ភ្នំពេញ៖សមត្ថកិច្ចកងរាជអាវុធហត្ថខណ្ឌដង្កោចុះប្រតិបត្តិការបង្ក្រាបក្រុមអ្នកញៀនល្បែងប្រជល់មាន់ចំនួន៨នាក់និងវត្ថុតាងមួយចំនួននៅវេលាម៉េោង១០និង៣០នាទីព្រឹកថ្ងៃទី៣០ខែវិច្ឆិកាឆ្នាំ២០១៤នៅក្នុងដីឡូត៍ចំការស្វាយគ្មានមនុស្សនៅស្ថិតនៅភូមិព្រែកថ្លឹងសង្កាត់
ជើងឯកខណ្ឌដង្កោរាជធានីភ្នំពេញ។
លោកវរសេនីយ៍ទោសសុភ័ណ្ឌមេបញ្ជាការកងរាជអាវុធហត្ថខណ្ឌដង្កោបានប្រាប់ឲ្យដឹងថាក្នុងការចុះប្រតិបត្តិការបង្ក្រាបល្បែងស៊ីសងជលមាន់ខាងលើឃាត់បានក្រុមអ្នកលេងបានចំនួន៨នាក់ម៉ូតូចំនួន១០គ្រឿងសម្រាប់ជាមធ្យោបាយមាន់គកចំនួន៤ក្បាលនិងជញ្ជីងសំរាប់ថ្លឹង១។
លោកមេបញ្ជាការបន្តថាក្រុមកម្លាំងកងរាជអាវុធហត្ថឆ្មក់ឡោមព័ទ្ធទីតាំងល្បែងជល់មាន់បានព័ត៌មានពីប្រជាពលរដ្ឋនិងដោយមានការចង្អុលបង្ហាញអំពីលោកឧត្តមសេនីយ៍រ័ត្នស្រ៊ាងមេបញ្ជាការកងរាជអាវុធហត្ថរាជធានីភ្នំពេញផងនោះលោកបានដឹកនាំកម្លាំងដោយផ្ទាល់ចុះបង្ក្រាបតែម្តងប៉ុន្តែការឃាត់បានមនុស្សនិងវត្ថុតាងមិនត្រូវបានផ្តន្ទាទោសនោះទេគ្រាន់តែធ្វើការអប់រំណែនាំបានដោះលែងឲ្យមានសេរីភាពវិញ។
លោកមេបញ្ជាការបន្តថាដើម្បីរក្សានូវគោលនយោបាយភូមិឃុំមានសុវត្ថិភាពរបស់ប្រមុខរដ្ឋាភិបាលដែលតែងតែក្រើនរំលឹកជានិច្ចកាលនោះសមត្ថកិច្ចអាវុធហត្ថខណ្ឌដង្កោព្យាយាមលុបបំបាត់នូវល្បែងស៊ីសងឲ្យអស់ពីមូលដ្ឋាន៕
