្ទាយមានជ័យ: ឯកឧត្ដម គោស៊ុំ សារឿត អភិបាលខេត្តបន្ទាយមានជ័យ បានព្រមានខ្លាំងថា រឿងរត់ពន្ធ និងនាំចូលឡានចង្កូតស្តាំ ធ្លាប់ត្រូវដកស្នងការប៉ូលិសខេត្ត មេគយ និងមន្ត្រីគយខេត្ត គយច្រកជាច្រើន នាពេលកន្លងមក។ ឥឡូវនេះ អង្គភាពប្រឆាំងអំពើពុករលួយ ធុំក្លិនទៀតហើយ
ចូរប្រយ័ត្ន!។ឯកឧត្ដម គោស៊ុំ សារឿត បានថ្លែងដូច្នេះ កាលពីថ្ងៃទី២៨ វិច្ឆិកា ក្នុងកិច្ចប្រជុំគណ:បញ្ជាការឯកភាពខេត្ត ។ ឯកឧត្ដមលើកឡើងថា “លោកឧត្តមសេនីយ៍ស្នងការរង (លោក សំ ជិត និងលោក ពូន សានិត ដែលមកប្រជុំគណ:បញ្ជាការឯកភាពខេត្ត ជំនួសលោកឧត្តមសេនីយ៍ត្រី អាត់ ខែម ស្នងការ) រឿងឡានចង្កូតស្តាំ ចូលតាមរបៀងព្រំដែនគ្រប់គ្រងដោយនគរបាលព្រំដែន ៨០៧ ខាងជើងបឹងត្រកួន ស្រុកថ្មពួក ( កាលពីល្ងាចថ្ងៃទី២៧ កញ្ញា ២០១៤ )
ជនជាតិថៃ នាំចូលមកដល់ហួសបន្ទាយវរ:នគរបាល៨០៧ ហើយទុកសោរជាប់នឹងឡានអោយទៀត។ តើថាកម្លាំងយើង មិនដឹងម៉េច? លោកប៉ូលីស បើរាយការណ៍កុហកៗ អោយសមផង។ ភូតអត់ទំនងសោះ អោយជឿបានអត់? កុំមើល ឬគិតថា គ្នាអ្នកមើលរបាយការណ៍ ល្ងង់ មិនដឹងខ្យល់អីនោះ” ។
គួររំលឹកថា កាលពីម៉ោង ៦ល្ងាចថ្ងៃទី២៧ កញ្ញា ២០១៤ នៅច្រករបៀងអូរសាយភូមិសាមគ្គី ឃុំគោករមៀត ស្រុកថ្មពួក ខេត្តបន្ទាយមានជ័យមាន ( ឈមនឹងភូមិ-ឃុំ-ស្រុកតាប្រាយ៉ា ខេត្តស្រះកែវ ប្រទេសថៃ) បុរសជនជាតិថៃម្នាក់ បានបើកបររថយន្តចង្កូតស្តាំម៉ាក តូយ៉ូតា វីហ្គោ ២ បាំង (ប្រភេទភីកអាប់) ១គ្រឿង ពណ៌ទឹកប្រាក់ ពាក់ស្លាកលេខ ក្រុងទេពមហានគរ (ក្រុងបាងកក) ឆម៥៥៥០។
ពេលនោះ មានឮគ្រាប់កាំភ្លើងប្រមាណ ១០ គ្រាប់របស់កម្លាំងតម្រួតថៃ បានបាញ់។ ដោយខ្លាចគ្រាប់កាំភ្លើង បុរសជនជាតិថៃ បន្តបើករថយន្តនោះ រត់ចូលជ្រៅ ដល់ក្នុងដីខ្មែរ ហើយទំនងជាវង្វេងផ្លូវផង ទើបមិនអាចផ្ទេរអោយជនជាតិខ្មែរឡើងដូរដៃបើកបរ យករថយន្ត ដូចសព្វមួយដង។
បែកការណ៍ដូច្នេះហើយ កម្លាំងប៉ូលិសព្រំដែន៨០៧ នៅបន្ទាយ អាចពុំបានពាក់ព័ន្ធនឹងប៉ូលិសផ្សេងៗទៀត ឬមានទាំងទាហ៊ានផង បានចាប់រថយន្តនោះ រួចបន្ទាប់មក ត្រូវមេវរ:ប្រញាប់ បញ្ជូនទៅស្នងការដ្ឋាន។
រថយន្តត្រូវគេរក្សាទុកជាសម្ងាត់ ក្នុងឃ្លាំងមួយ។ ឥឡូវ គេបានយករថយន្តនោះ ចេញក្រៅខ្លះៗ ហើយចំឡែកត្រង់គេមិនបំពាក់ស្លាកលេខនគរបាល គ្រាន់ប្រើក្នុងអង្គភាពបណ្តោះអាសន្ន បែរជាបំពាក់ស្លាកលេខស៊ីវិលទៅវិញ។ មានគេតថ្លៃ ហើយទេដឹង?
រហូតមកដល់ពេលនេះ តាមច្រកព្រំដែនតំបន់តាប្រាយ៉ា-បឹងត្រកួន មានឈ្មួញប្រុងលោតឆ័ត្ររត់ពន្ធនាំចូលរថយន្តទំនើប ៤ គ្រឿង គឺមានម៉ាកតូយ៉ូតាកាមរីបាឡែន ៣គ្រឿង និងរែងរ៉ូវើរ ១គ្រឿង ពីថៃមកកម្ពុជា។ ប៉ុន្តែបែកការណ៍ ក៏ត្រូវប៉ូលិសព្រំដែន ៨០៧ បានច្រានអោយចូលទៅទឹកដីថៃវិញ៕
