កំពង់ឆ្នាំង៖លបលូសាច់អួន១៣មាត់ និងរបាំងសាច់អួនប្រវែងជាង៤ពាន់ម៉ែត្រនៅក្នុងតំបន់អភិរក្សពូជត្រីចំនួន៥កន្លែង ត្រូវបានលោក ឯក ស៊ុនរស្មី ព្រះរាជអាជ្ញារងខេត្ត ដឹកនាំប្រជាពលរដ្ឋស្ម័គ្រចិត្តក្នុងសហគមន៍នេសាទនិងសមត្ថកិច្ចនគរបាលមូលដ្ឋាន លួចឆ្មក់ចុះទៅបង្ក្រាប
និងកាប់បំផ្លាញចោល។ នៅក្នុងកិច្ច បង្ក្រាបនេះដែរសមត្ថកិច្ចចាប់បានជនល្មើសនេសាទចំនួន៥នាក់ ដកហូតកាណូត៣គ្រឿង និងពីងពុងសំរាប់បោះរបាំងជាង៤០ដើមជាវត្ថុតាង។កិច្ចប្រតិបត្តិការណ៍ឆ្មក់បង្ក្រាបនេះ បានធ្វើឡើងចាប់ពីម៉ោង២រសៀល ដល់ម៉ោង៥និង៣០នាទីល្ងាច ថ្ងៃទី០២ ខែធ្នូ ឆ្នាំ២០១៤ នៅក្នុងភូមិសាស្ត្រទឹកដី ឃុំកំពង់ព្រះគគីរ ស្រុកបរិបូណ៌។
លោក ឯក ស៊ុនរស្មី ព្រះរាជអាជ្ញារងសាលាដំបូងខេត្តបានអោយដឹងថា៖កាលពីសប្តាហ៍មុនលោកក៏បានចុះបង្ក្រាបបទល្មើសនេសាទនៅក្នុងតំបន់ខាងលើនេះដែរ ដោយចាប់បានជនល្មើសនេសាទចំនួន៤នាក់ និងកាណូត៣គ្រឿងផងដែរ ហើយបានធ្វើការអប់រំប្រគល់អោយសមត្ថកិច្ចជំនាញ ដោយអោយជនល្មើសធ្វើកិច្ចស ន្យាបញ្ឈប់ការនេសាទខុសច្បាប់នៅក្នុងតំបន់អភិរក្ស និងអោយរើរុះរបាំងសាច់អួនខុសច្បាប់រាបពាន់ម៉ែត្រទាំងនោះដោយខ្លួនឯងចេញ ប៉ុន្តែមកដល់ពេលនេះពួកគេមិនបានរើរុះឡើយ។
ហេតុនេះក្រោយយពីទទួលបានព័ត៌មានពីប្រជាពលរដ្ឋជាសមាជិកក្នុងសហគមន៍នេសាទ ឃុំកំពង់ព្រះគគីរមកថានៅក្នុងតំបន់ខាងលើនេះនៅតែមានបទល្មើសជាច្រើនដដែល និងដោយមានកិច្ចសហការដ៏ល្អ ពីប្រជាពលរដ្ឋជាសមាជិកក្នុងសហគមន៍នេសាទចំនួន១២នាក់មានកាណូត៥គ្រឿងផងនោះ លោកក៏បានសហការជាមួយសមត្ថកិច្ចនគរបាល និងអ្នកយកព័ត៌មានយើងចុះឆ្មក់បង្ក្រាបនៅក្នុងតំបន់អភិរក្សពូជត្រី៥ចំណុចគឺ៖ចំណុចចុងព្រែកតាគង់ សែសាង ព្រែកថ្លាន់ ស្ទឹងពោធិ និងចំណុចដែននេសាទសាធារណៈបឹងហានាង។
