ខេត្តកណ្តាល៖រថយន្តដឹកដីម៉ាកហ៊ីណូបើកបុកហើយកិនម៉ូតូគុបជ្រុងចំពេញទំហឹងបណ្តាលឲ្យបុរសម្នាក់របួសដាច់ជើងទាំងពីរខ្ទេចហើយបានស្លាប់ពេលបញ្ជូនទៅដល់មន្ទីរពេទ្យយ៉ាងអណោចអធម៌ ហេតុការណ៌ដ៏គួរឲ្យរន្ធត់នេះបានកើតឡើងនៅវេលាម៉ោង១២និង៣០នាទីថ្ងៃទី៣០ខែវិច្ឆិកាឆ្នាំ២០១៤ស្ថិតនៅលើកំណាត់ផ្លូវជាតិលេខ២ចំណុចភូមិប៊ុណ្ណាឃុំព្រះពុទ្ធស្រុកកណ្តាលស្ទឹងខេត្តកណ្តាល។
ជនរងគ្រោះត្រូវបានគេស្គាល់ឈ្មោះថោងរតនាភេទប្រុសអាយុ២៧ឆ្នាំមុខរបរកសិករបើកម៉ូតូម៉ាកគុបជ្រុងពណ៌ខៀវពាក់ស្លាកលេខកណ្តាល1K-1208មានទីលំនៅភូមិអំពៅព្រៃ៣ឃុំអំពៅព្រៃស្រុកកណ្តាលស្ទឹងខេត្តកណ្តាល។
ចំណែកអ្នកបើករថយន្តបង្កបានចុះរត់គេចខ្លួនបាត់ស្រមោលបន្សល់ទុករថយន្តម៉ាកហ៊ីណូពាកស្លាកលេខភ្នំពេញ3B-4732ពណ៌ខៀវធន់ធំប្រភេទដឹកដី។
សាក្សីបានឲ្យដឹងថានៅមុនពេលកើតហេតុបានឃើញរថយន្តដឹកដីពេញបើកចេញពីរណ្តៅដីរបស់លោកឃុតឌីវឌ្ឍនានៅឯឃុំភូមិរាយដបឃុំសៀមរាបពីត្បូងទៅជើងបានជ្រុលចង្កូតទៅបុកម៉ូតូគុបជ្រុងធ្វើដំណើរពីជើងទៅត្បូងក្នុងទិសដៅពីបញ្ច្រាសទិសគ្នាចំពីមុខយ៉ាងពេញទំហឹងហើយបើកកិនជើងជនរងគ្រោះដាច់ទាំងពីរខ្ទេចម៉ត់គួរឲ្យអណោចអធ័មបំផុតចំណែកអ្នកបើករថយន្តបង្កបន្ទាប់ពីកើតហេតុបានចុះរត់គេចខ្លួនបាត់ស្រម៉ោលតែម្តង។
បច្ចុប្បន្នសពជនរងគ្រោះដែលស្លាប់ខណះពេលបញ្ជូនទៅដល់មន្ទីរពេទ្យនោះត្រូវបានក្រុមគ្រួសារដឹកយកមកស្រុកកំណើតដើម្បីធ្វើបុណ្យតាមប្រពៃណី។
ចំពោះវត្ថុតាងរថយន្តនិងម៉ូតូបានយកមករក្សាទុកនៅអធិការនគរបាលស្រុកកណ្តាលស្ទឹងដើម្បីដោះស្រាយទៅតាមផ្លូវច្បាប់។
ប្រជាពលរដ្ឋរស់នៅស្រុកកណ្តាលស្ទឹងបាននិយាយរិះគន់ថារថយន្តប្រភេទធំៗដឹកដីរបស់ឈ្មួញឈ្មោះឃុតឌីវឌ្ឍនាបើកមិនគោរពច្បាប់ចរាចរតែងបង្កគ្រោះថ្នាក់បុកមនុស្សស្លាប់និងរបួសជាច្រើនករណីចំពោះអាជ្ញាធរមិនហ៊ានហាមឃាត់ត្រួតពិនិត្យអ្វីឡើយដោយសារឈ្មោះឃុតឌីវឌ្ឍនាមានបុណ្យស័ក្តិអំណាចលុយកាក់ច្រើនមកគ្របដណ្តប់លើអាជ្ញាធរសមត្ថកិច្ចទើបការរកស៊ីរបស់គេមានភាពអនាធិប្បតេយ្យបែបនេះហើយពួកគាត់គ្រប់គ្នាបានសំដែងនូវការព្រួយបារម្ភយ៉ាងខ្លាំងក្នុងការធ្វើដំណើរចរាចរសព្វថ្ងៃ។
ប្រជាពលរដ្ឋនាំគ្នាស្នើសុំទៅដល់អាជ្ញាធរជំនាញពាក់ព័ន្ធថ្នាក់លើមេត្តាចុះត្រួតពិនិត្យដាក់វិធានការទប់ស្កាត់ផងដោយឡែករថយន្តបង្កសមត្ថកិច្ចគួរតែធ្វើការស្រាវជ្រាវស្វែងរកចាប់ជនល្មើសនិងធ្វើការផាកពិន័យឲ្យធ្ងន់ធ្ងរផងដែរ៕
