អាជ្ញាធរខណ្ឌមានជ័យ ដឹកនាំដោយលោក ហួយ វិរះ នាយករងរដ្ឋបាលខណ្ឌមានជ័យ និង លោក សុំ រទ្ធី ប្រធានសន្តិសុខបណ្តាប់ធ្នាបខណ្ឌ និង ដោយមានការចូលរួម ពីកម្លាំងនគរបាលកម្លាំងកងរាជអាវុធ និងកម្លាំងសណ្តាប់ធ្នាប់ខណ្ឌ ព្រមទាំងមានការចូលរួម ពីយុវជន
កាកបាទក្រហម ដើម្បីចែកខិត្តប័ណ្ណស្តីពីសុវត្ថិភាពចរាចរផ្លូវគោក ។ ការចុះត្រួតពិនិត្យនេះ បានធ្វើទ្បើងនៅវេលាម៉ោង៧យប់ ថ្ងៃទី២ ខែធ្នូ ឆ្នាំ២០១៤ នៅតាមបណ្តោយផ្លូវលេខ២ ស្ថិតក្នុងសង្កាត់ចាក់អង្រែក្រោម ។
លោក ហួយ វិរះ បានបញ្ជាក់ថា ការចុះធ្វើរដ្ឋបាលពិនិត្យការអនុវត្តន៍ច្បាបើចរាចរ និងការឆែកអាវុធជាតិផ្ទុះ ក៏ដូចជាការធ្វើចរាចរ របស់បងប្អ្អូនប្រជាពលរដ្ឋ តាមម៉ូតូគ្មានស្លាកលេខ គ្មានមួកសុវត្ថិភាព និងគ្មានដាក់កញ្ជក់ត្រឹមត្រូវនេះ គឺធ្វើឡើងក្នុងគោលបំណង ការពារសន្តិសុខសណ្តាប់ធ្នាប់ និងរបៀបរៀបរយ អោយបានត្រឹមត្រូវតែប៉ុណ្ណោះ ហើយក៏ជាសញ្ញាមួយ ក្នុងការដាស់តឿន និងពញ្ញាក់អារម្មណ៍ របស់បងប្អូនមួយចំនួន ដែលតែងតែបើកបរក្នុងពេលស្រវឹង ហើយមិនបានបំពាក់កញ្ចក់ ក៏ដូចជាមិនពាក់មួកសុវត្ថភាព និងជាការប្រុងប្រយ័ត្នខ្ពស់បំផុតចំពោះជនប្រដាប់ អាវុធមួយចំនួនធំ ដែលតែងតែងប្រើប្រាស់អាវុធក្នុងការបាញ់បោះសេរី ក៏ដូចជាឆក់ ប្លន់ ឬក៏បង្កជាករណីផ្សេងៗ ពេល ចរាចរណ៍លើដងផ្លូវក្នុងរាជធានីភ្នំពេញ ។
ក្នុងប្រតិបត្តិការនេះដែរ គឺធ្វើឡើងដោយអនុវត្តន៍តាមការណែនាំរបស់លោក ពេជ្រ កែវមុនី ប្រធានគណ:បញ្ជា ការឯកភាព ដែលលោកតែងតែបញ្ជាអោយមន្ត្រីក្រោមឱវាទទាំងអស់ ធ្វើយ៉ាងណាប្រើគ្រប់វិធីក្នុងការចាត់វិធានការ ទៅលើជនប្រដាប់អាវុធខុសច្បាប់មួយចំនួន ដែលតែងតែបង្កភាពអសន្តិសុខ ក្នុងសង្គមជាតិ ដើម្បីការពារសុវត្ថភាព ជូនបងប្អូនប្រជាពលរដ្ឋក្នុងមូលដ្ឋាន អោយស្របទៅតាមគោលនយោបាយ ភូមិ ឃុំ មានសុ វត្ថភាពរបស់ប្រមុខរាជរដ្ឋាភិបាលកម្ពុជាទាំង៩ចំណុច ។
សូមបញ្ជាក់ថា ក្នុងប្រតិបត្តិការជាង១ម៉ោងនេះដែរ គឺកម្លាំងសមត្ថកិច្ចឃាត់ម៉ូតូដែលបើកបរមិនបានពាក់មួក និងមិនដាក់កញ្ជក់ និងស្លាកលេខខុសប្រក្រតីចំនួន ៦២គ្រឿង និងពិនិត្យជាតិអាលកុលបានចំនួន២នាក់យកមកធ្វើការផាកពិន័យទៅតាមច្បាប់ ៕