នៅក្នុងកិច្ចបង្ក្រាបនេះប្រជានេសាទស្ម័គ្រចិត្តនិងសមត្ថកិច្ចបានកាប់បំផ្លាញរបាំងសាច់អួនសារុបជាង៤ពាន់ម៉ែត្រ កាប់បំផ្លាញលបលូសាច់អួនធំៗ១៣មាត់ ចាប់បានជនល្មើស២នាក់កំពុងបោះបង្គោលត្រៀមដាក់ដាក់របាំងខុសច្បាប់នៅក្នុងតំបន់អភិរក្ស និងបក្ខពួកគេ៣នាក់ទៀតដែលមាន៖ ១ឈ្មោះ ចាវ ជាតិ អាយុ១៧ឆ្នាំ ២ឈ្មោះ ចាវ ដា អាយុ៣១ឆ្នាំ ៣ឈ្មោះ ថូ ចាវ អាយុ៥៦ឆ្នាំ ៤ឈ្មោះ មឿន វិត អាយុ១៨ឆ្នាំ និង៥ឈ្មោះ វ៉ុន រឿន អាយុ៣៣ឆ្នាំ ពួកគេរស់នៅភូមិកំពង់អួរ ឃុំខុនរ៉ង ស្រុកបរិបូណ៌ វត្ថុតាងដកហូតបានកាណូតបាឡាស្មាច់ចំនួន៣គ្រឿង បង្គ្រោលពីងពុងជាង៤០ដើម និងឧបករណ៍ញញួរពូថៅសំរាប់បោះបង្គ្រោលមួយចំនួនទៀត។
ជនសង្ស័យនិងវត្ថុតាងត្រូវបានលោកព្រះរាជអាជ្ញារងប្រគល់អោយសមត្ថកិច្ចរដ្ឋបាលជលផលសង្កាត់ស្រុកបរិបូណ៌នៅព្រលប់ៗថ្ងៃទី០២ ខែធ្នូ ដើម្បីកសាងសំណុំរឿងតាមនិតិវិធីបញ្ជូនទៅតុលាការ។ប៉ុន្តែដោយកម្លាំងសមត្ថកិច្ចជលផលគ្នាតិចមកតែ២នាក់ លោកព្រះរាជអាជ្ញារងបានសំរេចដោះលែងជនសង្ស័យជាបណ្តោះអាសន្នអោយទៅលំនៅដ្ឋានវិញ ប៉ុន្តែនឹងកោះហៅមកតុលាការខេត្តកសាងសំណុំរឿងពេលក្រោយ។
គួរបញ្ជាក់ថា៖បទល្មើសនេសាទទាំងនៅក្នុងតំបន់អភិរក្ស និងទាំងនៅក្នុងដែននេសាទសាធារណៈនៅមានរាប់រយកន្លែងទៀត នៅគ្រប់ស្រុកដែលមានតំបន់នេសាទ ប៉ុន្តែបទល្មើសភាគច្រើនមិនត្រូវបានសមត្ថកិច្ចជំនាញ និងសហគមន៍នេសាទនៅក្នុងមូលដ្ឋានយកចិត្តទុកដាក់បង្ក្រាបឡើយ។ហេតុនេះហើយទើបលោកព្រះរាជអាជ្ញាខេត្ត លួចឆ្មក់ចុះបង្ក្រាបដោយខ្លួនឯងជាមួយប្រជានេសាទស្ម័គ្រចិត្ត និងសមត្ថកិច្ចនគរបាលមូលដ្ឋាន
មិនអោយសមត្ថកិច្ចជំនាញដឹងជាមុនឡើយ ហើយការលួចឆ្មក់បង្ក្រាបបែបនេះនឹងត្រូវធ្វើជាបន្តទៀត ដោយមិនទុកអោយមន្ត្រីជំនាញនិងប្រធានសហគមន៍នេសាទមួយចំនួន ជិះសេះលែងដៃឃុបឃិតជាមួយបទល្មើសនេសាទបំផ្លាញធនធានមច្ឆាជាតិទៀតបានឡើយ៕
