កំពង់ឆ្នាំង ៖នៅឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង បទល្មើសនេសាទខុសច្បាប់អូសអួនទ្រង់ទ្រាយធំ បានធ្វើសកម្មភាពយ៉ាងគគ្រឹកគគ្រេងនៅដែននេសាទ ជារៀងរាល់ថ្ងៃបាន ម៉ាសេរី ហើយបទល្មើសទាំងនេះមានភាពសុខសាន្តរហូត និងមិនដែលឃើញសមត្ថកិច្ចរដ្ឋបាលជលផល សង្កាត់
បរិបូរណ៍ និងខណ្ឌកំពង់ឆ្នាំង ចេញបង្ក្រាបឡើយ ករណីនេះត្រូវបាន គេសង្ស័យថា មានការបើកដៃពីសមត្ថកិច្ចជំនាញ ឲ្យឈ្មួញធ្វើតាមអំពើរចិត្តជាថ្នូរនិងលាភ សក្ការះ។
ប្រជាពលរដ្ឋរស់នៅក្នុងស្រុកបរិបូរបានអះអាងថា រាល់ថ្ងៃនេះមាន ទូកអូសអួន០២គ្រឿងនេះ ជារបស់ជនជាតិវៀតណាម នៅឃុំឆ្នុកទ្រូ ហើយអួនក្នុង០១គ្រឿងៗមានកម្មករ ពី១៥ទៅ២០ នាក់ និងមានកាណូត០៣គ្រឿងអូសទាញដោយកំលាំងម៉ាស៊ីន ម៉ាសាដាឬនីសាន់(៦ម៉ាស៊ីនស្មើនឹង ១៦៥សេះ) និង មុជទឹកដោយម៉ាស៊ីនខ្យល់។រាល់ថ្ងៃ ពួកជនជាតិវៀតណាម ទាំងនោះបានធ្វើសកម្មភាពនេសាទនៅបឹងទន្លេសាប ឃុំឆ្នុកទ្រូនិងចល័តចូលក្នុងដែនក្នុងនេសាទ ឃុំកំពង់លួង ស្រុកក្រគរ ខេត្តពោធិ៍សាត់ ហើយការធ្វើ សកម្មភាពតាំងពីដើមខែវិច្ឆិកា រហូតមកទល់បច្ចុប្បន្ន។ហើយពេលទឹកស្រកបន្តិចគេនេសាទ ពីបឹងទន្លេសាប ក្នុងដែននេសាទខេត្តកំពង់ឆ្នាំង រហូតមកទល់កោះក្រញ៉ាន និងព្រំប្រទល់ ស្រុកកំពង់លែង។
ប្រភពដដែលបានបញ្ជាក់ថា រាល់ថ្ងៃនេះសមត្ថកិច្ចជំនាញបានចាត់មនុស្សឲ្យដើរ ប្រមូលលុយ ក្នុងអួន០១គ្រឿងៗគឺមានតម្លៃរត់ការសរុបពី២០លានរៀល ទៅ២៥លានរៀល ជាថ្នូរធ្វើសកម្មភាពនេសាទ០១រដូវកាល ពោលគឺចាប់ពីទឹកសម្រក់ រហូតមកទល់នឹងទឹកដំឡើង ក្នុងរដូវបិទនេសាទ។និយាយឲ្យចំទៅគឺមិនប្រកាន់រដូវ បើទោះដឹងថាជារដូវត្រីពងក៏ដោយ។
ពលរដ្ឋនៅតំបន់នោះ បានបង្ហើយឲ្យដឹងថា កន្លងមកគេបានឃើញមន្ត្រីរដ្ឋបានជលផល តែងតែធ្វើការនេសាទ នៅទីនោះជាហូរហែ តែបង្ក្រាបបានតែអ្នកតូចតាចតែប៉ុណ្ណោះ ចំពោះអ្នកមានលុយបង់ មានអំណាចចង់ធ្វើអីក៏បាន ពិសេដូចជាអូនពីរខាងលើ មិនដែលឃើញទៅរំខានដល់បទល្មើសនេសាទអួននេះ ព្រោះឈ្មួញនិងជនជាតិវៀតណាមដែល មកនេសាទខុសច្បាប់ទាំងនោះបានសែនព្រេនដិតដល់។
ជុំវិញការចោទប្រកាន់នេះ នាយសង្កាត់រដ្ឋបាលជលផលបរិបូរណ៍លោក ម៉ូត សៀងហេង បានប្រាប់អ្នកសារព័ត៌មានដឹងថា អួនទាំង០២គ្រឿងនេះ ថ្វីបើនៅឃុំឆ្នុកទ្រូ ក្នុងដែនសមត្ថកិច្ចរបស់លោកមែន ប៉ុន្តែពួកគេធ្វើសកម្មភាពនេសាទ នៅបឹងទន្លេសាបខាងខេត្តពោធិ៍សាត់ឯណោះទេ។
រីឯលោកតាំង លី នាយផ្នែករដ្ឋបាលជលផលក្រគរ និងលោក ផេម សុខុន នាយសង្កាត់រដ្ឋបាលជលផលកំពង់លួងបានឆ្លើយបដិសេធន៍ថា លោកមិនបានដឹងរឿងនេះទេ ប៉ុន្តែក្រែងបទល្មើសនេសាទនេះលួចធ្វើចន្លោះប្រតិបត្តិការរបស់លោក។
លោក ណៅ ធួក ប្រធាននាយកដ្ឋានជលផល គួរតែបើកការស៊ើបអង្គេតលើករណីនេះ ព្រោះគេមក នេសាទខុសច្បាប់ពេញទន្លេសាប ពិសេសក្នុងភូមិសាស្ត្រីស្រុកបរិបូណ៌ កូនចៅលោកអត់ដឹងទេ។
លោក ឱម យិនទៀង ប្រធានអង្គភាពប្រឆាំងអំពើរពុករលួយគួរចាត់ក្រុមការងារឬមន្ត្រីរបស់ខ្លួនចុះធ្វើ ការអធិការកិច្ចលើ់ករណីមន្ត្រីជល់ផលបើកដៃឲ្យឈ្មួញនេសាទខុសច្បាប់ និងប្រមូលលុយពីទូកអូសអួន ក្នុងមួយគ្រឿងតម្លៃពី២០ទៅ២៥លានរៀល តើប្រាក់ទាំងនោះបានចូលរដ្ឋទេ?ឬមួយអស់លោកមន្ត្រី ជលគោលដៅខាងលើប្រមូលចែកគ្នាធ្វើមានធ្វើបានរៀងៗខ្លួន?
