ខេត្ដពោធិ៍សាត់៖ បុរសម្នាក់បានស្លាប់នៅនឹងកន្លែងភ្លាមៗ និងម្នាក់ទៀត ជាអ្នករួមដំណើរជាមួយគ្នា បានរងរបួសធ្ងន់ ដោយសារគ្រោះថ្នាក់ចរាចរណ៍មួយ រវាងរថយន្ដដឹកគ្រឿងចក្រមួយគ្រឿង បើកបុកម៉ូតូមួយគ្រឿងពីក្រោយពេញទំហឹង ខណៈកំពុងធ្វើដំណើរស្របទិសគ្នា នៅលើ
កំណាត់ផ្លូវលំ ក្រាលគ្រោះក្រហម នៅត្រង់ចំណុចខាងជើងស្ពានតាំងល្វា ចម្ងាយប្រហែល២៥០ម ស្ថិតនៅក្នុងភូមិកណ្ដាល ឃុំឈើតុំ ស្រុកក្រគរ ខេត្ដពោធិ៍សាត់ ។
ជនរងគ្រោះដែលត្រូវរថយន្ដកិនស្លាប់មានឈ្មោះ វឿន សុខន ភេទប្រុស អាយុ២៦ឆ្នាំ ត្រូវរថយន្ដកិនចំក្បាល ផ្ទុះខួរស្លាប់ភ្លាមៗ នឹងអ្នករួមដំណើរជាមួយគ្នា មានឈ្មោះ ឆាំ ចិន្ដា ភេទប្រុស អាយុ២៥ឆ្នាំ ជនរងគ្រោះទាំង២នាក់នេះ មានទីលំនៅក្នុងភូមិផ្ទះចក ឃុំឈើតុំ ស្រុកក្រគរ ខេត្ដពោធិ៍សាត់ ជិះម៉ូតូ១គ្រឿង ម៉ាកហុងដាឌ្រីម សេ១២៥ សេរីឆ្នាំ ២០១៤ ពណ៌ខ្មៅ ពាក់ផ្លាកលេខពោធិ៍សាត់ 1B-1842 ធ្វើដំណើរក្នុងទិសដៅពីជើងទៅត្បូង លុះមកដល់
ចំណុចកើតហេតុ ស្រាប់តែមានរថយន្ដដឹកគ្រឿងចក្រមួយគ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3B-8323 បើកស្របទិសគ្នា ពេលមកដល់កន្លែងកើតហេតុ ដោយរថយន្តមានល្បឿន លឿន បានបុកម៉ូតូពីក្រោយទាំងកម្រោល បណ្ដាលឱ្យបុរសម្នាក់ស្លាប់ និងម្នាក់ទៀតរបួសតែម្ដង ក្រោយកើតហេតុ អ្នកបើកបររថយន្ដ ឃើញហេតុការណ៍ដូចនោះ ក៏បើកទ្វាររថយន្ដ រត់គេចខ្លួនបាត់ស្រម៉ោល ។
ក្រោយពេលកើតហេតុ សមត្ថកិច្ចចរាចរណ៍ សហការណ៍ជាមួយជំនាញ បានចុះមកដល់កន្លែងកើតហេតុ និងបានវាស់វែង យកម៉ូតូរបស់ជនរងគ្រោះ និងរថយន្តបង្កហេតុ ទៅរក្សាទុកនៅអធិការដ្ឋាន នគរបាលស្រុកក្រគរ រងចាំការដោះស្រាយ គ្នាទៅតាមផ្លូវច្បាប់ ។
ចំណែកសព សមត្ថកិច្ចជំនាញ ប្រគល់ឲ្យក្រុមសាច់ញាតិ យកទៅធ្វើបុណ្យ តាមប្រពៃណី រីឯម្នាក់ទៀត ដែលរងរបួសធ្ងន់ ត្រូវបានបញ្ជូនទៅមន្ទីរ បង្អែកខេត្តពោធិ៍សាត់ ដើម្បីសង្គ្រោះបន្ទាន់ផងដែរ ៕
