កំពង់ឆ្នាំងៈក្រុមហ៊ុនមួយបានគាស់កកាយដីគ្រួសក្រហមដឹកជញ្ជូនតាមរថយន្តបែនធំៗដាក់សាឡង់រាប់ពាន់ម៉ែត្រគូបពុំមានច្បាប់ទម្លាប់ត្រឹមត្រូវ ពេលសមត្ថកិច្ចចំរុះរបស់ស្រុកចុះទៅត្រួតពិនិត្យអាជ្ញាប័ណ្ណ គេមិនខ្ចីមើលមុខថែមទាំងដឺដងទៀតផង មិនដឹងជាគេមានខ្នងអ្នកណាទេ។ការចុះទប់ស្កាត់ករណីខាងលើនេះរបស់អាជ្ញាធរស្រុករលាប្អៀរបានធ្វើឡើងនៅថ្ងៃទី៣០ ខែវិច្ឆិកា ឆ្នាំ២០១៤ នៅចំណុចភូមិព្រែកសាលា ឃុំទឹកហូត ស្រុករលា ប្អៀរ ជាកន្លែងសំចតរបស់សាឡង់ធំៗ២គ្រឿង ប៉ុន្តែការទប់ស្កាត់របស់សមត្ថកិច្ចចំរុះស្រុករលាប្អៀរគឺពុំមានប្រ សិទ្ធភាពឡើយ។
លោក សោម វឺន អភិបាលស្រុករលាប្អៀរបាននិយាយអោយដឹងថា៖ក្រោយពីបានទទួលព័ត៌មានពីអាជ្ញាធរមូលដ្ឋានអំពីករណីខាងលើនេះលោកបានចុះទៅត្រួតពិនិត្យសុំមើលអាជ្ញាប័ណ្ណធ្វើអាជីវកម្មរបស់ក្រុមហ៊ុន ប៉ុន្តែមេការដែលនៅគ្រប់គ្រងសាឡង់ដឹកដីគ្រួសក្រហមនៅចំណុចខាងលើបានឆ្លើយប្រាប់ថា គេបានសុំច្បាប់ធ្វើអាជីវកម្មនេះពីលោក ឈឹម វុឌ្ឍា អតីតៈអភិបាលស្រុករលាប្អៀររួចហើយមិនបាច់ចង់ដឹងទៀតទេ គេថែមទាំងដឺដងមិនខ្ចីមើលមុខលោកទៀតផង។បន្ទាប់មកលោកអភិបាលស្រុកបានរាយការណ៍ករណីនេះជូនលោក
អភិបាលខេត្ត នៅថ្ងៃទី៣០ ខែវិច្ឆិកា ឆ្នាំ២០១៤ លោក ឈួរ ច័ន្ទឌឿនអភិបាលខេត្ត បានបញ្ជារអោយសមត្ថកិច្ចចំរុះរបស់ស្រុករួមមាន អាជ្ញាធរស្រុក នគរបាលស្រុក និងកងរាជអាវុធហត្ថស្រុក ចុះទៅផ្អាកសកម្មភាពក្រុមហ៊ុនខាងលើនេះជាបណ្តោះអាសន្នដើម្បីអោយក្រុមហ៊ុនបង្ហាញអាជ្ញាប័ណ្ណ ឬសុំច្បាប់ធ្វើអាជីវកម្មអោយបានត្រឹមត្រូវ ប៉ុន្តែម្ចាស់ក្រុមហ៊ុនមិនស្តាប់ការណែនាំរបស់សមត្ថកិច្ចចំរុះឡើយ។ ក្រោយពីទប់ស្កាត់ករណីខាងលើនេះមិនបានសំរេច លោកអភិបាលស្រុករលាប្អៀរបានធ្វើរបាយការណ៍ជូនលោកអភិបាលខេត្ត និងដាក់សំណើសុំសមត្ថកិច្ចចំរុះថ្នាក់ខេត្ត ចុះមកអន្តរាគមក្នុងរឿងខាងលើនេះ។
