សៀមរាប ក្រុមការងារសុខាភិបាលប្រចាំប្រទេស នៃភាពជាដៃគូសុខភាពអន្តរជាតិ មកពីតំបន់នៃបណ្តាប្រទេសអាហ្វ្រិក អាមេរិក អ៊ឺរ៉ុប និងតំបន់អាស៊ីប៉ាស៊ីហ្វិក ប្រមាណជាជាង៣០ប្រទេស រួមជាមួយនឹងស្ថាប័នជាដៃគូអភិវឌ្ឍផ្សេងៗទៀត បានជួបជុំគ្នា បើកកិច្ចប្រជុំលើកទី៥របស់ខ្លួន នៅក្រុងសៀមរាប ក្នុងគោលបំណងស្វែងរកផែនទីបង្ហាញផ្លូវ ធ្វើឲ្យប្រសើរឡើងគណនេយ្យភាពទ្វេទិស ដើម្បីវឌ្ឍនភាព លទ្ធផល និងការកំណត់មធ្យោបាយតម្រឹមទិសដៃគូសុខាភិបាល ទៅនិងអទិភាព ផែនការ និងប្រព័ន្ធរបស់ប្រទេស ព្រមទាំងធ្វើឲ្យមានការរីកចំរើន គោលដៅអភិវឌ្ឍសហស្សវត្សរ៍ ។ គួរបញ្ជាក់ដែរថា អង្គការភាពជាដៃគូសុខភាពអន្តរជាតិ ត្រូវបានបង្កើតឡើងនៅក្នុងឆ្នាំ២០០៧ ដែលមានការចូលរួមដោយរាជរដ្ឋាភិបាល រដ្ឋាភិបាល ដៃគូអភិវឌ្ឍ និង សង្គមស៊ីវិល ក្នុងនេះ ប្រទេសកម្ពុជា គឺជាប្រទេសហត្ថលេខីមួយនៃកិច្ចព្រមព្រៀងសាកលនេះ ។ 
ព្រះរាជាណាចក្រកម្ពុជា គឺជាប្រទេសទី១នៅអាស៊ី ដែលត្រូវបានជ្រើសរើសឲ្យធ្វើជាម្ចាស់ផ្ទះនៃកិច្ចប្រជុំ ដ៏មានសារសំខាន់នេះ ។ លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ញើញជាអធិបតីបើកដំណើរការកិច្ចប្រជុំនេះ នាល្ងាចថ្ងៃទី០២ ខែធ្នូ ឆ្នាំ២០១៤ ដែលកិច្ចប្រជុំនេះ គ្រោងនឹងដំណើរការរយៈពេល៣ថ្ងៃ ក្រោមការចូលរួមផងដែរពីសំណាក់ លោកវេជ្ជបណ្ឌិត Dong-ilAhn តំណាងអ្គការសុខភាពពិភពលោកប្រចាំនៅកម្ពុជា , លោក Alassan SOW តំណាងធនាគារពិភពលោកប្រចាំនៅកម្ពុជា ,ក្នុងនេះដែរ ក្នុងនាមអាជ្ញាធរខេត្តសៀមរាប គឺមានវត្តមាន លោក ឃឹម ប៊ុនសុង អភិបាលនៃគណអភិបាលខេត្ត បានចូលរួម ។
លោកវេជ្ជបណ្ឌិត ម៉ម ប៊ុនហេង ថ្លែងបើកកិច្ចប្រជុំនេះ ដោយលើកបង្ហាញថា ដូចដែលបានឯកភាពនិងព្រមព្រៀងនៅក្នុងសេចក្តីថ្លែងការណ៍ទីក្រុងប៉ារីស ស្តីពីប្រសិទ្ធិភាពហិរញ្ញប្បទានសហ-ប្រតិបត្តិការវិស័យសុខាភិបាល ប្រទេសកម្ពុជាដែលជាប្រទេសហត្ថលេខីរបស់អង្គការភាពជាដៃគូសុខភាពអន្តរជាតិ បានខិតខំជម្រុញការអភិវឌ្ឍន៍ប្រកបដោយប្រសិទ្ធិភាពជាបន្តបន្ទាប់ ជាមួយនឹងការប្រើប្រាស់ជំនួយអភិវឌ្ឍ ដោយឈរលើគោលការណ៍ របស់ភាពជាដៃគូសុខភាពអន្តរជាតិនេះ ។
ជាមួយឱកាសនោះដែរ លោករដ្ឋមន្ត្រីសុខាភិបាលកម្ពុជា បានសម្តែងនូវការអរគុណចំពោះ អង្គការភាពជាដៃគូសុខភាពអន្តរជាតិ ដែលបានផ្តល់ការគាំទ្រមុខងារក្រុមការងារបច្ចេកទេសសុខា-ភិបាលថ្នាក់ជាតិ និងថ្នាក់ខេត្តនៅកម្ពុជា ក្នុងរយៈកាលកន្លងមក ។ ឯកឧត្តម បានបន្តថា បច្ចុប្បន្ននេះ កម្ពុជាបានត្រៀមខ្លួនរួចជាស្រេចក្នុងការបង្កើនសកម្មភាព ដើម្បីសម្រេចជាចុងក្រោយ នូវគោលដៅអភិវឌ្ឍន៍សហស្សវត្សរ៍ ដែលនៅសេសសល់សម្រាប់វិស័យសុខាភិបាល និង ឈានទៅគិតគូរអំពីរបៀបវារៈការងារសុខាភិបាលក្រោយឆ្នាំ២០១៥ ស្តីពី គោលដៅអភិវឌ្ឍន៍ប្រកបដោយចិរភាព ឲ្យមានសមធម៌ និង ការរីកចម្រើនប្រកបដោយនិរន្តរភាព ៕
