បាត់ដំបង: ដើមឈើមួយដើមដ៏ធំត្រូវបានអោយជាប់ទៅនឹងសសរស្ពានវត្តគរតាំងពីទឹកជំនន់ប៉ុន្មានខែមកម្ល៉េះប៉ុន្តែគេមិនបានឃើញខាងសាលាក្រុងឬក៏មន្ទីរជំនាញពាក់ព័ន្ធណាមួយចាប់អារម្មណ៍យកភ្នែកមើលឡើយដែលទុកបណ្តោយអោយដើមឈើនោះពុកផុយរលួយទៅតាមធម្មជាតិដោយគេមិនបាន គិតថាការទុកបណ្តោយបែបនេះវាអាចបង្កអោយមានការរង្គោះរង្គើដល់តួស្ពាននោះឡើយ. ។
ចាប់តាំងពីទឹកស្ទឹងសង្កែមានសភាពជន់ជោរនារយ:ពេលប៉ុន្មានខែកន្លងទៅនេះគឺមានដើម
រុក្ខជាតិជាច្រើនដែលដុះនៅយាមបណ្តោយមាត់ស្ទឹងសង្កែត្រូវបានបាក់រលំធ្លាក់ចូលទៅក្នុងស្ទឹងនិងហូរធ្លាក់ឆ្ពោះទៅបឹងទន្លេសាប. ។ ប៉ុន្តែនៅក្នុងរយ:ពេលនោះដែរក៏គេសង្គេតឃើញថាមានដើមឈើមួយចំនួនដូចជាគុម្ពឫស្សី ឬក៏ដើមឈើធំៗគឺមិនអាចហូរទៅតាមទឹកដល់បឹងទន្លេសាបនោះទេដោយពួកវាត្រូវជួបនឹងឧបសគ្គជាច្រើននៅតាមផ្លូវទឹកដូចជា ស្ពានវត្តគរ ស្ពានរថភ្លើង ស្ពានថ្មចាស់ ស្ពានសម្តេចហ៊ុនសែន ស្ពានលោកស ខេង ស្ពានថ្មថ្មី និងស្ពានផ្សារប្រហុក ស្ពានដ៏ច្រើនសន្ធឹកសន្ធាប់នេះហើយដែលអាចទាក់យកនូវដើមរុក្ខជាតិទាំងនោះមិនអោយបន្តដំណើរទៅមុខបានទៀតទេ. ។
ពាក់ព័ន្ធនឹងបញ្ហានេះដែរខណ:ដែលទឹកកំពុងតែជន់ខ្លាំងគេសង្គេតឃើញថាអាជ្ញាធរ
ខេត្ត ក្រុង និងមន្ទីរពាក់ព័ន្ធព្រមទាំងសមត្ថកិច្ចផងនោះបានធ្វើការបិទផ្អាកមិនអោយធ្វើចរាចរឆ្លងកាត់ឡើយដើម្បីប្រើប្រាស់គ្រឿងចក្រធ្ពក់ទាញយកនូវដើមរុក្ខជាតិទាំងនេះចេញពីសសរស្ពានក្នុងគោលបំនងការពារនូវការរង្គោះរង្គើស្ពានដោយសារតែទឹកបោកផ្ទប់ទៅដើមរុក្ខជាតិហើយអង្រួនដល់សសរស្ពាន។
ផ្ទុយទៅវិញអកុសលតែស្ពានវត្តគរមួយប៉ុណ្ណោះដែលគ្មានអ្នកណាម្នាក់យកចិត្តទុកដាក់
បើកភ្នែកមើលឡើយដែលគេទុកបណ្តោយទៅតាមយថាកម្មដោយគេមិនគិតថាអនាគតវានឹងទៅជាយ៉ាងណានោះឡើយ ព្រោះតាំងពីទឹកជំនន់នោះមកដល់បច្ចុប្បន្នវាមានរយ:ពេលរាប់ខែមកហើយឬក៏គេទុកអោយដល់រដូវទឹកជំនន់ម្តងទៀតដើម្បីអោយវាអណ្តែតទៅជាមួយទឹក
ដោយមិនបាច់ចំណាយលើថ្លៃសាំងក្នុងការប្រើប្រាស់គ្រឿងចក្រ ? បើអស់លោកទាំងនោះពិសេសខាងមន្ទីរសាធារណ:ការខេត្ត បើមានគំនិតបែបនេះមែននោះវាហាក់បីដូចជាមានបំនងបំផ្លិចបំផ្លាញទៅលើសមិទ្ធិផលដែលរាជរដ្ឋាភិបាលបានខិតខំកសាងមកយ៉ាងដូច្នេះដែរ គឺគួរណាស់តែយើងទាំងអស់គ្នាចេះរួបរួមគ្នាថែទាំអោយបានគង់វង្សនិងល្អប្រសើរដើម្បីទុកជាកេរ្តិ៍ដល់កូនចៅជំនាន់ក្រោយជៀសវាងនូវពាក្យដែលគេអាចតិះដៀលថា បើមិនបានជួយចូកជួយចែវ កុំយកជើងរាទឹក. ៕