ដោយឡែកនៅល្ងាចថ្ងៃទី០១ ខែធ្នូ ឆ្នាំ២០១៤ លោកអភិបាលស្រុករលាប្អៀរបានអោយដឹងថាៈនៅល្ងាចនេះ មានមេការក្រុមហ៊ុនម្នាក់ឈ្មោះ លោកផន ជាមន្ត្រីពេទ្យសត្វខេត្តចូលនិវត្តន៍បានយកលិខិតកិច្ចសន្យាមួយច្បាប់ចុះថ្ងៃទី០៦ ខែមិថុនា ឆ្នាំ២០១៤ របស់ប្រធានក្រុមហ៊ុន ឈ្មោះលោក ពៅ មុនីជាតិ អាយុ២១ឆ្នាំ រស់នៅភូមិទី៧ សង្កាត់បឹងរាំង ខ័ណ្ឌដូនពេញ ក្រុងភ្នំពេញ មកបង្ហាញដែលក្នុងលិខិតនោះមានហត្ថលេខាឯកភាពចុះថ្ងៃទី០៦ ខែមិថុនា ឆ្នាំ២០១៤ របស់លោក អ៊ុក រស់ ប្រធានមន្ទីរឧស្សាហកម្មនិងរ៉ែខេត្តកំពង់ឆ្នាំង បានអនុញ្ញាតអោយក្រុមហ៊ុនខាងលើនេះគាស់កកាយនិងដឹកជញ្ជូនដីនៅក្នុងភូមិសាស្ត្រទឹកដីខេត្តកំពង់ឆ្នាំងម៉ាសេរី ដោយគ្មានការឯកភាពពីថ្នាក់លើឡើយ។
ការបង្ហាញត្រឹមតែលិខិតកិច្ចសន្យារវាងប្រធានក្រុមហ៊ុនគ្មានអាជ្ញាបណ្ណ័ ជាមួយលោកប្រធានមន្ទីរឧស្សា ហកម្មនិងរ៉ែខេត្តកំពង់ឆ្នាំង សំរាប់ការធ្វើអាជីវកម្មទ្រង់ទ្រាយធំដឹកដីរាប់ពាន់រាប់ម៉ឹនម៉ែត្រគូបយកទៅលក់នៅទី
ក្រុងភ្នំពេញ បែបនេះគឺមិនត្រឹមត្រូវនោះឡើយ សម័យនេះហើយកុំយកខ្នងអ្នកធំមកបន្លាចគេទៀត។
គួរបញ្ជាក់ថា៖កាលពីឆ្នាំមុនមានក្រុមហ៊ុនដឹកជញ្ជូនមួយបានដឹកថ្មភ្នំតាមរថយន្តបែនធំៗ មកដាក់សាឡង់បែបនេះរាប់ម៉ឺនម៉ែត្រគូបយកទៅលក់នៅកោះពេជបានបំផ្លាញផ្លូវកៅស៊ូក្នុងក្រុងកំពង់ឆ្នាំង និងផ្លូវលំជាច្រើនគីឡូម៉ែត្រក្នុងស្រុករលាប្អៀរ ត្រូវសមត្ថកិច្ចចំរុះក្រសួងសាធារណៈការចាប់ផាកពិន័យ និងធ្វើកិច្ចសន្យាអោយជួសជុលផ្លូវសងខេត្តកំពង់ឆ្នាំងវិញ មកដល់ពេលនេះក្រុមហ៊ុននោះបានគេចខ្លួនបាត់មិនទាន់ជួសជុលផ្លូវសងខេត្តវិញផង។ឥឡូវនេះស្រាប់តែកើតរឿងនេះមួយទៀតហើយ ករណីនេះប្រជាពលរដ្ឋសំណូមពរលោកអភិបាលខេត្តកំពង់ឆ្នាំង មេត្តាជួយទប់ស្កាត់អោយបានមិនគួរអោយក្រុមហ៊ុនឯកជនមួយបំផ្លាញដី បំផ្លាញផ្លូវក្នុងស្រុកខេត្តតាមទំនើងចិត្តដើម្បីផលប្រយោជន៍ផ្ទាល់ខ្លួននោះឡើយ៕
កំពង់ឆ្នាំង,
